AMÓS 5 - Biblia Guarani Tumpa Iñee

Yepoepɨ teko kavimbae güi Tumpa kotɨ

¹ Israel iñemuña reta; peendu kuae ñee mbɨatɨtɨ pegua amondo pekotɨ vae.

² Israel tëta ikavigüe oa, ngaraa ye ma opüa; ogüɨapi jare mbaetɨ kia omopüa vaerä.

³ Echa körai jei yandeYa Tumpa Israel iñemuña reta pe: “Metei tëta guasu güi ojo yave mil sundaro ñeraroa pe, cienño oyerova yeta; ojo yave cien, payandepoño oyerova yeta.”

⁴ YandeYa jei Israel iñemuña reta pe: “Peyu chekotɨ jare peikoveta.

⁵ Agüɨye pekua Bet-el kotɨ ani Gilgal kotɨ, agüɨye pekua Beerseba kotɨ, echa Gilgal oyererajaukata ɨvɨ ambuae pe tembipɨɨrä jare Bet-el opata oyemboai.”

⁶ Peyu yandeYa kotɨ jare peikoveta; agüɨye vaerä ou tata rami José iñemuña reta kotɨ, jare opa pemboai, jare mbaetɨta Bet-el pe kia ipuere ombogüe.

⁷ ¡Pe reta perokomegua jupi vae, jare jupi vae pemombo ko ɨvɨ re!

^8-9 Peeka yasɨtata yatɨ yatɨ Pléyades jare Orión jee vae iyapoa, jae ko oyapo ara jare pɨ̈tu; jae ko oenɨi ɨ ɨguasu güi, jare opɨyere ɨvɨ iárambo; jae omee mɨ̈rata ipɨ̈rata vae güi omaepɨ̈ro vae pe, jare ombou omaepɨ̈ro vae tëta ipɨ̈rata yae vae re. Jae ko jee yandeYa.

¹⁰ ¡Pe reta pemotareɨ öke pe oepɨ teko jupi vae, jare peröɨro sɨmbi rupi imiari vae!

¹¹ Peyuvanga paravete vae re jare pekovara chupe trigo güɨnoi vae re, peyapo perorä ita oñeopagüe katuai vae jeko pegua, mbaetɨta peiko pɨpe; peuvarupa kavi peñotɨ vae güi mbaetɨta peu vino.

¹² Echa che aikuaa ko pepɨapochɨ yae vae, jare jeta peyoa reta vae; aikuaa ko peiporarauka jupi vae pe vae, jare peipɨɨ mbae oyemboepɨ vɨari vae, jare ñejäa renda pe paravete vae reta pemoamɨriuka.

¹³ Jáeramo, yarakuaa katu vae, jökorai yave kïriiño, echa ara mbaetɨ ikavi.

¹⁴ Peeka ikavi vae peikove vaerä, agüɨye peeka ikavimbae, echa jayave yandeYa Tumpa Imbaepuere yae ete vae oïta pe ndive, pe pere rami.

¹⁵ ¡Pemotareɨ ikavimbae! ¡Jare peaɨu ikavi vae! Ñejäa pe toime jupi vae; güɨramoi jayave yandeYa Tumpa Imbaepuere yae ete vae iñɨ̈rota José iñemuñagüe reta pe.

¹⁶ Jáeramo, körai jei yandeYa Tumpa Imbaepuere yae ete vae: “Tëta ñavo oka guasu pe oimeta yaeo, jare oka ñavo rupi jäseta mbae jasɨ güi. Jare ko pe oparavɨkɨ vae reta peenɨita oyaeo, jare yaeo regua reta peenɨita oyaeo vaerä.

¹⁷ Jare opaete uvarupa rupi oimeta yaeo, ayu ponupa yave.” Jei yandeYa.

¹⁸ ¡Paravete, jókuae yandeYa iporojäa iara oäro vae reta! ¿Maera pa peipota jókuae ara? Yavaete yaeta ko, mbaetɨta ko ikavi.

¹⁹ Yaguapope güi otekuarai vae ojo oñoövaiti oso ndive ramita ko; ani o pe oike vae opoko ovapetea re yave mboi oichuu vae ramita ko.

²⁰ YandeYa iporojäa iara outa vae ikavimbae yae ko; yavaete yae ko, ngaraa ko ikavi.

²¹ Amotareɨ jare chemboyuguaru ko opaete peporomboete pemopöra yae peyapo vae; jare mbaetɨ chepɨakatu peyemboatɨ guasu reta re.

²² Mbaetɨ aipota mɨmba oyeyukagüe opaetei oyeapɨ vae pemee tëi cheve vae, jare mbota reta temitɨ jäɨgüe; ngaraa aipɨɨ pegüi perɨmba pemongɨragüe ave mbota yembopɨakatu peguarä pemee tëi yave.

²³ ¡Pembosɨrɨ chegüi petairari reta! ¡Ngaraa etei aendu peve peremimbɨ reta iñee!

²⁴ Ërei mbaejupi tosɨrɨ ɨ rami, jare mboromboete ɨ tɨpambae rami.

²⁵ “Pe Israel iñemuña reta, ¿perökuavee pa cheve ñuu pe mɨmba oyeyukagüe reta jare mbota reta jókuae cuarenta año rupi?

²⁶ Jaeño perajase petumpa-raanga reta Moloc jare Quiún jo, jókuae petumpa-raanga reta iä peyapo peyeupe vae.

²⁷ Jáeramo, mombɨrɨ pogüɨrajaukata, Damasco güi kutɨ ye.” Jei yandeYa, jae ko jee Tumpa Imbaepuere yae ete vae.