2 SAMUEL 22 - Biblia Guarani Tumpa Iñee

David otairari jovaicho reta güi ojoyepe jeko pegua

¹ David jei kuae ñee yandeYa pe, ojoyepe Saúl güi jare opaete jovaicho reta ipo güi yave.

² Jei körai: “Nde cheYa, jae ko ita guasu cheñepɨ̈roa, nde ko jae chereepɨ vae,

³ cheTumpa, cheñepɨ̈roa, nderé tayeko cheyeopiaka, mbaepuere chereepɨ vae, añepɨ̈ro kavi yae nderé vae, chereroasayepe vae. ¡Chereroasayepe mbaesusere güi vae!

⁴ Nde cheYa, jupi ko reyemboeteuka vaerä roenɨi yave, chereepɨ cherovaicho reta güi.

⁵ Ɨ ñaneova vae rami mano cheöva; ɨ ipɨ̈rata yae vae oporoiämondo rami ikavimbae chemongɨɨye.

⁶ Mano chemoïcha tɨmasa pe. ¡Ñuai mano pegua oñono reta cheré!

⁷ Chepɨatɨtɨ yave aenɨi yandeYa, asapúkai cheTumpa pe, jare jae chereendu jo iyemboetea güi. ¡Chesapúkai ojo oväe chupe!

⁸ Jayave ɨvɨ okana täta, ara iguapɨka reta okana vi; okana reta, yandeYa iyarasɨ ramo.

⁹ Tätati oë iñäpɨgua rupi jare iyuru güi tata opaetei mbaembae oapɨ vae. ¡Jare tätapɨi jendɨgüe oë chugüi!

¹⁰ Ombotindɨ ara jare ogüeyɨ. ¡Ipɨ igüɨ pe oï amapɨtu jüu vae!

¹¹ Opo metei araɨgua querubín re jare oveve; oveve ɨvɨtu re.

¹² Jare iñemiarä oñono pɨtumimbi yavaetegüe, amapɨtu jüu yae vae, ɨ katuai vae.

¹³ Jae jembipeasɨ, omoendɨ tätapɨi.

¹⁴ Jayave yandeYa ombou iñee ara kotɨ güi, Tuichagüe yae ete vae omoë iñee:

¹⁵ Ombou juvɨ reta, jare opa omoai moai cherovaicho reta, ombou iama-vera reta jare opa omboai.

¹⁶ Ɨguasu reta jugua opa oyekuaa, ɨvɨ iguapɨa opa oyekuaa, yandeYa iñeeäta rupi, iñäpɨgua rupi ipɨ̈túe vae rupi.

¹⁷ Ombou ɨvate güi chepɨɨ, jare cherenoe ɨ jeta vae jugua güi.

¹⁸ Chereepɨ tovaicho reta imbaepuere yae vae güi, chemotareɨ vae reta güi, yepe tëi jae reta imbaepuere yae chegüi.

¹⁹ Jasɨ katu aiko yave, oñemopüa reta cheré, ërei yandeYa chemborɨ:

²⁰ Jae cherenoe ɨvɨ ipɨguasúa pe; ¡chemborɨ, cheraɨu jeko pegua!

²¹ YandeYa omboekovia cheve jupigüe ayapo rupi, chereko kavi oime rupi, omboekovia cheve,

²² echa che aguata yandeYa jeia rupi; ¡mbaetɨi apia cheTumpa güi!

²³ Ayapo avei iporookuai reta; ¡mbaetɨi apia iporookuai reta güi!

²⁴ Aguata sɨmbi rupi kavi jóvai; jare ayeandu ikavimbae güi.

²⁵ Jáeramo, yandeYa omboekovia cheve jupigüe ayapo rupi, jesa jóvai chereko kavi rupi omboekovia cheve.

²⁶ Nde, cheYa, iporoparareko vae re, ndeporopararekota, jare sɨmbi, kuimbae jupi vae ndive,

²⁷ ndereko kavi, kuimbae jeko kavi vae ndive, ërei ndepɨa täta, kuimbae iyemongeta ikavimbae ndive.

²⁸ Ërei nde reepɨ tëta oiporara oiko vae reta, ërei remomichi ipɨayemboete vae reta re.

²⁹ CheYa, nde ko jae remboesape cheve vae; nde cheTumpa remboesape cheve pɨtumimbi.

³⁰ Nde ndive opa amoai moai tovaicho reta, jare aasata jëta guasu ikësea.

³¹ Tumpa jembiapo jupi ko; yandeYa iñee ikɨambae ko. ¡Yeopiaka ko opaete güɨrovia jese vae pe!

³² ¿Oime ye pa ïru Tumpa, yandeYa güi? ¿Oime ye pa ïru Tumpa ipuere yandereepɨ vae?

³³ Tumpa ko chemomɨ̈rata, jae ko oipea tape cheve,

³⁴ jae ko chemoäkua guasukaka rami, jae ko chemomɨ̈rata ɨvɨtɨ rupi aguata yave,

³⁵ jae ko chemboe kaviasɨ ñeraro peguarä, jae ko chemomɨ̈rata amboyeapa vaerä güɨrapa jiero iyu vae pegua.

³⁶ Nde chereepɨ jare chereroasayepe, ndepɨakavi chembotuicha.

³⁷ Nde rembopɨguasu cherape cheve, jare mbaetɨ apia chugüi.

³⁸ Amoña cherovaicho reta jare opa amokañɨtei, opa ayuka yave ramo ayerova ye.

³⁹ ¡Opaetei ayuka! ¡Opa ambojaɨ jaɨ! Oa reta chepɨ igüɨ pe, ¡mbaetɨ ye ma opüa reta!

⁴⁰ Echa nde chemomɨ̈rata ñoraro peguarä, remomichi cherovaicho reta cheve.

⁴¹ Rembotekuarai cherovaicho reta chegüi, amokañɨtei vaerä chemotareɨ vae reta.

⁴² Osapúkai reta tëi, ërei mbaetɨ kia oepɨ; yandeYa ave oenɨi reta tëi, ërei mbaetɨ oendu chupe reta.

⁴³ ¡Ɨvɨkúi rami opa amongúi reta! ¡Tuyuapo tape rupigua rami apɨ̈ro jese reta!

⁴⁴ Chereroasayepe cherëta ipɨapochɨ güi, cheñovatu aiko vaerä tëtaguasu reta juvicharä, oyeokuaita cheve tëta aikuaambae.

⁴⁵ Ketɨgua reta oyeokuaita cheve; oyapo retata che jaegüe,

⁴⁶ Ketɨgua reta ipɨtuta, jare ñogüɨnoe retata iñemika güi.

⁴⁷ ¡Toyemboete cheYa! ¡Toyemboete cheangarekoa! ¡Toyembotuichauka Tumpa cheangareko jare chereroasayepe vae!

⁴⁸ Jae ko Tumpa oyepɨ cheve vae, jare opa omoamɨri tëta reta cheve vae.

⁴⁹ Opa oñono tëta reta chepo pe vae, chembotuicha oñemopüa tëi chekotɨ vae reta güi. ¡Nde chereepɨ kuimbae ipɨapochɨ vae güi!

⁵⁰ Jáeramo, cheYa Tumpa toromboete opaete vae tëtaguasu reta jóvai tatairari ndeve.

⁵¹ Che mburuvicha guasu nderembiparavo pe remee aporomoamɨri yae vaerä; nde cheparareko avei jökorai vi cheñemuña reta.”