2 REYES 3 - Biblia Guarani Tumpa Iñee

Joram oiko mburuvicha guasurä Israel pe

¹ Josafat oiko dieciocho año ma mburuvicha guasurä Judá pe yave, Joram, Acab taɨ omboɨpɨ oiko mburuvicha guasurä Samaria pe Israel re, doce año oiko mburuvicha guasurä.

² Oyapo ikavimbae yandeYa jesa róvai; ërei mbaetɨ tu jare ichɨ jeko rami mbatee, echa omboai Baal iä tu oyapo vae.

³ Ërei iyoa Jeroboam, Nabat taɨ iyoa rami, Israel iñemuña reta pe oyapouka mbaeyoa vae, jare mbaetɨ oyembosɨrɨ jókuae mbaeyoa güi.

Eliseo omoërakua Moab iñamɨrita vae

⁴ Mesa mburuvicha guasu Moab pegua, jae ko mɨmba reta iya, jare ombaemboepɨse mburuvicha guasu Israel pegua pe cien mil vecha kuimbae taɨrusu vae jare cien mil vecha kuimbae jaavuku reve vae.

⁵ Ërei Acab omano yave, mburuvicha guasu Moab pegua oñemopüa Israel pegua mburuvicha guasu re.

⁶ Jayave mburuvicha guasu Joram oë Samaria güi omae jare oipapa kavi opaete sundaro Israel pegua.

⁷ Javoi omondo jeiuka Josafat mburuvicha guasu Judá pegua pe: “Mburuvicha guasu Moab pegua oñemopüa cheré: ‘¿Nekɨ̈reɨ pa chemoïru ñañeraro vaerä Moab ndive?’ ” Mburuvicha guasu Judá pegua jei chupe: “Romoïruta ko, jökorai vi chesundaro reta jare chekavayu regua reta roï nde ndive, jare nde ndive ñogüɨnoi vae reta ndive.

⁸ Ërei, ¿kia nunga tape rupi pa yajata chupe reta?” Joram jei: “Edom iñuu rupi tape ojoa rupi.”

⁹ Jayave yogüɨraja mburuvicha guasu Israel pegua, Judá pegua, Edom pegua. Ërei chiu ara oyere reta ñuu rupi jeko pegua oata ɨ chupe reta, jare jɨmba reta pe.

¹⁰ Jayave mburuvicha guasu Israel pegua jei: —¡Mase! YandeYa yandereru, yande mboapɨ mburuvicha guasu reta ñanemee vaerä Moab iñemuña reta pe.

¹¹ Ërei Josafat jei: —¿Mbaetɨ pa kuae pe Tumpa iñeemombeúa, yaparandu vaerä yandeYa pe jókuae ñeemombeúa rupi? Metei sundaro ruvicha, Israel pegua mburuvicha guasu iyɨvɨrigua jei: —Kuae pe oime oiko Eliseo, Safat taɨ, Elías jemimboe.

¹² Josafat jei: —Jókuae oimeta güɨnoi yandeYa iñee. Yogüɨraja Eliseo pɨri mburuvicha guasu Israel pegua jare Josafat, jare mburuvicha guasu Edom pegua.

¹³ Jayave Eliseo jei mburuvicha guasu Israel pegua pe: —¿Maera pa reyu chekotɨ? Ekua eparandu ñeemombeúa reta nderu jare ndesɨ pe oyeokuai vae reta pe. Mburuvicha guasu Israel pegua jekuae jei ye: —Mbaetɨ, echa yandeYa orereru ore mboapɨ mburuvicha guasu reta oremee vaerä Moab iñemuña reta pe.

¹⁴ Jayave Eliseo jei chupe: —YandeYa Imbaepuere yae ete vae jee re, jae jóvai aï vae, mbaetɨ yave mona amboete Josafat mburuvicha guasu Judá pegua, ngaraa tëi viña ayeapɨsaka neñee re, ngaraa etei viña amae nderé.

¹⁵ ¡Ërei, añave peru cheve oikatu ombaembopu vae! Jare ombaembopu vae omboɨpɨ ombaembopu yave, yandeYa imbaepuere ou Eliseo re;

¹⁶ jare jei: —YandeYa jei: “Peyapo jeta ɨnoonga tuicha vae kuae ɨvɨtɨ päu rupi.

¹⁷ Echa yepe tëi mbaetɨ ɨvɨtu, ngaraa ave vi peecha okɨ vae, ërei kuae ɨvɨtɨ päu tɨnɨeta ɨ pe, jare peɨuta, jökorai vi perɨmba reta.

¹⁸ Kuae mbaeä etei ko yandeYa pe, echa jae omeeta vi pepo pe Moab iñemuña reta.

¹⁹ Jare pemboaita opaete tëta guasu reta oñekëse kavi vae reta, jare tëta guasu reta jërakua yae vae jare peitɨta opaete ɨvɨra ikavi vae reta, opata peyatɨ opaete ɨesaɨ reta, jare perokomeguata ita reta pe opaete ko reta.”

²⁰ Pɨareve pe, ndeimbove yave, mɨmba oyeyukagüe oñemee yave, ou ɨ Edom kotɨ güi tape ou vae rupi, jare opa tɨnɨe jókuae ɨvɨ.

²¹ Jare opaete Moab iñemuña reta oikuaa yave mburuvicha guasu reta yogüeru oñeraro jae reta ndive vae, oyomboatɨ reta, okuakuaa ramo vae güive kutɨ jare opa yogüɨraja oñeñono jókuae ɨvɨ jembeɨ pe.

²² Pɨareve pe, ndeimboveasɨ opüa reta yave, kuaraɨ omoembipe ɨ; Moab pegua reta oecha mombɨrɨ güi ɨ pɨ̈ta tugüɨ rami.

²³ Javoi jei reta: “Tugüɨ ko pea. Mburuvicha guasu reta ko oyoupii aeño oñeraro jare opa oyoyuka. ¡Añave yaja yayemombae imbaembae reta oeyagüe re!”

²⁴ Ërei Moab iñemuña reta yogüeru oväe Israel iñemuña reta jeyupa pe yave; Israel iñemuña reta ñogüɨnoe chupe reta, opa ombotekuarai, oaɨkuemoña reta jare opa oyuka.

²⁵ Javoi omboai reta tëta guasu reta, jare güɨrokomegua reta ita pe ko reta, oyatɨ reta opaete ɨesaɨ, oitɨ reta opaete ɨvɨra ia vae. Jaeño opɨta tëta guasu Kir-hareset, ërei tamamboka regua reta oñova jare opɨ̈ro.

²⁶ Mburuvicha guasu Moab pegua oikuaa ñamɨri ma ñeraro pe yave, oiporu iyeupe seteciento kuimbae oikatu kɨsepuku pe oñeraro vae, oasa reta vaerä mburuvicha guasu Edom pegua kotɨ. Ërei mbaetɨ ipuere reta.

²⁷ Jayave oipɨɨ taɨrɨpɨ, jae jekoviarä opɨtata tëi mburuvicha guasurä vae, jare oyuka omee mɨmba oyeyukagüe opaetei oyeapɨ vae oñemee rami, tëta guasu ikësea iárambo. Kuae mbaetɨ etei ikavi Israel iñemuña reta pe, jare osɨrɨ reta joko güi, opa ye oyerova iɨvɨ kotɨ.