2 Tesalonicenses 3 - Biblia Guarani Tumpa Iñee

Tumpa iñee toyemboete

¹ Jare añave cherɨvɨ reta, peyerure oreré, yandeYa iñee oñemoai vaerä jare oyemboete vaerä, pepɨte rupi oasa rami.

² Peyerure vi yandeYa orereepɨ vaerä kuimbae jeko ikavimbae vae reta güi; echa opaete reveä oporogüɨrovia vae.

³ Echa yandeYa iñee ombopo avei vae ko, pemomɨ̈ratata jare peövatuta ikavimbae vae güi.

⁴ Jare ore pogüɨrovia katu yandeYa re perovia ramo, kërai peyapo peï jare peyapota ore poyókuai vae.

⁵ YandeYa tapemborɨ peporoaɨu vaerä Tumpa rami, jare pepɨaguasu vaerä Cristo ipɨaguasu rami.

Yaparavɨkɨ vaerä

⁶ Cherɨvɨ reta, añave poyókuai yandeYa Jesucristo jee re, peyembosɨrɨ vaerä oipotagüe oporogüɨrovia vae oikoiño vae güi, jókuae mbaetɨ oipota oiko mboromboe roikuaauka peve vae re vae.

⁷ Pe reta etei peikuaa ikavi ko kërai peiko vaerä ore rami. Echa ore roiko pepɨte pe yave, mbaetɨ ko roikoiño,

⁸ mbaetɨ vi rokaruiño, romboepɨmbae reve, jaeño täta roparavɨkɨ jare royemoambeko ara rupi jare pɨ̈tu rupi, agüɨye vaerä pomoambeko mbae re.

⁹ Körai royapo, yepe tëi jupi ko roiporu vaerä mbaembae peve. Ërei orekɨ̈reɨ roechauka peve, pe reta vi peiko vaerä ore rami.

¹⁰ Echa roiko pépɨri yave, poyókuai körai: Kia nunga vae ñäteɨ oparavɨkɨ yave, agüɨye vi tokaru.

¹¹ Echa jërakua oreve kërai oime pepɨte pe amogüe oikoiño vae, mbaetɨ etei mbae pe ave oparavɨkɨ vae, oyemoinge opaño mbae pe.

¹² Royókuai jare romboarakuaa jókuae nunga reta yandeYa Jesucristo jee re oparavɨkɨ reta vaerä iyeupe, jembíu ae jou reta vaerä.

¹³ Ërei pe cherɨvɨ reta, agüɨye pekuérai peyapo ikavi vae.

¹⁴ Jare kia nunga vae mbaetɨ oyapo kuae roikuatía vae pe jei vae yave, pemae kavi jese, agüɨye peñemoïru jae ndive, imara vaerä.

¹⁵ Ërei agüɨye peyovaicho jese. Ërei pemboarakuaa metei perɨvɨ pemboarakuaa rami.

Tamaraeme reta

¹⁶ Jare yandeYa oporombopɨakatu vae temee avei peve mbɨakatu. YandeYa toï opaete pe ndive.

¹⁷ Che etei amondo peve tamaraeme, aikuatía chepo pe etei. Jökorai ayapo opaete aikuatía vae pe, aechauka vaerä añetete ko. Körai aikuatía.

¹⁸ YandeYa Jesucristo ipɨakavi toï opaete pe reta ndive. ¡Amén!