2 Timoteo 4 - Biblia Guarani Tumpa Iñee

Emoërakua ñee ikavi vae

¹ Jáeramo, royókuai Tumpa jare yandeYa Jesucristo jovake, echa jae ojäata oikove vae reta jare omanogüe vae reta, ou ye yave oporookuai vaerä,

² emoërakua avei Tumpa iñee jare eñemoäta ngatu avei, eikuaauka kavi iyoa vae pe iyoa, jare emboeta chupe jese, eporomboarakuaa jare eporomboe ndepɨaguasu reve.

³ Echa outa ara reta oväe ñäteɨ vaerä ɨvɨ pegua reta oipota oyeapɨsaka mboromboe añete vae re, ërei oeka retata oyeapɨsaka vaerä jemimbota reño oporomboe vae reta re.

⁴ Jare ngaraa oipota oyeapɨsaka añete vae re. Ërei oipotata oyeapɨsaka arakae ndaye reta re.

⁵ Ërei nde agüɨye etei ere ereiño, eropɨa tembiporara reta, eyapo ñee ikavi vae imoërakuaa iparavɨkɨ. Eyapo ndeparavɨkɨ.

⁶ Echa che amanota ma, chemano iara köi yae ma.

⁷ Opa amboapɨ ñoraro, amboapɨ ñoñókuai, mbaetɨ aeya cheporogüɨrovia.

⁸ Jare añave oñeovatu ma oï cheve metei äka-regua jupi vae pegua. YandeYa oporojäa vae jupi vae, omeeta cheve metei äka-regua jókuae ara; ërei mbaetɨ cheveño, omeeta vi opaete oaɨu iväea iara vae reta pe.

Pablo oyókuai Timoteo mbae oyapo vaerä vae

⁹ Ɨmambaeño eeka kërai reyu vaerä remae cheré,

¹⁰ echa Demas chereeya ma ojo Tesalónica kotɨ, oaɨu ramo mbaembae kuae ɨvɨ pegua. Crescente ojo Galacia kotɨ, jare Tito ojo Dalmacia kotɨ.

¹¹ Jaeño Lucas opɨta che ndive. Eeka eru Marcos nderupíe. Echa jae ikavita chemborɨ vaerä Tumpa iparavɨkɨ pe.

¹² Tíquico amondo Efeso pe.

¹³ Reyu yave eru cheve chekapote, aeya Troas pe Carpo jo pe vae. Eru tembikuatía reta jare tupapire oyepomombɨ vae reta.

¹⁴ Alejandro jiero pegua mbaravɨkɨ iyapoa, oyapo jeta ikavimbae vae cheve. YandeYa tomboepɨ chupe oyapogüe oï rupi.

¹⁵ Nde vi eñemoata chugüi, echa jae oyovaicho yae yande ndive, ñamoërakua vae re.

¹⁶ Tenonde oñeapo reta cheré yave, mbaetɨ etei chemborɨ kia ave, opaetei chereeya vae; agüɨye Tumpa tomboeko reta jese.

¹⁷ Ërei yandeYa oï che ndive jae chemomɨ̈rata, che amoërakua vaerä ñee ikavi vae, opaete judiombae vae reta oendu vaerä, jökorai aasayepe vaerä yaguapope iyuru güi.

¹⁸ Jare yandeYa chereepɨta opaete ikavimbae vae güi, jare cheövatuta ara pegua iporookuaía peguarä. Jae toyemboeteuka jekuaekuae avei rupi. ¡Amén!

Tamaraeme reta

¹⁹ Tamaraeme toñogüɨnoi Prisca jare Aquila, jare Onesíforo jo pegua reta.

²⁰ Erasto opɨta Corinto pe. Ërei imbaerasɨ aeya Trófimo Mileto pe.

²¹ Eeka kërai reyu vaerä ndei iroɨ guasu iara oväe mbove. Eubulo, jare Pudente, jare Lino, jare Claudia, jare opaete ïru oporogüɨrovia vae reta omondo peve tamaraeme.

²² YandeYa Jesucristo toï nde ndive. Tumpa ipɨakavi toï pe ndive. ¡Amén!