AMÓS 7 - Biblia Guarani Tumpa Iñee

Tumpa oechauka mboapɨ mbaembae oyeapota vae

¹ Körai oechauka cheve yandeYa Tumpa: Oyapo oï tuku, omboɨpɨ ramo okuakuaa taɨkuegua ete temitɨ yave, kuae ko mbaarɨvo mburuvicha guasu peguarä opa oyeapo güire.

² Jare tuku reta opa ma jou ñana reta yave, che jae: —¡CheYa Tumpa, neɨ̈ro oreve añave! ¿Kia pa omborɨta Jacob iñemuña reta? Echa michi yae ko.

³ Jayave yandeYa oipoepɨ iyemongeta jókuae regua, jare jei: —¡Mbaetɨta jökorai!

⁴ YandeYa Tumpa oechauka cheve körai: YandeYa Tumpa oporoenɨi oporojäa vaerä tata rupi; jókuae tata opa omondɨpa ɨguasu jare jeta ñana opa oapɨ.

⁵ Jayave jae: —¡CheYa Tumpa, joko peño mo! ¿Kia pa omborɨta Jacob iñemuña reta? Echa michi yae ko.

⁶ Jayave yandeYa oipoepɨ iyemongeta jókuae regua, jare jei: —¡Mbaetɨta vi kuae jökorai!

⁷ Kuae vi oechauka ye cheve yandeYa: YandeYa oï metei tëta guasu ikësea sɨmbi plomada pe oyeapo vae re, jare güɨnoi ipo pe metei plomada o iyapoa imbae.

⁸ Jayave yandeYa oparandu cheve: —¿Mbae pa reecha reï? Che jae chupe: —¡O iyapoa iplomada! Jare yandeYa jei: —Ko añonota plomada o iyapoa imbae, ajäa vaerä tëta chembae vae Israel iñemuña reta. Mbaetɨ yeta ma aropɨa chupe reta.

⁹ Isaac iñemuña reta imbaemboetea ɨvɨtɨ regua reta opata oyemboai, jare Israel imbaemboetea reta opata oyemboai. ¡Ambouta ñeraro Jeroboam iñemuña reta kotɨ!

Amós jare Amasías

¹⁰ Jayave sacerdote Amasías Bet-el pegua omondo jeiuka Jeroboam mburuvicha guasu Israel pegua pe: “Amós oñemopüa ndekotɨ kuae tëta Israel pe; jare kuae tëta mbaetɨ ma ipuere güɨropɨa opaete iñee reta.

¹¹ Echa Amós jei: ‘Jeroboam omanota kɨsepuku pe, jare Israel pegua reta oyererajaukata tembipɨɨrä kuae ɨvɨ güi.’ ”

¹² Javoi Amasías jei Amós pe: —¡Mbae re oecha voi vae, ekua kuae güi! Ekua ɨvɨ Judá kotɨ, joko pe emongana nderembíu, joko pe emombeu Tumpa iñee;

¹³ ërei agüɨye ye mo emombeu Tumpa iñee kuae Bet-el pe, echa tëta mburuvicha guasu ombaemboete pɨpe vae ko, echa kuae tëta güi ko mburuvicha guasu reta oporookuai.

¹⁴ Ërei Amós jei chupe: —Mbaetɨ ko che ñeemombeúa, ani ñeemombeúa iñemuña ave yepe. Che ko jae güeye re oyangareko vae, jare ɨva ñana rupigua oipoo vae.

¹⁵ Ërei yandeYa ko chereenɨi mɨmba reta jaɨkue aguata vae güi, jare jei cheve: “Ekua jare emombeu cheñee Israel pe, tëta chembae vae.”

¹⁶ Eendu mo yandeYa iñee. Ërei nde rere añave: “Agüɨye emombeu Tumpa iñee jei Israel kotɨ vae re, jare agüɨye emoë neñee Isaac iñemuña reta kotɨ.”

¹⁷ Jáeramo körai jei yandeYa: “Nderembireko oikota aguasa rupi kuae tëta guasu pe, nderaɨ reta jare nderayɨ reta omanota kɨsepuku pe, jare pe reta jare opaete Israel oyererajaukata tembipɨɨrä matɨ kuae peɨvɨ güi.”