2 Timoteo 3 - Biblia Guarani Tumpa Iñee

Ara taɨkuegua reta pe këraita kuimbae reta jeko vae

¹ Aipota vi reikuaa kavi kuae: Ara taɨkuegua reta pe, mbaetɨ eteita ikavi teko reta.

² Echa oimeta jaeiño oyeaɨu vae reta, ikorepoti potarai vae reta, oyembotuicha vae reta, ipɨarai vae reta, jei ikavimbae Tumpa kotɨ vae reta, iñeereendúä tu reta kotɨ vae, omeembae yasoropai vae reta, jupimbae vae reta,

³ iporoaɨumbae vae, ipɨa pïrimbae yae vae, oporoangao vae reta, oyopiambae jete jemimbota vae reta, ipo pïrimbae vae, ikavi vae imotareɨa reta,

⁴ ombotavɨ japicha reta, oyapota mbaembae ipɨa pe oyemongetambae reve vae, ipɨaño omboete vae reta, ipɨa jemimbotaño oaɨu reta Tumpa güi vae,

⁵ jupi vae rami yogüɨrekota, ërei ngaraa etei oyekuaa jese jupi vae, agüɨye eñemoïru jókuae nunga reta ndive.

⁶ Jókuae nunga reta ko oike o reta rupi jare ombotavɨ kuña reta iyoa yae vae, oyererajauka oipotagüe ipɨa jemimbota pe,

⁷ oyemboe avei opaño mbaembae re, ërei ngaraa etei ipuere oikuaa añete vae.

⁸ Imbaekuaa vae Janes jare Jambres oyovaicho Moisés ndive rami, jökorai vi kuae kuimbae reta oyovaicho añete vae ndive, pɨ̈chɨi vae reño oyemongeta reta, iporogüɨrovia opa omokañɨ vae reta.

⁹ Ërei ngaraa ipuere jekuaeño oporombotavɨ reta. Echa oyekuaata opaete vae pe kërai jae reta iyarakuaambae vae ko, Janes jare Jambres reta rami.

Tembiporara reta mborogüɨrovia re

¹⁰ Ërei nde reikuaa katu ko cheporomboe, chereko, cheyemongeta, cheporogüɨrovia, che aropɨa vae, cheporoaɨu, chepɨaguasu;

¹¹ reikuaa kërai aiporara ïru reta oyapo ikavimbae cheve vae Antioquía pe, Iconio jare Listra pe. Ërei yandeYa chereepɨ opaete aiporara vae güi.

¹² Jare opaete Cristo Jesús re oipota oiko jupi rupi vae oiporara yaeta ko;

¹³ ërei ikavimbae vae iyapoa reta jare oporombotavɨ vae reta, jeieteta ikavimbae oyapo. Jae reta oporombotavɨta jare oyembotavɨukata vi.

¹⁴ Ërei nde jekuaeño nepɨ̈rata reyemboe jese jare reikuaa kavi vae re, reikuaa katu reve kia ko ndemboe jese vae;

¹⁵ jare kërai nemichi güive reikuaa Tumpa Iñee re. Jókuae reta ndemboarakuaata yemboasa re, mborogüɨrovia Cristo Jesús rupi.

¹⁶ Opaete Tumpa Iñee oyekuatía oï vae Tumpa ko omombeu, jare ikavi ko yandeve yaporomboe vaerä, yamboeta vaerä, yaporombosɨmbi vaerä, yaporomboe vaerä jupi vae re,

¹⁷ jökorai Tumpa jembiokuai reta, oikuaa kavi vaerä opaete Tumpa jemimbota re, jare ipuere oyapo opaete mbae ikavi vae.