AMÓS 4 - Biblia Guarani Tumpa Iñee

¹ Peendu kuae ñee, guaka reta Basán pegua, Samaria iɨvɨtɨ re peiko vae, peyuvanga paravete vae reta re vae; peme reta pe pere: “Peru vino rou vaerä.”

² YandeYa Tumpa jei jee ikɨambae re, körai: “Mase, outa oväe ara reta, pereraja reta vaerä tɨ̈ai pe, jare peñemuña reta oipɨɨ retata pinda pe.

³ Peyoaɨkue yoaɨkueta peë ovapetea oyekagüe rupi, jare opata perenoe pemombo mburuvicha guasu jo kavi güi ɨvɨtɨ Hermón kotɨ.” Jei yandeYa.

Israel oñenupa reve mbaetɨ oendu

⁴ “Pekua Bet-el pe peyoa peikuaa reve, pemoïru pepɨapochɨ Gilgal pe, peru ndeimbove yave mɨmba oyeyukata vae, jare pediezmo mboapɨ ara ñavo.

⁵ Jare pemee mɨmba oyeyukagüe mbaemboete pegua, mbɨyape oyembovugüe ndive, jare pemoërakua oipota rupi mbota pepɨa-kɨ̈reɨ ngatu reve pemee vae, echa jókuae ko pemomora pe Israel iñemuña reta.” Jei yandeYa Tumpa.

⁶ “Che ko mbaetɨ amee peve tembíu opaete perëta guasu ñavo, jare mbaetɨ tembíu opaete perëta ñavo rupi; ¡ërei mbaetɨ peyerova chekotɨ!” Jei yandeYa.

⁷ “Jare amombɨta vi ama pegüi mboapɨ yasɨ ndei mbaarɨvo mbove; amongɨ metei tëta guasu reño, ïru tëta guasu re mbaetɨ amongɨ; amogüe kó re okɨ, ïru kó re mbaetɨ okɨ vae opa ipiru;

⁸ jare mókoi ani mboapɨ tëta ipo reta yogüɨraja tëi oeka ɨ ïru tëta pe, ërei mbaetɨ jeta oväe reta chupe omboasa vaerä iɨuve, ¡jeseve mbaetɨ peyerova ye chekotɨ!” Jei yandeYa.

⁹ “Ambou peve ɨvɨtuakuvo jare taso, tuku opa jou pegüi peko raɨ reta ipo, jare peuva reta, ɨva reta jare olivo reta, ¡ërei mbaetɨi peyerova ye chekotɨ!” Jei yandeYa.

¹⁰ “Ambou peve mbaesusere reta yavaetegüe Egipto pe rami; ayukauka petaɨrusu reta kɨsepuku pe, jare perovaicho opa opɨ̈ro pekavayu reta pegüi; peïru reta ñeraro pe omanogüe iine aëtuuka tëi peve, ¡ërei mbaetɨ peyerova ye chekotɨ!” Jei yandeYa.

¹¹ “Pomokañɨtei, Sodoma jare Gomorra opa amboai rami; tatasɨgüe tata güi oñerenoegüe rami peasayepe, ¡ërei mbaetɨ peyerova ye chekotɨ!” Jei yandeYa.

¹² “Jáeramo, jökorai ñotai ko poapo, pe Israel iñemuña reta; ¡jayave, peyupavo peñoövaiti vaerä peTumpa ndive!”

¹³ Echa, ko oï ɨvɨtɨ reta iyapoa, kuimbae reta pe omombeu iyemongeta vae, pɨtumimbi oyapo tembiperä vae, ɨvɨtɨ guasu rupi oguata vae, jae ko jee yandeYa Tumpa Imbaepuere yae ete vae.