2 REYES 4 - Biblia Guarani Tumpa Iñee

Asaite kuña imemano vae imbae

¹ Metei kuña, ñeemombeúa jembirekogüe ojo iñeengeta Eliseo pe, jei reve: —Cheme omano, jare nde reikuaa jae oipoɨu yandeYa güi vae ko; jare ou orepía iya güɨraja vaerä chegüi mókoi reve chemembɨ reta tembiokuairä.

² Eliseo oparandu chupe: —¿Mbae pa chepuere ayapo ndeve? Emombeu cheve ndero pe renoigüe. Kuña jei: —Che nderembiokuai kuña mbaetɨ etei mbae anoi chero pe, jaeño ete metei jɨru asaite.

³ Jayave Eliseo jei chupe: —Ekua, jare eiporu ndeyeupe mbaerɨru opaete nerëta-ɨpɨ rupigua reta pe, ¡opaete mbaerɨru ipombae reväe chupegüe!

⁴ Javoi eike eyeokenda ndero pe nemembɨ reta ndive, jare emotɨnɨe asaite pe opaete mbaerɨru, jare tɨnɨegüe eñono ïkotɨa.

⁵ Jókuae kuña ojo Eliseo oïa güi, jare oike oyeokenda jo pe imembɨ reta ndive. Jayave omboɨpɨ omotɨnɨe mbaerɨru reta imembɨ reta güeru güɨnoi chupegüe.

⁶ Jare opaete ma mbaerɨru reta tɨnɨe yave, jei metei imembɨ pe: —Eru ye cheve ïru mbaerɨru. Ërei imembɨ jei chupe: —Mbaetɨ ma mbaerɨru. Jökorai rupive asaite mbaetɨ ma oë.

⁷ Javoi ou imiari Tumpa iñeemombeúa pe; jae jei jókuae kuña pe: —Añave, ekua emee asaite jare emboepɨ ndepía. Jembɨregüe re ndepuere reiko nemembɨ reta ndive.

Eliseo jare kuña Sunem pegua

⁸ Metei ara Eliseo oasa yave Sunem rupi, joko pe oiko metei kuña imboetea yae vae, jae opareañoi Eliseo pe okaru vaerä. Jokoropi oasa ñavo opɨta okaru joko pe.

⁹ Jayave jókuae kuña jei ime pe: —Mase, che aikuaa jókuae kuimbae kuae rupi oasa ñavo ou opou yandépɨri vae, jae ko Tumpa iñeemombeúa.

¹⁰ Che romoñera yayapo vaerä metei cuarto jare ñañono joko pe tupa, guapɨka jare mechero. Jökorai ou yave opou yandépɨri, topɨta pɨpe.

¹¹ Metei ara Eliseo ou jokoropi, jare opɨta oke jókuae cuarto pe.

¹² Jayave jei jembiokuai Giezi pe: —Eenɨi jókuae kuña o iya. Jókuae tembiokuai oenɨi, jare jókuae kuña ou Eliseo oïa pe yave,

¹³ Eliseo jei Giezi pe: —Ere jókuae kuña ipɨakavi yae yandeve vae pe, yandepuere ra yaiporu chupeguarä mbae ikavi vae; yandepuere ra ñanemiari jesegua mburuvicha guasu ndive ani sundaro reta itenondegua ete ndive. Jókuae kuña jei: —Ikaviño aiko kuae pe, cherëtara reta ipɨte pe.

¹⁴ Jayave Eliseo jei: —¿Mbae ra yayapota chupe? Giezi jei: —Mbaetɨ aikuaa. Ërei mbaetɨ imembɨ, jare ime indechi yae ma.

¹⁵ —Eenɨi —jei Eliseo. Jókuae tembiokuai ojo oenɨi, jókuae kuña ou oyemboɨ öke pe.

¹⁶ Jayave Eliseo jei chupe: —Año ou ye vae re, koyave rupi oimeta nemembɨ revoɨ. Jókuae kuña jei: —Agüɨye cheya, Tumpa iñeemombeúa, agüɨye eyuvanga katu che nderembiokuai kuña re.

¹⁷ Jókuae kuña ipurúa opɨta, jare año ou ye vae re oa imembɨ, Eliseo jei chupea pe etei.

¹⁸ Jare jókuae kunumi raɨ okuakuaa. Ërei metei ara ojo tu re omae, ombaepoo vae reta ndive oï tu yave,

¹⁹ omboɨpɨ jäse tu pe: —¡Achaɨ, cheäka jasɨ! ¡Cheäka jasɨ! Jayave tu jei jembiokuai pe: —Eraja ichɨ pɨri.

²⁰ Güɨraja ichɨ oïa pe, jare ichɨ omboguapɨ jäpapau pe kuaraɨ ara mbɨte regua. Jayave jókuae kunumi raɨ omano.

²¹ Ërei jókuae ichɨ güɨroyeupi oñono Tumpa iñeemombeúa okea pe, oñono tupa pe jare oyokenda öke jare oë ojo.

²² Javoi oenɨi ime jare jei chupe: —Romoñera remondo vaerä cherupíe metei tembiokuai, metei mburika ndive, ajata aramoete Tumpa iñeemombeúa oïa kotɨ; javoi ayu yeta.

²³ Ime oparandu chupe: —¿Maera pa reota remae jese añave? Yasɨ pɨauä ko añave, jare mbutuu iaraä vi. Ërei jembireko jei chupe: —¡Agüɨye eyemoambeko!

²⁴ Javoi oyokuaauka chupe mburika jare jei tembiokuai pe: —Yaja, eguata tenonde jare agüɨye epɨta che jaeä ndeve reve.

