2 SAMUEL 5 - Biblia Guarani Tumpa Iñee

David oguapɨ mburuvicha guasurä Israel iñemuña reta pe

¹ Yogüeru opaete Israel iñemuña reta David pɨri, Hebrón pe, jare omomiari reta körai: “Mase, ore nerëtara ete ko, metei tugüɨ vae.

² Jare tenonde voi ma ko, Saúl oikose oreruvicha guasurä yave, nde ko rerajase Israel iñemuña reta ñeraroa pe jare reroyerova ye yepi. Jare yandeYa jei yoapɨ ndeve: ‘Nde reyangarekota tëta chembae vae Israel re, jare nde reikota Israel pe mburuvicharä.’ ”

³ Yogüeru opaete Israel iñemuña itenondegua reta mburuvicha guasu David pɨri Hebrón pe, jare mburuvicha guasu David oyapo morogüɨrökuavee päve jae reta ndive joko pe yandeYa jóvai; jare omboguapɨ reta David mburuvicha guasurä Israel iñemuña reta pe.

⁴ David güɨnoi treinta año omboɨpɨ oiko mburuvicha guasurä yave, cuarenta año rupi oiko mburuvicha guasurä.

⁵ Hebrón pe oiko mburuvicha guasurä chiu año jare ova yasɨ ɨvɨ Judá re; Jerusalén pe oiko mburuvicha guasurä treinta y tres año, opaete Israel iñemuña reta re: Ɨvɨ Israel pe jare ɨvɨ Judá pe.

David opɨ̈ro tëta Jerusalén

⁶ Jayave David ojo isundaro reta ndive Jerusalén kotɨ, oporepeña jebuseo reta jókuae ɨvɨ pegua re. Jare jebuseo reta mbaetɨ güɨrovia oiketa ko David, jei reta chupe: “Ngaraa ndepuere reike kuae pe, echa jesambae jare iköcho vae reta peño ko reyeopiaukata.”

⁷ Ërei David opɨ̈ro jókuae tëta guasu jëguambae Sión regua; jae ko añave rupi jee David Jëta guasu.

⁸ David jei jókuae ara: “Opaete oporepeña jebuseo reta re vae toike ɨ oikea rupi, jare toyuka opaete jesambae reta jare iköcho vae reta, amotareɨ yae ko jókuae reta.” Joko güi ou ñee: “Jesambae reta jare iköcho vae reta mbaetɨta Tumpa jo pe.”

⁹ David oñemoëta joko pe, jare ombojee David Jëta guasu; jare oyapo ikësearä opaete iyɨ́vɨri rupi, Milo güive japɨpe kotɨ.

Hiram omondo jekovia pe kuimbae reta imiari vaerä David ndive

¹⁰ Jare David imbaepuere okuakuaa ojo oiko, yandeYa Tumpa imbaepuere yae ete vae oime oiko jae ndive.

¹¹ Jáeramo, mburuvicha guasu Hiram tëta Tiro pegua omondo jekovia pe kuimbae reta imiari vaerä David ndive, yogüɨraja vi jeta ipoki oparavɨkɨ ɨvɨra pe vae reta, jare ita iñopaa reta; jae reta oyapo David jo. Güɨraja reta vi ɨ̈vɨrare oñeopagüe.

¹² Jayave David oikuaa yandeYa ko oñono mburuvicha guasurä opaete ɨvɨ Israel re vae, jare kërai tumpa ko ombotuicha chupe iporookuaía, oaɨu ramo Israel, tëta imbae vae.

David taɨ reta Jerusalén pe oa vae

¹³ David oyakavo Hebrón güi Jerusalén pe yave, omenda jeta kuña Jerusalén pegua reta ndive jare güɨrekoiño vi jeta kuña reta joko pe, jae reta jeta imembɨ chupe.

¹⁴ Taɨ reta oa Jerusalén pe chupe vae jee: Samúa, Sobab, Natán, Salomón,

¹⁵ Ibhar, Elisúa, Nefeg, Jafía,

¹⁶ Elisama, Eliada jare Elifelet.

David omoamɨri filisteo reta

¹⁷ Filisteo reta oendu David oyeparavo mburuvicha guasurä Israel pe yave, opa yogüɨraja oeka; ërei David oendu jókuae yave, ojo oñeñono metei o jëguambae pe.

¹⁸ Yogüeru filisteo reta jare opa oñemoai ñogüɨnoi ɨvɨtɨ päu ipe kavi vae Refaim rupi.

¹⁹ Jayave David oparandu yandeYa pe jei reve: —¿Aëta pa añoraro filisteo reta ndive? ¿Remoamɨriuka retata pa cheve? Jayave yandeYa jei chupe: —Eë chupe, echa ameeta ndepo pe, remoamɨri reta vaerä.

²⁰ Jare David ojo Baal-perazim pe, jare joko pe opa omoamɨri, jare jei: “YandeYa omoamɨri cherovaicho reta cheróvai, ɨ ipɨ̈rata vae rami.” Jáeramo ombojee jókuae Baal-perazim.

²¹ Jare filisteo reta opa oeya joko pe itumpa-raanga reta, David jare isundaro reta opa oapɨ.

²² Jare filisteo reta jekuae yogüeru ye, jare opa oñemoai reta ye ñogüɨnoi ɨvɨtɨ päu ipe kavi vae Refaim rupi.

²³ Jare David oparandu kuae regua yandeYa pe yave, jae jei chupe: “Agüɨye ekua jóvai kotɨ rupi, ekua ikupe kotɨ rupi chupe reta, ɨvɨra iyaɨsɨ vae reta jenda re katu eë chupe reta.”

²⁴ Reendu ɨvɨra reta jäka rupi jɨapu vae yave, eë chupe reta, echa che ajata nderenonde amoamɨri vaerä sundaro filisteo reta.

²⁵ Jare David oyapo yandeYa jei chupe rami, jare opa omoamɨri filisteo reta Geba güive Gezer pe.