2 SAMUEL 11 - Biblia Guarani Tumpa Iñee

David jare Betsabé

¹ Ërei jókuae año ou ye vae re, mburuvicha reta iñoraro iara pe, David omondo Joab, jare jae ndive opaete imborɨa reta, jare opaete sundaro Israel pegua reta, jare opa oyuka Amón iñemuña reta, jare oñova reta tëta Rabá. Ërei David opɨtaño Jerusalén pe.

² Jare metei ara kaaru yave, David opüa jupa güi, jare oë oguata o iárambo ipe kavi vae rupi; jare joko güi oecha metei kuña ipöra yae vae oyau oï.

³ Jare David omondo oparanduuka jókuae kuña re, jare jei reta chupe: Jókuae kuña ko jae Betsabé, Eliam tayɨ, Het iñemuña Urías jembireko.

⁴ Jare David omondo güeruruka; jare jae ou ípɨri, jare David oke jae ndive. Jare kuae kuña ojo ye oikoa pe, opa güire oyetɨo ikɨa güi Tumpa jóvai.

⁵ Jare jókuae kuña ipurúa, jare omondo oikuaauka David pe, körai: “Chepurúa aï.”

⁶ Jayave David omondo jeiuka Joab pe: “Embou cheve Het iñemuña Urías.” Jare Joab ombou Urías, David pɨri.

⁷ Jare Urías ou yave David pɨri, oparandu chupe, kërai ra Joab oï vae re, jare sundaro reta kërai ra ñogüɨnoi vae, jare kërai ra ñeraro oï vae re.

⁸ Jaɨkue rupi David jei Urías pe: “Ekua ndero pe, jare eputuu.” Jare Urías oë mburuvicha guasu jo güi yave, mburuvicha guasu omondouka chupe mbota, jae jembiurä vae güi;

⁹ ërei Urías opɨta oke mburuvicha guasu jöke pe; juvicha guasu jöke iyangarekoa reta ndive, jare mbaetɨ ojo jo pe.

¹⁰ Jókuae oikuaauka reta David pe, jei reve: “Urías mbaetɨ ojo jo pe.” Jayave David jei Urías pe: —¿Mombɨrɨ güiä pa reyu? ¿Maera pa mbaetɨ reo ndero pe?

¹¹ Jare Urías jei David pe: —Tumpa ikäjou jare sundaro reta Israel jare Judá pegua ñogüɨnoi o guakapi pegua peño; cheruvicha Joab jare ndesundaro reta ñogüɨnoi ikatu pe eteiño; jaema che, ¿këraita pa aike chero pe, akaru vaerä jare aaɨu jare ake cherembireko ndive? ¡Nderé re ko cheruvicha, ngaraa jókuae ayapo!

¹² Jare David jei Urías pe: —Epɨta räri añave kuae pe, jare pɨareve toromondo. Jare Urías opɨta Jerusalén pe jókuae ara jare pɨareve pe ye.

¹³ Jare David omee okaru jare okau jae ndive, ombosavaɨpo regua. Jare jae kaaru ma yave oë ojo oke juvicha guasu jembiokuai reta pɨri; jare mbaetɨ ojo jo kotɨ.

¹⁴ Köe ma yave, David oikuatía metei tupapire Joab peguarä, jare omondo Urías ndive.

¹⁵ Jókuae tupapire oikuatía vae pe jei: “Eñono tenonde Urías, ñoraro jeiete yaea pe etei, javoi pesɨrɨ chugüi, ipere jare omano vaerä.”

¹⁶ Jökorai, Joab oñova yave tëta, oñono Urías jókuae kuimbae reta jae oikuaa jëia yae vae reta ñogüɨnoia pe etei.

¹⁷ Jare tëta pegua reta ñogüɨnoe oñeraro vaerä Joab ndive ikatu pe yave, omano mbovɨ David isundaro reta güi; joko pe omano vi Het iñemuña Urías.

¹⁸ Jayave Joab omondo oikuaauka kavi David pe, kërai etei ko ñeraro vae.

¹⁹ Jare ñee jerajaa pe jei: “Opa ma nemiari ñeraro re yave,

²⁰ güɨramoi mburuvicha guasu iyarasɨta jare jeita: ‘¿Maera pa köi mbatee peya tëta re peñeraro vaerä? ¿Mbaetɨ pa peikuaa tëta ikësea güi ipuere ko mbae oitɨ reta peré vae?

²¹ ¿Mbaetɨ pa pemaendúa tëta Tebes pe metei kuña ko oitɨ ɨvate güi Abimelec iñäka re metei angúa ita iperasogüe, jare oyuka vae? ¿Maera pa peya mbatee tëta ikësea re?’ Jayave nde ere chupe: ‘Nderembiokuai Het iñemuña Urías, omano vi.’ ”

²² Jare ñee jerajaa ojo oväe yave, imiari David pe opaete mbaembae Joab oyókuai jese vae.

²³ Ñee jerajaa jei: —Sundaro reta yogüeru oñeraro ikatu pe ore ndive vae orembopɨtu tëi, ërei ore opa romboyerovauka reta ye tëta guasu jöke kotɨ.

²⁴ Jayave uvɨ iya reta oreapi tëta ikësea güi, jare omano mbovɨ oregüi reta, joko pe omano vi nderembiokuai Urías.

²⁵ Jayave David jei ñee jerajaa pe: —Ere Joab pe agüɨye tipɨatɨtɨ jókuae re, jökorai ko ñeraro; jeiete toïraro jókuae tëta guasu omoamɨri regua. Jökorai emoäta ngatu.

²⁶ Jare Urías jembireko oikuaa yave ime omano, oäpiro ime.

²⁷ Ërei oasa güire ime oäpiro vae iara yave, David omondo güeru jo pe; jare oiko jembirekorä, jare imembɨ chupe metei kunumi. Ërei kuae David oyapo vae, mbaetɨ etei ikavi yandeYa jesa róvai.