²⁵ Jayave jókuae kuña ojo; ojo oväe ɨvɨtɨ Carmelo pe, Tumpa iñeemombeúa oïa pe. Jare Tumpa iñeemombeúa oecha yave mombɨrɨ güi, jei jembiokuai Giezi pe: —Mase, ko ou kuña Sunem pegua.

²⁶ Romoñera resɨi vaerä reo reövaiti, jare ere chupe. ¿Kërai pa reï? ¿Kërai pa neme jare nemembɨ oï? Jókuae tembiokuai ojo jökorai jei chupe. Jare jókuae kuña jei chupe: —Ikaviño ñogüɨnoi.

²⁷ Javoi ojo oväe ɨvɨtɨ re Tumpa iñeemombeúa oïa pe yave, oyepɨɨ ipɨ re. Giezi oya jese ombosɨrɨ vaerä chugüi. Ërei Eliseo jei chupe: —Emaeño jese, echa ipɨatɨtɨ yae ko oï, jare añave rupi mbaetɨño yandeYa omombeu cheve, maratu ra oasa vae.

²⁸ Jayave jókuae kuña jei chupe: —Cheya, ¿aiporu pa ndeve oime vaerä chemembɨ? ¿Agüɨye eyuvanga katu cheré jaeä pa ndeve?

²⁹ Jayave Eliseo jei Giezi pe: —Eyupavo, ko oï chepopoka jare ekua jokotɨ. Kia nunga vae nerövaiti yave, agüɨye maraetei eyapo chupe, kia nunga vae maraetei oyapo ndeve yave, agüɨye emboyevɨ chupe. Javoi chepopoka eñono kunumi raɨ jova re.

³⁰ Ërei kunumi raɨ ichɨ jei Eliseo pe: —YandeYa jee re jare nderee re, ngaraa roeya, reota vi ko.

³¹ Jayave Eliseo opüa ojo jae ndive. Giezi ojo jae reta jenonde. Jare oñono popoka kunumi raɨ jova re, ërei jókuae kunumi raɨ mbaetɨ etei omɨi chupe; Giezi ojo ye oövaiti Eliseo, jare imiari chupe, jei reve: —Kunumi raɨ mbaetɨ oikove.

³² Jare Eliseo ou jókuae o pe oväe yave, oecha kunumi raɨ omano oï, oyepɨso oï tupa pe.

³³ Jayave oike japɨpe jare oyokenda öke, javoi omboɨpɨ oyerure yandeYa pe. Eliseo jare kunumi raɨño ñogüɨnoi japɨpe.

³⁴ Javoi oyeupi tupa pe, jare oyapakua kunumi raɨ iárambo, iyuru omboya kunumi raɨ iyuru re, jesa omboya kunumi raɨ jesa re, ipo omboya kunumi raɨ ipo re. Jare kunumi raɨ jete omboɨpɨ jaku.

³⁵ Jayave Eliseo opüa oguata guata jókuae o rupi, javoi oyeupi ye tupa pe jare oyapakua ye kunumi raɨ iárambo. Güɨramoiño kunumi raɨ iñächio chiu ye jare omae.

³⁶ Eliseo oenɨi Giezi, jare jei chupe: —Eenɨi jókuae kuña o iya. Giezi ojo oenɨi, jare jókuae kuña ou Eliseo oïa pe yave, jei jókuae kuña pe: —Ko oï nemembɨ.

³⁷ Jókuae kuña oyakatu jare oyepɨɨ Eliseo ipɨ re jare itindɨ ɨvɨ re; javoi oipɨɨ imembɨ jare oë ojo.

Mɨakañɨ ñeemombeúa reta peguarä

³⁸ Eliseo oyerova ye Gilgal kotɨ, jókuae ɨvɨ pe karuai yae; ñeemombeúa reta yatɨ ñogüɨnoi Eliseo re yave, jei jembiokuai pe: “Eñono yapepo tuicha vae tata pe, jare eyapo tembíu täta kavi vae, ñeemombeúa reta peguarä.”

³⁹ Metei chugüi reta oë kaa kotɨ güeru vaerä mbaerokɨ, jare oväe chupe metei ɨvɨra ia oï vae, jare güeru chugüi iagüe, andai rami vae, omotɨnɨe ivoɨtarɨru. Jare oyerova ye yave opa oyasɨa sɨa oñono yapepo pe, oikuaambae reve mbae ra ko vae.

⁴⁰ Javoi oñono okaru vaerä ñeemombeúa reta, jaema omboɨpɨ jou reta yave, osapúkai reta: —¡Tumpa iñeemombeúa, kuae tembíu güɨnoi mbayachi! Mbaetɨ ma jou reta.

⁴¹ Eliseo jei: —Peru cheve mbovɨ trigokúi. Jare jókuae opɨyere yapepo pe yave jei: —¡Añave eñono tokaru reta! Okaru reta, jare mbaetɨ ma ikavimbae vae oï jókuae yapepo pe.

⁴² Jayave ou metei kuimbae Baal-salisa pegua, güeru Eliseo Tumpa iñeemombeúa pe mbaagüɨyerɨpɨ: Veinte mbɨyape cebada pegua jare trigo ipɨau vae ivokoo pe. Jayave Eliseo jei jembiokuai pe: —Emee kuimbae reta pe, jou reta vaerä.

⁴³ Ërei jembiokuai jei chupe: —¿Këraita pa kuae amee cien vae reta pe? Eliseo jei chupe: —Emee kuimbae reta, jou reta vaerä, echa yandeYa jei okaru retata jare jembɨreta.

⁴⁴ Jökorai tembiokuai omee chupe reta, jare jae reta jou jare jembɨre ye, yandeYa jei chupe rami.