2 REYES 9 - Biblia Guarani Tumpa Iñee

Jehú oyeparavo mburuvicha guasurä Israel pe

¹ Jayave ñeemombeúa Eliseo oenɨi metei ñeemombeúa reta güi, jare jei chupe: —Eyupavo, jare eraja kuae asaite Ramot kotɨ, ɨvɨ Galaad pe.

² Joko pe reo reväe yave, eeka Jehú, Josafat taɨ, Nimsi jɨmɨmino. Eike jae oïa pe, embosɨrɨ ïru reta güi jare eraja ïru o pe.

³ Javoi eipɨɨ asaite jɨru jare epɨyere asaite iñäka re, jare ere chupe: “Körai jei yandeYa: Che roparavo mburuvicha guasurä, ɨvɨ Israel peguarä.” Javoi eipea öke jare etekuarai aramoete repɨtambae reve.

⁴ Jayave ojo jókuae ñeemombeúa taɨrusu vae Ramot kotɨ, ɨvɨ Galaad pe,

⁵ jare ojo oväe joko pe yave oime yatɨ ñogüɨnoi sundaro juvicha reta. Jayave jei: —Oime mbae re chemiari vaerä ndeve cheruvicha. Jehú jei chupe: —¿Ore reta güi, kia ndive pa? Ñeemombeúa jei chupe: —Nde ndive cheruvicha.

⁶ Jare Jehú opüa jare oike o pe. Jayave ñeemombeúa opɨyere iñäka re asaite, jare jei chupe: —YandeYa Israel iTumpa jei: “Che roparavo mburuvicha guasurä, tëta Israel chembae vae peguarä.

⁷ Nde opata nderuvicha Acad iñemuña reta remboai, jökorai reyepɨta cheñeemombeúa reta jare opaete ïru cherembiokuai reta imano re, Jezabel oyukagüe reta.

⁸ Opaete Acab iñemuña reta amokañɨteita Israel pe, mbaetɨta metei ave tembiokuai jare tembiokuaimbae opɨta jekove ndive.

⁹ Ayapota Acab iñemuña reta pe Jeroboam, Nabat taɨ iñemuña reta pe ayapo rami etei, jare Baasa, Ahías taɨ iñemuña reta pe ayapo rami.

¹⁰ Jare yaɨmba reta jouta Jezabel, Jezreel pe, jare mbaetɨta kia oñotɨ vaerä.” Körai opa jei yave, ñeemombeúa oipea öke jare oë otekuarai.

¹¹ Jaɨkue rupi Jehú oë ye juvicha imborɨa reta yatɨ ñogüɨnoia pe yave, jókuae reta oparandu chupe: —¿Maratu pa? ¿Maera pa ou omae nderé jókuae imbokere vae? Jehú jei: —Pe reta peikuaa ko jókuae kuimbae jare peikuaa vi iyemongeta.

¹² Jókuae mburuvicha guasu imborɨa reta jei: —¡Agüɨye orembotavɨ, emombeu oreve opaete! Jayave Jehú jei chupe reta: —Körai jei cheve: “Körai jei yandeYa: ‘Che roparavo Israel juvicha guasurä.’ ”

¹³ Jökorai jei rupive metei ñavo jókuae mburuvicha guasu imborɨa reta oipɨɨ ñeapevaka jare oipɨso reta mburuvicha guasu iguapɨa pe ɨvate, javoi omoñee reta temimbɨ vecha kuimbae-räti pegua, jare osapúkai reta: “¡Jehú jae ko mburuvicha guasu!”

Jehú oyuka Joram

¹⁴ Jehú, Josafat taɨ, Nimsi jɨmɨmino oñemopüa Joram kotɨ. Joram ojo opaete Israel pegua ndive Ramot pe, ɨvɨ Galaad pe, oepɨ vaerä Hazael mburuvicha guasu Siria pegua güi.

¹⁵ Ërei mburuvicha guasu Joram oyerova ye Jezreel kotɨ oñepoano vaerä Siriaɨgua reta ombopere vae güi; jae ko Hazael ndive oñeraro yave. Jehú jei iñeïru reta pe: “Añetete peipota jae oiko peruvicha guasurä yave, agüɨye metei ave toë tëta guasu güi ojo vaerä imiari tëta guasu Jezreel pe.”

¹⁶ Javoi oyeupi ikäretou ñeraro pegua pe jare ojo Jezreel pe, echa Joram imbaerasɨ oï joko pe. Oï vi Joko pe Ocozías, mburuvicha guasu Judá pegua, Joram pɨri ou opou vae.

¹⁷ Jare Jezreel pe maeka ɨvatea güi sundaro omae oï vae, oecha Jehú jare jupiegua reta yogüeru vae osapúkai, jei: —¡Joko yogüeru vae! Jayave Joram jei: —Pemondo jape pe metei kuimbae kavayu regua, oparandu vaerä chupe yogüeru ra mbɨakatu ndive vae.

¹⁸ Jayave jókuae kuimbae kavayu regua ojo oövaiti Jehú, jare jei chupe: —Mburuvicha guasu ombou oparandu peve, peyu ra mbɨakatu ndive vae. Jehú jei chupe: —Jókuae jaeä ko ndeparavɨkɨ. ¡Yaja ye cherupíe! Jayave sundaro ɨvate güi omae oï vae omombeu, jei: —Jókuae ñee jerajaa ojo oväe chupe reta, ërei mbaetɨ oyekuaa oyerova ye vae.

