2 SAMUEL 6 - Biblia Guarani Tumpa Iñee

David oipota tëi güɨraja Tumpa ikäjou Jerusalén pe

¹ David omboatɨ ye opaete sundaro jëia vae reta Israel pegua, opaete reve treinta mil,

² jare opa yogüɨraja reta Baala Judá pegua güi; güeru reta vaerä Tumpa ikäjou, echa jókuae käjou iárambo oñeenɨi yandeYa imbaepuere yae ete vae jee pe, joko pe jae oiko araɨgua reta iä ipäu pe.

^3-4 Jare oñono reta Tumpa ikäjou metei käretou ipɨau vae pe, güɨraja Abinadab jo güi, kuae oï ɨvɨtɨ re; Uza jare Ahío, Abinadab taɨ reta oyangareko yogüɨraja yogüɨreko käretou re. Ahío ojo oiko jenonde.

⁵ David jare opaete Israel iñemuña reta yogüɨraja yogüɨreko Tumpa jóvai, güɨropo reve jare ombopu reve arpa, ngitara, angúa raɨ, mimbɨ jare platillo.

⁶ Yogüɨraja ma oväe reta Nacón ombaembopiriría pe yave, Uza ipóyai Tumpa ikäjou kotɨ oyoko vaerä, echa güeye reta ipɨ̈sa yeyuka.

⁷ Jayave yandeYa iyarasɨ Uza kotɨ jókuae oyapo vae re, omano voi Uza jókuae Tumpa ikäjou iyɨpɨ peño.

⁸ Jare David ipɨatɨtɨ, yandeYa ombou mano Uza pe vae re; jare ombojee jókuae omanoa Pérez-uza añave regua.

⁹ Ërei David okɨɨye yandeYa güi jókuae ara, jei: “¿Këraita ra araja cheyeupe yandeYa ikäjou?”

¹⁰ Jare David mbaetɨ oipota güeru iyeupe jëta pe yandeYa ikäjou; jare güɨrajauka Obed-edom Gat pegua jo pe.

¹¹ Jare oiko yandeYa ikäjou Obed-edom Gat pegua jo pe mboapɨ yasɨ; jare yandeYa iporerekua Obed-edom re jare opaete jo pegua reta re.

David güɨroyakavo Tumpa ikäjou Jerusalén pe

¹² Omoërakua reta David pe, kërai yandeYa iporerekua Obed-edom re jare opaete imbaembae re, Tumpa ikäjou jeko pegua. Jayave David ojo güɨroyakavo oyerovia reve jókuae Tumpa ikäjou Obed-edom jo güi, jare güɨraja jae Jëta guasu pe.

¹³ Jare jókuae Tumpa ikäjou jerajaa reta omboɨpɨ mi ramo oguata reta yave, ova ramo ipɨ güɨrosɨrɨ reta yave, David oyuka omee Tumpa pe metei güeye jare metei vecha kuimbae oyemongɨragüe.

¹⁴ David omonde güɨreko metei temimonde iyɨvambae sacerdote pegua pe lino pegua, jare güɨropo tätagüe yandeYa jóvai,

¹⁵ jökorai David jare opaete Israel iñemuña reta güɨraja Tumpa ikäjou yerovia ndive jare mimbɨguasu oñemoñee reve.

¹⁶ Jare Tumpa ikäjou ojo ma oväe David jëta pe yave, jembireko Mical, Saúl tayɨ oecha ventana rupi David güɨropo yandeYa jóvai; Mical güɨröɨro ipɨa pe omae jese.

¹⁷ Jare güɨroike reta Tumpa ikäjou metei o guakapi pegua David oyapo chupeguarä vae pe. Jupiveiño David omee yandeYa pe mɨmba oyeyukagüe opaetei oyeapɨ vae jare mbota yembopɨakatu pegua.

¹⁸ Jare opa ma omee mɨmba oyeyukagüe opaetei oyeapɨ vae jare mbota yembopɨakatu pegua yave, oyerure opaete vae re yandeYa imbaepuere yae ete vae jee re.

¹⁹ Jare omee opaete vae Israel iñemuña reta pe, kuimbae ani kuña pe yepe metei mbɨyape, soo peraso jare metei ipe uva oñemotinigüe. Javoi opa ye yogüɨraja opaete vae jo ñavo kotɨ.

²⁰ Jare David ojo ye vi jo kotɨ oyerure vaerä jo pegua reta re, ërei jembireko Mical, Saúl tayɨ oë oövaiti jei reve chupe: —¡Ikavi yae oyekuaa Israel juvicha guasu, opɨrae ramboeve imborɨa reta jembiokuai kuña reta jovake, oipotagüe kia nunga vae oyapo rami reyapo!

²¹ Jayave David jei chupe: —YandeYa jóvai ko apɨrae, jae ko cheparavo nderu güi jare ndero pegua reta güi aiko vaerä mburuvicharä Israel pe, tëta yandeYa imbae vae reta re. Jáeramo, apɨrae ñotai ko jae jóvai.

²² Jare añemopɨ̈chɨi ye ñotai nderesa róvai, ërei tembiokuai kuña reta chemboeteta ko.

²³ Jare Mical, Saúl tayɨ mbaetɨi imembɨ omano regua.