AMÓS 8 - Biblia Guarani Tumpa Iñee

Temitɨ iagüe kanata pe

¹ Körai oechauka cheve yandeYa Tumpa: YandeYa Tumpa oechauka cheve metei kanata tɨnɨe oï pɨpe temitɨ ia yagüɨyegüe.

² Jare oparandu cheve: —¿Mbae pa reecha Amós? Che jae chupe: —Metei kanata temitɨ ia yagüɨyegüe. Jare yandeYa jei cheve: —Ou ma oväe ara iyapɨ, Israel tëta chembae vae re; mbaetɨta ma aropɨa chupe.

³ Jókuae ara tupao pe otairari vae reta jäsembaita oyaeo. Jei yandeYa. Jeta yaeta omanogüe, oipota rupi kïrii ngatuño omombo retata.

Israel oñejäa vaerä oyearo ma

⁴ Peendu, oñemomichi vae reta re peyuvanga vae reta jare paravete vae reta re peyuvanga vae reta,

⁵ pere körai: “¿Kërai yave ra oasata arete yasɨ pɨau regua ñamee vaerä trigo? ¿Jare mbutuu iara, yaipea vaerä tembíu rɨru reta; ñamomichi äve vaerä mbaejäaka jare yaupi vaerä jepɨ?

⁶ ¡Yagua vaerä korepoti re paravete vae reta, jare poriau vae reta yagua vaerä pɨapaa re! ¡Trigo ikavimbae ave ñameeta!”

⁷ YandeYa jei jee re aeño Jacob kotɨ: “Ngaraai cheakañɨ opaete jembiapo reta güi.”

⁸ Jáeramo, ¿mbaetɨta pa ɨvɨ okana? ¿Ɨvɨ ipo reta mbaetɨta pa oyaeo jókuae jeko pegua? ¡Tuichata ɨ ɨ̈aka pe rami, jare jagüeta ɨ̈aka Egipto pegua rami!

⁹ “¡Jókuae ara! Jei yandeYa Tumpa: Amoingeta kuaraɨ ara mbɨte peño, ara jembipe katu oï reve ambopɨtumimbita.

¹⁰ Aipoepɨta pearete reta mbɨatɨtɨ pe, jare aipoepɨta petairari reta yaeo pe; jare amondeukata temimonde mbɨatɨtɨ pegua opaete vae pe, jare opaete vae ia oñapita; jókuae ara opaete vae oyaeota membɨrɨpɨ re rami, jare ojoita iyapɨ mbɨatɨtɨ tuicha vae ndive.

¹¹ YandeYa Tumpa jei: Mase, ambouta yɨmbɨaɨ iara kuae ɨvɨ pe; ërei mbaetɨta yɨmbɨaɨ tembíu regua, ani ɨuve ɨ regua, ¡yandeYa iñee re ko!

¹² Matɨ rupi ko oeka reta tëita yandeYa iñee; ɨvɨtuguasu güive kuaraɨ oëa kotɨ; ërei mbaetɨta oväe chupe.

¹³ Jókuae ara, kuñatai pöra reta jare kunumi reta ipɨtuta iɨuve güi.

¹⁴ Samaria pegua tumpa-raanga reta omboete reta vae jei: ‘Dan iñemuña reta, oikove ko netumpa’, jare ‘Beerseba pegua tumpa-raanga reta’, jókuae reta ogüɨapita, ngaraa ye ma opüa reta.”