¹⁹ Jayave mburuvicha guasu omondo ye ïru kuimbae kavayu regua; jare ojo oväe chupe reta yave jei: —Mburuvicha guasu ombou oparandu peve, peyu ra mbɨakatu ndive vae. Jehú jei chupe: —Jókuae jaeä ko ndeparavɨkɨ. ¡Yaja ye cherupíe!

²⁰ Sundaro ɨvate güi omae oï vae jekuae omombeu ye: —Jókuae ïru ojo vi oväe chupe reta, ërei mbaetɨ oyekuaa oyerova ye vae. Jare jókuae käretou omboguata vae jaeecha Jehú, Nimsi jɨmɨmino; echa omboguata metei imbokere vae rami, jae jeko rami.

²¹ Jayave Joram jei: —¡Peyokua chekäretou ñeraro pegua! Oñono kavi reta chupe ikäretou, jare Joram, mburuvicha guasu Israel pegua, jare Ocozías, mburuvicha guasu Judá pegua, metei ñavo ikäretou pe ae yogüɨraja oövaiti Jehú. Jare oövaiti reta Nabot iɨvɨ pe, Jezreel pe.

²² Joram oecha yave Jehú, jei chupe: —¿Peyu pa mbɨakatu ndive? Jehú jei chupe: —¿Mbae nunga mbɨakatu pa oimeta, ndesɨ Jezabel itumpa-raanga jare mbaekuaa rupi oiko reve?

²³ Jayave jupivei oyerova otekuarai, jare jei Ocozías pe: —¡Oporombotavɨ vae yepe pea, Ocozías!

²⁴ Ërei Jehú omoata juvɨ jare oñɨvo pɨpe Joram ikupe kotɨ güi; jare uvɨ oipɨa rasa etei, jare Joram oa ikäretou pe.

²⁵ Javoi Jehú jei isundaro ruvicha Bidcar pe: —Embogüeyɨ joko güi, emombo Nabot iɨvɨ pe, Jezreel pe, echa chemaendúa che jare nde yaja päve yave tu Acab ikäretou ñeraro pegua pe, yandeYa oyepopeyu ikotɨ kuae ñee oiporara vaerä vae, jei reve:

²⁶ “Che aecha kárumbo Nabot jare taɨ reta jugüɨgüe rami, körai ayapota nde ndive kuae ɨvɨ pe etei. Che peYa jae körai.” Jayave peipɨɨ jare pemombo Nabot iɨvɨ pe yandeYa jei rami.

Jehú oyuka Ocozías

²⁷ Ocozías, mburuvicha guasu Judá pegua oecha yave kuae oasagüe, otekuarai Bet-hagan kotɨ. Ërei Jehú oaɨkuemoña, jei: —¡Peyuka vi ikäretou pe! Ombopere reta ɨvɨtɨ Gur re yayeupía pe Ibleam jóvai, ërei jae otekuarai Meguido pe oväe regua. Joko pe omano.

²⁸ Jare jembiokuai reta güɨraja Jerusalén pe metei käretou pe, jare oñotɨ reta iñemuñagüe David Jëta guasu pe.

²⁹ Ocozías omboɨpɨ oï mburuvicha guasurä Judá pe, Joram, Acab taɨ once año ma oiko mburuvicha guasurä yave.

Jezabel imano

³⁰ Jayave Jehú ojo Jezreel pe. Jezabel oikuaa yave, ombojovɨ jesakua, jare ia omopöra; javoi oñeñono metei ventana pe.

³¹ Jare Jehú ojo oväe jókuae tëta guasu jöke pe yave, Jezabel jei chupe: —¿Zimri kërai pa oasa, juvicha oyuka yave?

³² Jehú omae ventana kotɨ, jare jei: —¿Kia pa oï che ndive? Mókoi ani mboapɨ kuimbae eunuco itindɨ omae ikotɨ,

³³ Jehú jei chupe reta: —¡Peitɨ pembou ɨ́vɨkotɨ! Jare jókuae kuimbae reta oitɨ ombou ɨ́vɨkotɨ, jare jugüɨ oñapiramo ovapetea jare kavayu reta; jare kavayu reta opɨ̈ro Jezabel re.

³⁴ Javoi Jehú oike okaru jare jou vino. Jaɨkue rupi Jehú jei: —Pekua pemae jókuae kuña jeko kavimbae re jare peñotɨ; echa mburuvicha guasu tayɨ ko.

³⁵ Ërei opa yogüɨraja oñotɨ reta vaerä yave, jaeño oväe reta chupe iñäkagüe, ipɨgüe jare ipogüe reta.

³⁶ Jayave yogüeru ye imiari Jehú pe; jae jei: —Kuae jae ko Tumpa iñee reta jembiokuai Elías Tisbe pegua rupi jei vae. “Yaɨmba reta opata jou Jezabel jetegüe ɨvɨ Jezreel pe,

³⁷ jare Jezabel jetegüe opɨtata mbaerepoti rami ɨvɨ iárambo rupi, ɨvɨ Jezreel pe, mbaetɨ eteita kia oikuaa Jezabel jetegüe ko vae.”