2 REYES 6 - Biblia Guarani Tumpa Iñee

Eliseo ombovevɨi yɨɨ

¹ Ñeemombeúa reta jei Eliseo pe: —Mase, nde ndive yaikoa, michi yae ko yandeve.

² Emaeño torojo ɨ̈aka Jordán kotɨ, joko pe metei ñavo royasɨa vaerä ɨvɨra, jare royapo vaerä oreyeupe joko pe roiko vaerä pɨpe. Eliseo jei chupe reta: —Pekua.

³ Javoi metei vae jei: —Romoñera reo vaerä orerupíe. Eliseo jei: —Taja perupíe.

⁴ Jayave Eliseo ojo jae reta ndive Jordán kotɨ, jare joko pe oyasɨa reta ɨvɨra.

⁵ Jare metei oyasɨa ɨvɨra oï ramboeve, iyɨɨ oa chugüi ɨ pe, jayave osapúkai: —¡Atataɨ, cheya! ¡Jókuae yɨɨ aiporugüe ko!

⁶ Tumpa iñeemombeúa oparandu chupe: —¿Ketɨ pa oa? Jae omombeu chupe ketɨ ko oa vae. Jayave Eliseo oyasɨa metei ɨvɨra jare oitɨ joko pe, jare yɨɨ ombovevɨi ɨ iárambo.

⁷ Jayave Eliseo jei chupe: —Enoe. Jare ipo pe güɨnoe jókuae yɨɨ.

Eliseo jare Siriaɨgua reta

⁸ Mburuvicha guasu Siria pegua omboɨpɨ oñeraro Israel pegua reta ndive, jare omboatɨ isundaro ruvicha reta pe jei, kia kia pe oñono vaerä jeyupa.

⁹ Jayave Tumpa iñeemombeúa omondo oikuaauka mburuvicha guasu Israel pegua pe, agüɨye vaerä oasa jókuae Siriaɨgua reta yogüeruta ñogüɨnoia rupi.

¹⁰ Jayave mburuvicha guasu Israel pegua omondo isundaro reta Tumpa iñeemombeúa jei chupea kotɨ. Jökorai oasayepe reta yogüɨreko mbovɨ ye.

¹¹ Jare mburuvicha guasu Siriaɨgua omboyemongeta yae kuae, jare oenɨi isundaro ruvicha reta, jare jei chupe reta. —¡Pere cheve! ¿Kia pa yandegüi oñemoïru mburuvicha guasu Israel pegua ndive?

¹² Jayave sundaro ruvicha reta güi metei jei: —Mbaetɨ cheruvicha guasu. Ñeemombeúa Eliseo ko oï Israel pe, jae ko omombeu mburuvicha guasu Israel pegua pe jókuae ñee reta rere ndero japɨpe pe vae.

¹³ Jayave mburuvicha guasu Siria pegua jei: —Pekua jare peikuaa, kia pe ra oime oï vae, che amondo vaerä mbovɨ kuimbae reta oipɨɨ. Jare omombeu reta mburuvicha guasu pe, Eliseo oime oï Dotán pe,

¹⁴ jayave jae omondo jokotɨ kuimbae reta kavayu regua, käretou ñeraro pegua reta, jare jeta sundaro reta; kuae reta yogüeru pɨ̈tu yave, jare oñova reta tëta guasu Dotán.

¹⁵ Pɨareve pe ndeimbove yave opüa Eliseo Tumpa iñeemombeúa jembiokuai, jare oë rupive oecha jókuae sundaro reta oñova güɨnoi tëta guasu kavayu regua reta ndive jare käretou ñeraro pegua reta ndive; jayave ojo omombeu Eliseo pe: —¡Atataɨ cheya! ¿Mbae pa yayapota añave?

¹⁶ Eliseo jei chupe: —Agüɨye ekɨɨye, echa jeta ko yande ndive ñogüɨnoi vae, jae reta ndive ñogüɨnoi vae güi.

¹⁷ Jare Eliseo oyerure yandeYa pe, jei reve: “CheYa, romoñera, eipea jesa omae vaerä.” Jayave yandeYa oipea tembiokuai jesa, jare omae; jare oecha ɨvɨtɨ rupi tɨnɨe kuimbae reta kavayu regua, jare käretou tata katuai vae Eliseo iyɨ́vɨri rupi.

