AMÓS 3 - Biblia Guarani Tumpa Iñee

Ñeemombeúa omoërakua vae

¹ Israel iñemuña reta, peendu kuae ñee yandeYa jei pekotɨ vae, ɨvɨ Egipto güi güɨnoegüe reta kotɨ, jei körai:

² “Pe retaño poparavo opaete ɨvɨ pegua reta ipɨte güi, jáeramo, aiporaraukata peve opaete peyoa reta re.”

³ ¿Oguata päveta pa mókoi kuimbae reta, mbaetɨ reve yogüɨreko kavi?

⁴ ¿Yaguapope oñeeta pa kaa tëɨ vae rupi, mbaetɨ reve jembia? ¿Yaguapope raɨ oñeeta pa, mbaetɨ reve oï jembia ndive ikua pe?

⁵ ¿Güɨra oata pa ñuai pe, mbaetɨ reve ipïaroa oñono ñuai? ¿Ñuai ovɨita pa, mbaetɨ reve mbae oa pɨpe?

⁶ ¿Mimbɨguasu oñemoñee tëta guasu pe yave, ngaraa pa oiämondo tëta guasu ipo reta? ¿Oimeta pa tëta guasu pe mbaesusere, yandeYa omboumbae reve?

⁷ Echa ngaraa etei yandeYa Tumpa oyapo mbaesusere, omombeumbae reve jembiokuai ñeemombeúa reta pe.

⁸ Yaguapope oñee yave, ¿kia pa mbaetɨta okɨɨye? YandeYa Tumpa omoë iñee yave, ¿kia pa mbaetɨta imiari jese?

Samaria ikañɨtei

⁹ Pemoërakua mburuvicha guasu jo kavi reta pe, tëta Asdod pe, jare mburuvicha guasu jo kavi reta pe, ɨvɨ Egipto pe, körai: “Peyu peyemboatɨ Samaria iɨvɨtɨ re; jare pemae teko kavimbae oyeapo pɨpe vae re jare tekorai jeta pɨpe vae re.”

¹⁰ YandeYa jei: “Jae reta mbaetɨ oikuaa oyapo jupi vae; oñovatu reta jo kavi reta pe oñomigüe jare opɨ̈rogüe.”

¹¹ Jáeramo, yandeYa Tumpa jei körai: “Outa tovaicho neova, opata oitɨ nekësea reta, jare mburuvicha guasu jo kavi reta güi opata mbae güɨnoe.”

¹² YandeYa jei körai: “Mɨmba iyangarekoa opɨ̈ro yaguapope iyuru güi jɨmba ipɨgüe ani inambi iyapɨgüe, jökoraita otekuarai Israel iñemuña reta, Samaria pe oguapɨ vae reta, tupa kavi Damascoɨgua re oke vae reta.”

¹³ YandeYa Tumpa Imbaepuere yae ete vae jei: “Peendu jare pemiari Jacob iñemuña reta kotɨ,

¹⁴ jókuae ara che aitɨta chearasɨ Israel pe ipɨapochɨ vae reta re yave, Bet-el pe mɨmba oyeyuka oyeapɨ jese vae re aitɨta chearasɨ, opata oñemopë mɨmba oyeyuka oyeapɨ jese vae regua guakarätiecha oï vae reta, opata oa ɨvɨ re.

¹⁵ Opata amboai o kavi reta iroɨ pegua, jare o kavi araku pegua; o reta oñemopöra kavi elefante jäimbukugüe pe vae opata amokañɨtei; opata oyemboai opaete joko pe o kavi reta.” Jei yandeYa.