AMÓS 2 - Biblia Guarani Tumpa Iñee

¹ YandeYa jei körai: “Ɨvɨ Moab pegua reta iyoa yae jeko pegua, mbaetɨta cheɨ̈ro chupe reta; echa oapɨ reta mburuvicha guasu Edom pegua ikägüegüe, opaetei regua ombotanimbu.

² Jáeramo ɨvɨ Moab re amoendɨta tata, jare jókuae tata opata oapɨ mburuvicha guasu jo kavi reta tëta Queriot pe; jare ɨvɨ Moab pegua reta omanota jäsémbai reve, mimbɨguasu ñeraro pegua oñee vae iyavei.

³ ¡Amboaita mburuvicha guasu, kuimbae reta ipɨte güi; ayukata jae ndive opaete imborɨa reta!” Jei yandeYa.

⁴ YandeYa jei körai: “Judá pegua reta iyoa yae jeko pegua, mbaetɨta cheɨ̈ro chupe reta; echa güɨröɨro reta mborookuai amee vae jare mbaetɨ oyapo reta, echa itumpa-raanga reta opa omombia reta, jókuae iñemuñagüe reta omboetese vae.

⁵ Jáeramo Judá re amoendɨta tata, jare jókuae tata opata oapɨ mburuvicha guasu jo kavi reta Jerusalén pe.”

YandeYa iporojäa Israel kotɨ

⁶ YandeYa jei körai: “Israel iñemuña reta iyoa yae jeko pegua, mbaetɨta cheɨ̈ro chupe reta; echa jupi vae omee reta korepoti re, jare paravete vae omee reta pɨapaa re.

⁷ Oyuvanga reta ipuerembae vae reta re, jare paravete vae reta güi güɨrova reta teko; metei kuimbae taɨ ndive güɨreko päve metei kuñatai, omongɨa reta cheree ikɨambae.

⁸ Temimonde oyeeya mbae jepɨrä vae re oyapakua reta oipotagüe mɨmba oyeyuka oyeapɨ jese vae iyɨpɨ pe; jare itumpa reta jo pe jou reta vino, ombaemboepɨ jupimbae reve vae reta omeegüe.

⁹ Che ko opa amboai peve amorreo reta, jae reta ko pukugüe tëi ɨ̈vɨrare rami, jare täta ɨvɨra encina rami; opaetei ko amboai.

¹⁰ Che ko pogüɨnoe ɨvɨ Egipto güi, jare pogüɨroata ñuu rupi cuarenta año, peike vaerä pepɨ̈ro peyeupe amorreo reta iɨvɨ.

¹¹ Jare peraɨ reta güi amopüa ñeemombeuarä, jare petaɨrusu reta güi nasareorä. ¿Jökoraiä pa ko, Israel iñemuña reta?” Jei yandeYa.

¹² “Ërei pe reta pemoñera etei pemongau vino pe nasareo reta, jare ñeemombeúa reta pe pere: ‘¡Agüɨye mo pemiari Tumpa iñee re!’

¹³ Mase, opaete mbaembae peyapogüe re poumbirita jókuae peïa pe, metei käretou tɨnɨe trigo pe vae oyeumbiri rami.

¹⁴ Iñäkua yae vae ngaraa ipuere otekuarai; ipɨ̈rata yae vae ngaraa ipɨ̈rata omborɨ, jëia yae vae ave ngaraa ipuere güɨroasayepe jekove.

¹⁵ Kuimbae uvɨ regua ngaraa ipuere, iñäkua osɨi vae ave ngaraa oasayepe, kavayu regua ave ngaraa güɨroasayepe jekove.

¹⁶ Ñeraro pegua reta güi jëia yae vae ave inandiño eteita otekuarai jókuae ara.” Jei yandeYa.