¹⁸ Jare Siriaɨgua reta ogüeyɨ Eliseo kotɨ yave, jae oyerure yandeYa pe, jei körai: “Romoñera jesambae opɨta vaerä kuae kuimbae reta.” Jare yandeYa opa oeya jesambae, Eliseo oyerure rami.

¹⁹ Jayave Eliseo jei chupe reta: —Kuae jaeä ko tape peeka vae ani tëta guasu peeka vae. Peyu cherupíe, che pogüɨrajata jókuae kuimbae peeka vae oïa pe. Jare güɨraja reta Samaria kotɨ.

²⁰ Joko pe oväe reta yave, Eliseo oyerure: “CheYa, añave eipea jesa reta omae reta vaerä.” Jayave jae reta omae yave, oecha reta ñogüɨnoi tëta guasu Samaria japɨpe.

²¹ Jare mburuvicha guasu Israel pegua oecha reta yave, oparandu Eliseo pe: —¿Ayuka retata pa, cheru?

²² Ërei Eliseo jei chupe: —Agüɨye eyuka reta, ¿reyukata pa tembipɨɨrä reyapouka reta ndekɨsepuku pe jare nderuvɨ pe vae? Emee tokaru jare toɨu reta, javoi topa ye toyogüɨraja juvicha guasu reta kotɨ.

²³ Jare oyapo chupe reta jeta tembíu kavi; jare opa okaru jare jou reta vino yave, opa omondo reta; opa ye yogüɨraja juvicha kotɨ. Jare mbaetɨ ma yogüeru reta jembiporu ñeraro pegua ndive Siria güi ɨvɨ Israel kotɨ.

Eliseo jare tëta Samaria oñova tovaicho vae

²⁴ Metei ara Ben-adad, mburuvicha guasu Siria pegua omboatɨ opaete isundaro reta jare ojo oñova tëta Samaria, oñeraro vaerä joko pegua reta ndive.

²⁵ Jókuae oñeova oï jeko pegua karuai yae tëta Samaria pe; jáeramo metei mburika iñäkagüe jepɨ ochenta reare korepoti pegua, jare cuarto litro pɨkasu repoti vae jepɨ pandepo reare korepoti pegua.

²⁶ Metei ara mburuvicha guasu Israel pegua oasa tëta guasu ikësea iárambo rupi yave, metei kuña osapúkai chupe: —¡Cheruvicha guasu, chemborɨ!

²⁷ Mburuvicha guasu jei chupe: —YandeYa mbaetɨ ndemborɨ yave, ¿këraita pa che chepuere romborɨ? ¿Chepuereta pa amee ndeve trigo ani vino?

²⁸ ¿Mbae pa oasa nde ndive? Jókuae kuña jei: —Kuae kuña jei cheve chemembɨ royuka vaerä rou, jare pɨareve rou vaerä jae imembɨ.

²⁹ Jayave chemembɨ royuka royapo tembiurä jare rou. Pɨareve pe che jae chupe: “Añave emee nemembɨ yayuka yayapo vaerä tembíu.” Ërei jae oñomi imembɨ.

³⁰ Mburuvicha guasu oendu yave jókuae kuña jei vae, omondoro jemimonde, jare jökorai oasa tëta guasu ikësea iárambo rupi; jare kuimbae reta oecha oyemonde temimonde mbɨatɨtɨ pegua pe.

³¹ Mburuvicha guasu jei: “¡Tumpa toiporarauka jeta cheve, kuae ara voi mbaetɨ ko Eliseo, Safat taɨ iñäka ayasɨa yave!”

³² Eliseo oguapɨ oï jo pe tenondegua reta ndive. Jare mburuvicha guasu omondo Eliseo kotɨ metei kuimbae. Ërei ndei jókuae mburuvicha guasu omondo vae oväe mbove, Eliseo jei tenondegua reta pe: —Pemae kuae oporoyuka vae ombou oyasɨauka cheäka. Ërei peyeapɨsaka peï, jókuae mburuvicha guasu ombou vae ou oväe yave peyokenda öke, agüɨye pemaeño toike, echa oime juvicha ou jaɨkue.

³³ Jare Eliseo imiari oï jókuae tenondegua reta ndive ramboeve, jókuae ñee jerúa ou oväe Eliseo pɨri, jare jei: —Mase, kuae ikavimbae ombou yandeve yandeYa, ¿mbae yemborɨ pa aärota chugüi?