Apocalipsis 10 - Biblia Guarani Tumpa Iñee

Araɨgua tembikuatía michi vae ndive

¹ Jare aecha ogüeyɨ ara güi araɨgua imbaepuere yae vae oñeova amapɨtu pe jare iñäka re yɨɨ, jova jembipeasɨ kuaraɨ rami jare itɨma reta tata jɨsɨ vae rami.

² Jare güɨnoi ipo pe metei tembikuatía michi vae oyepea oï vae. Jare oñono ipɨ iyakatu ɨguasu re jare ipɨ iyasu ɨvɨ re.

³ Jayave täta osapúkai metei yaguapope oñee rami. Jare osapúkai yave, jɨapu ara chiu vese.

⁴ Jare chiu vese jɨapu ara güire, che aikuatiata tëi, ërei aendu ñee ara güi jei cheve: “Agüɨye emombeu kia pe jókuae chiu ara jɨapu vae jei vae. Agüɨye eikuatía.”

⁵ Jare jókuae araɨgua aecha güɨnoi ipɨ ɨguasu re vae jare ɨvɨ re vae oupi ipo ara kotɨ,

⁶ jare jei jekuaekuae avei rupi oiko vae jee re; oyapo ara jare opaete ipo reta vae; ɨvɨ jare opaete ipo reta vae, ɨguasu jare opaete ipo reta vae, jei: “Opa ma ara,

⁷ echa araɨgua chiúa omboɨpɨ ma omoñee mimbɨguasu yave, opata oyembopo Tumpa iyemongeta yaikuaa rapembae vae, jae oikuaauka jembiokuai iñeemombeúa reta rupi vae.”

⁸ Jare aendu ye ñee ara güi jei cheve: “Ekua jare eipɨɨ tembikuatía michi vae oyepea vae araɨgua güɨnoi ipɨ ɨguasu re jare ɨvɨ re vae ipo pe vae.”

⁹ Jayave aja araɨgua kotɨ jare jae chupe omee vaerä cheve jókuae tembikuatía michi vae. Jare jei cheve: “Eipɨɨ jare opa jeu, jare omboirota nderɨe, ërei ndeyuru pe jëeta ei rami.”

¹⁰ Jayave aipɨɨ jókuae tembikuatía michi vae araɨgua ipo güi jare opa jau. Jare cheyuru pe jëe yae ei rami, ërei jau ma yave, cherɨe omboiro.

¹¹ Jayave araɨgua jei cheve: “Remoërakua ñotai ko Tumpa iñee jeta vae tëta reta pe, tëtaguasu reta pe, ñee ambuae mbuae reta pe jare mburuvicha guasu reta pe.”