2 Tesalonicenses 2 - Biblia Guarani Tumpa Iñee

Kuimbae mbaeyoa pegua oyekuaata vae regua

¹ Añave cherɨvɨ reta, yandeYa Jesucristo ou yeta vae regua jare jae ndive ñañoövaiti vae regua. Pomoñera cherɨvɨ reta,

² agüɨye peyembotavɨuka jare peyembojopauka, oecha rami oyeapo vae reta pe, ani ñee rupi, ani tupapire ore romondogüe rami vae rupi, jei reta yandeYa iara oyearo ma.

³ Ërei agüɨye pemaeño kia re kërai ave yepe tapembotavɨ. Echa jókuae ara, ngaraa ou ndei ou mbove yembopɨapochɨ Tumpa kotɨ vae iara, jare kuimbae mbaeyoa pegua oyekuaata vae, okañɨteita vae.

⁴ Jae oñemopüata Tumpa kotɨ jare opaete mbaemboete oñemee chupe vae reta kotɨ, jare jae etei oguapɨta tupao pe jare jeita iyeupe: “Che Tumpa ko.”

⁵ ¿Mbaetɨ pa pemaendúa, che aï pe ndive yave, kuae jae vae?

⁶ Jare añave pe reta peikuaa, oime ko kia mbaetɨ omaeño jese vae, oyekuaa vaerä iara pe kavi.

⁷ Ërei oime ma oparavɨkɨ oï jókuae ikavimbae yaikuaambae vae, ërei añave oime ko kia mbaetɨ omaeño jese vae; jae oyereraja regua yandepɨte güi.

⁸ Jayave oyekuaata jókuae ikavimbae vae iyapoa. Jókuae yandeYa oyukata ipɨ̈túe pe vae, jare omboaita ko, ou yave jembipeasɨ reve.

⁹ Jókuae ikavimbae iyapoa outa Satanás jembiapo rupi; outa mbaepuere tuichagüe ndive jare mɨakañɨ reta yembotavɨ pegua rupi.

¹⁰ Oyapota oipotagüe mbae ikavimbae, ombotavɨ vaerä okañɨteita vae reta. Echa mbaetɨ omboresive reta mboroaɨu añete pegua, oyemboasauka vaerä.

¹¹ Jáeramo, Tumpa ombou chupe reta mbaepuere mborombotavɨ pegua, güɨrovia reta vaerä apu re;

¹² jökorai opa vaerä okañɨtei opaete mbaetɨ güɨrovia añete vae re ramo, jaeño oyembovɨa reta jupimbae re.

Tumpa yandeparavo yandemboasa vaerä

¹³ Cherɨvɨ reta, yandeYa oaɨu vae reta, ikavi ko jekuaeño romee vaerä yasoropai Tumpa pe peré, echa Tumpa peparavo iyɨpɨ güive pemboasa vaerä, Espíritu Santo peñono tee Tumpa peguarä vae rupi, jare añete vae perovia ramo.

¹⁴ Kuaerä Tumpa peparavo ñee ikavi vae romombeu peve vae rupi, peike vaerä yandeYa Jesucristo iyemboetea pe.

¹⁵ Jáeramo, cherɨvɨ reta, pepɨ̈rata peporogüɨrovia pe. Agüɨye peakañɨ peikuaa vae güi, ore etei pomboe jese vae güi ani tupapire roikuatía peve vae rupi vae güi.

¹⁶ YandeYa Jesucristo etei jare yandeRu Tumpa yanderaɨu vae jare yandembopɨakatu avei vae jare ñaäro yayerovia reve ipɨakavi rupi vae,

¹⁷ jae tapembopɨakatu jare tapemomɨ̈rata opaete ñee ikavi vae pere vaerä, jare ikavi vae peyapo vaerä.