2 SAMUEL 8 - Biblia Guarani Tumpa Iñee

David iporookuaía oyembotuicha vae regua

¹ Kuaekuae jaɨkue rupi David omoamɨri filisteo reta jare yogüɨreko David jeia re, jare opɨ̈ro chugüi reta Meteg-ama.

² Omoamɨri vi Moab pegua reta, jare ojäa tɨmasa pe, omboyapakua reve ɨvɨ re; ojäa mókoi tɨmasa pe omano reta vaerä jare mboapɨa tɨmasa ojäa vae oikoveño reta vaerä. Jökorai Moab pegua reta opa opɨta David jeia re, ombaemboepɨ reta chupe.

³ David omoamɨri vi Hadad-ezer mburuvicha guasu Soba pegua, jae ko Rehob taɨ; Hadad-ezer ojo tëi opɨ̈ro ye iɨvɨ ɨ̈aka Éufrates kotɨ oï vae yave.

⁴ Chugüi reta David oipɨɨ mil seteciento kuimbae kavayu regua, jare veinte mil kuimbae ɨvɨ rupigua; jare opaete kavayu reta käretou ñeraro pegua regua opa oitɨmaka rakɨo, jaeño omoembɨre cien käretou peguarä.

⁵ Jare yogüeru Siriaɨgua Damasco güi omborɨ vaerä Hadad-ezer, mburuvicha guasu Soba pegua; ërei David oyuka Siriaɨgua reta, veintidó mil kuimbae.

⁶ Javoi David oñono isundaro reta Damasco pe Siria pe, jare Siriaɨgua reta opa opɨta David jembiokuairä, ombaemboepɨ reta chupe. YandeYa omee David pe, oporomoamɨri vaerä oipota rupi ojoa rupi.

⁷ David opa opɨ̈ro yeopiaka reta oro pegua, Hadad-ezer isundaro ruvicha reta imbae, jare opa güɨraja Jerusalén pe.

⁸ Jare opɨ̈ro vi jeta jiero iyu vae, tëta Beta jare Berotai pe, kuae tëta reta jae vi ko Hadad-ezer imbae.

⁹ Toi mburuvicha guasu Hamat pegua, oendu David opa omoamɨri Hadad-ezer isundaro reta yave,

¹⁰ omondo taɨ Joram mburuvicha guasu David pɨri, jei vaerä ñee kavi chupe, oñeraro jare omoamɨri Hadad-ezer ramo, echa Toi jovaicho yepe Hadad-ezer; Joram güɨraja mbaembae korepoti pegua, oro pegua jare jiero iyu vae pegua.

¹¹ Jare David omee vi jókuae korepoti jare oro yandeYa peguarä, ïru korepoti jare oro reta ketɨ ketɨ güi, tëtaguasu reta omoamɨrigüe kotɨ güi güeru vae ndive oñemee rami:

¹² Siriaɨgua reta güi, Moab iñemuña reta güi, Amón iñemuña reta güi, filisteo reta güi, Amalec iñemuña reta güi jare mburuvicha guasu Hadad-ezer Soba pegua, jae ko Rehob taɨ güi opa mbaembae opɨ̈rogüe.

¹³ Jökorai David jërakua yae. Oyerova ye omoamɨri güire Siriaɨgua reta yave, omoamɨri dieciocho mil Edom iñemuña reta ɨvɨtɨ päu ipe kavi Yukɨ Renda pe.

¹⁴ Jare David oñono isundaro reta opaete ɨvɨ Edom pe; jare Edom iñemuña reta opa opɨta David jembiokuairä. YandeYa omee David pe, oporomoamɨri vaerä oipota rupi ojoa rupi.

David isundaro ruvicha reta

¹⁵ Jare David oiko mburuvicha guasurä opaete Israel re; jupi rupi jare isɨmbi rupi oyapo mbaembae opaete vae pe.

¹⁶ Joab, Sarvia imembɨraɨe oiko opaete isundaro reta itenondegua eterä jare Josafat, Ahilud taɨ ko mburuvicha guasu pe ombaekuatía vae.

¹⁷ Sadoc, Ahitob taɨ, jare Abimelec, Abiatar taɨ, jae ko sacerdote reta; jare Seraías ko ombaekuatía vae,

¹⁸ jare Benaía, Joiada taɨ oï sundaro cereteo reta jare peleteo reta itenondeguarä; jare David taɨ reta ñogüɨnoi mburuvicharä.