AMÓS 1 - Biblia Guarani Tumpa Iñee

YandeYa iporojäa tëtaguasu reta kotɨ

¹ Kuae jae ko Amós iñee reta. Jae ko Tecoa pegua vecha iyangarekoa reta güi metei, Tumpa güi ou chupe ñee Israel regua vae omoërakua, mókoi año ndei oime mbove ɨvɨkana, Uzías oiko yave mburuvicha guasurä Judá pe, jare Jeroboam oiko yave mburuvicha guasurä Israel pe; Jeroboam ko Joás taɨ.

² Amós jei: YandeYa iñeeäta yave ɨvɨtɨ Sión güi, jae ko Jerusalén, kapii jenda opa ipiru jare ɨvɨtɨ Carmelo jee vae pe ñana opa vi ipiru.

³ YandeYa jei körai: “Damascoɨgua reta jeta yae iyoa jeko pegua, mbaetɨta cheɨ̈ro chupe reta; echa tëta Galaad ipo opa oyuka reta tembiporu jiero pegua pe.

⁴ Jáeramo mburuvicha Hazael jo re amoendɨta tata, jókuae tata opata oapɨ mburuvicha guasu Ben-adad jo kavi reta.

⁵ Amopëta Damasco jöke reta oyeokenda tëi ñogüɨnoi pɨpe vae; amboaita tëta ɨvɨtɨ päu Avén pe yogüɨreko vae reta, jare Bet-edén pegua mburuvicha reta; jare tëtaguasu Siria pegua reta opata oyereraja tembipɨɨrä tëta Kir pe.” Jei yandeYa.

⁶ YandeYa jei körai: “Gaza pegua reta iyoa yae jeko pegua, mbaetɨta cheɨ̈ro chupe reta, echa opaetei oipɨɨ reta güɨraja metei tëta ipo omee vaerä Edom pegua reta pe tembiokuairä.

⁷ Jáeramo Gaza ikësea re amoendɨta tata jare jókuae tata opata oapɨ mburuvicha guasu jo kavi reta.

⁸ Opata amokañɨtei tëta Asdod pegua reta jare mburuvicha reta Ascalón pegua. ¡Aitɨta vi chepo Ecrón pegua reta re; opaeteita filisteo reta jembɨregüe ave omano!” Jei yandeYa.

⁹ YandeYa jei körai: “Tiro pegua reta iyoa yae jeko pegua, mbaetɨta cheɨ̈ro chupe reta; echa ïru tëta ndive oyapo reta tëi yemongeta kavi reve opa oipɨɨ reta güɨraja omee Edom pegua reta pe, mbaetɨ imaendúa reta jókuae morogüɨrökuavee päve oyapogüe re.

¹⁰ Jáeramo Tiro ikësea re amoendɨta tata, jare jókuae tata opata oapɨ mburuvicha guasu jo kavi reta.”

¹¹ YandeYa jei körai: “Edom iñemuña reta iyoa yae jeko pegua, mbaetɨta cheɨ̈ro chupe reta; echa kɨsepuku pe omoña reta jëtara Israel iñemuña reta, ombosɨrɨ reta iyeugüi mboroparareko; iyarasɨ katu avei ikotɨ jare omotareɨ katu avei jeko pegua.

¹² Jáeramo tëta Temán re amoendɨta tata, jare jókuae tata opata oapɨ mburuvicha guasu jo kavi reta tëta Bosra pe.”

¹³ YandeYa jei körai: “Amón iñemuña reta iyoa yae jeko pegua, mbaetɨta cheɨ̈ro chupe reta; echa oipota reta iɨvɨ ombotuicha jeko pegua, opa oipeka kuña Galaad pegua ipurúa vae reta jɨe.

¹⁴ Jáeramo tëta Rabá ikësea re amoendɨta tata, jare jókuae opata oapɨ mburuvicha guasu jo kavi reta, jɨapu reve, ñeraro iara pe jare mbaesusere iara pe.

¹⁵ Jare juvicha guasu ojota tembipɨɨrä opaete imborɨa reta ndive.” Jei yandeYa.