2 REYES 7 - Biblia Guarani Tumpa Iñee

¹ Jayave Eliseo jei: —Eyeapɨsaka yandeYa iñee re. Körai jei yandeYa: “Pɨareve koyave Samaria jöke pe oñemeeta trigokúi, chiu kilo vae jepɨta metei reare korepoti pegua jare quince kilo cebada vae jepɨta metei reare korepoti pegua.”

² Mburuvicha guasu imborɨa jei Tumpa iñeemombeúa pe: —Yepe tëi yandeYa oipea ara, ngaraa ko oasa jókuae rere vae. Ërei Eliseo jei: —Mase, nde reechata, ërei ngaraa reu jókuae reta güi.

³ Jókuae tëta guasu jöke pe ñogüɨnoi irundɨ kuimbae ipire mbaerasɨ ókui vae, kuae reta jei oyoupe: —¿Maera pa kuae pe yaguapɨ ñaäro ñaï mano?

⁴ Yaike yave tëta guasu pe, yandeyukata yɨmbɨaɨ, karuai jeko pegua; jare kuae pe yapɨta yave ñamanota vi. Yaja Siriaɨgua reta jeyupa kotɨ; jae reta omaeño yaikove yave, yaikoveta; ani yandeyuka reta yave, ñamano.

⁵ Jayave, pɨ̈tu ma yave opüa reta yogüɨraja Siriaɨgua reta jeyupa kotɨ; ërei opata ma yogüɨraja oväe yave, oecha reta mbaetɨ etei kia joko pe vae.

⁶ Echa yandeYa yepe oyapo Siriaɨgua reta jeyupa pe oyeendu vaerä käretou reta oguata vaeecha, oyeendu kavayu regua reta yogüeru vaeecha, jare jeta sundaro reta yogüeru vaecha oyeendu; jare Siriaɨgua reta oyemongeta mburuvicha guasu Israel pegua omboepɨ Het iñemuña reta juvicha guasu pe, jare Egiptoɨgua reta juvicha guasu pe oporepeña vaerä jese reta.

⁷ Jökorai opüa reta, jare opa otekuarai reta pɨ̈tu reve, opa oeya reta iküaraɨa guakapi pegua, ikavayu reta, imburika reta, oeya reta teyupa jókuae oï rami eteiño; jare opa otekuarai güɨroasayepe reta vaerä jekove.

⁸ Ipire ókui imbaerasɨ vae reta opa yogüɨraja oväe teyupa iyɨ́vɨri yave, oike reta metei küaraɨa guakapi pegua pe, okaru jare oɨu reta; oipɨɨ reta korepoti, oro jare temimonde, jare güɨraja reta oñomi oñono. Jare jekuae oike reta ye ïru küaraɨa guakapi pegua pe, joko güi jökorai mbae oekɨ reta ye jare güɨraja oñomi reta oñono.

⁹ Ërei jei reta oyoupe: —Mbaetɨ ikavi yayapo ñaï vae. Kuae ara jae ko yaraja vaerä ñee ikavi vae, jare yande mbaetɨ yamombeu ñaï; jare ñaäro yave köe regua, yanderekota yapɨta. Ikavi ko yaja mburuvicha guasu pe ñanemiari.

¹⁰ Jayave yogüeru, jare osapúkai reta sundaro reta tëta guasu jöke järoa pe, jei reta: —Rojo Siriaɨgua reta jeyupa pe, jare mbaetɨ etei kia joko pe oï vae, mbaetɨ etei ñee ave oyeendu joko pe. Jaeño ete ñogüɨnoi kavayu reta, mburika reta oñeapɨti oï jare küaraɨa guakapi pegua reta, jae reta omopüa ramiño ñogüɨnoi.

¹¹ Sundaro reta jókuae öke järoa omombeu aramoete pegua mburuvicha guasu jo pegua reta pe.

¹² Jare mburuvicha guasu opüa pɨ̈tu reve, jare jei imborɨa reta pe: —Chemiarita peve, Siriaɨgua reta oyemongeta oyapo yandeve vae re. Kërai oikuaa reta yande yaiporara ñaï yɨmbɨaɨ vae, opa reta ko ñogüɨnoe jeyupa güi, jare oñemi ñogüɨnoi kaa rupi, echa oyemongeta reta yande opa ñaë tëta guasu güi yave, jae reta yandepɨɨta yanderekove reveño, jare oike retata tëta guasu pe.

¹³ Ërei metei imborɨa jei chupe: —Toyemondo mbovɨ kuimbae jokotɨ jókuae pandepo kavayu jembɨregüe re, jare yaikuaata mbae ra oasa vae. Echa mbaetɨ omano reta yave ani omano reta ko yave oyovakeñota kuae pe yapɨta vae reta ndive.

¹⁴ Jayave oipɨɨ reta mókoi käretou, kavayu regua reta ndive, jare mburuvicha guasu omondo Siriaɨgua reta jeyupa kotɨ, oikuaa reta vaerä mbae ra oime joko pe vae.

¹⁵ Jare jae reta opa yogüɨraja, jare omomoe güɨraja Siriaɨgua reta jaɨkuere Jordán kotɨ yogüɨraja oväe regua; jare oecha reta opaete tape rupi jeta temimonde jare mbaembae opa omombo oeyagüe, jaɨai reta otekuarai jeko pegua. Javoi opa ye oyerova jókuae mburuvicha guasu omondo vae reta, jare imiari reta jókuae oechagüe re.

¹⁶ Jayave opaete vae yogüɨraja güɨnoe mbaembae Siriaɨgua reta jeyupa güi. Jare yandeYa jei rami, trigokúi siete kilo vae jepɨ metei reare korepoti pegua, jare quince kilo cebada vae jepɨ metei reare korepoti pegua.

¹⁷ Jare mburuvicha guasu oñono jókuae imborɨa öke iyangarekoarä, ërei opaete vae reta opɨ̈ro jese öke pe jare omano, mburuvicha guasu ojo omae jese yave, oecha Tumpa iñeemombeúa jei chupe rami etei.

¹⁸ Jayave oasa, Tumpa iñeemombeúa jei mburuvicha guasu pe rami, jei yave chupe: “Pɨareve koyave Samaria jöke pe oñemeeta trigokúi, chiu kilo vae jepɨta metei reare korepoti, jare quince kilo cebada vae jepɨta metei reare korepoti.”

¹⁹ Jayave jókuae mburuvicha guasu imborɨa jei yepe Tumpa iñeemombeúa pe: —Yepe tëi yandeYa oipea yave ara, ngaraa ko jökorai oasa jókuae rere vae. Eliseo jei chupe: —Mase, nde reechata, ërei ngaraa reu jókuae güi.

²⁰ Jökorai etei oasa, echa opaete vae reta opɨ̈ro jókuae mburuvicha guasu imborɨa re, tëta guasu jöke pe, jare omano.