2 REYES 24 - Biblia Guarani Tumpa Iñee

¹ Joacim oiko mburuvicha guasurä yave, Nabucodonosor mburuvicha guasu Babilonia pegua oë ñeraroa pe. Jare Joacim oiko jae jeia re mboapɨ año rupi, ërei jaɨkue rupi oñemopüa ikotɨ.

² Ërei yandeYa ombou Joacim kotɨ oporepeña sundaro reta Caldeaɨgua reta, Siriaɨgua reta, Moab iñemuña reta, Amón iñemuña reta. Kuaekuae reta ombou Judá kotɨ opa vaerä omboai, yandeYa jei iñeemombeúa reta rupi rami.

³ Opaete kuaekuae reta ou Judá kotɨ yandeYa iporookuai rupi, ombosɨrɨ vaerä iyeugüi, Manasés imbaeyoa reta jeko pegua, opaete jae oyapogüe re;

⁴ jekombae reta oyuka vae re, echa jeta yae Jerusalén pe jekombae reve omano vae; jáeramo yandeYa mbaetɨ oipota iñɨ̈ro chupe.

⁵ Ïru mbaembae Joacim regua, opaete oyapogüe oyekuatía oï tembikuatía pe, Judá pegua mburuvicha guasu reta regua oyekuatía oïa pe.

⁶ Joacim omano yave, oñotɨ reta iñemuñagüe reta oñeotɨa pe; taɨ Joaquín oguapɨ jekovia pe mburuvicha guasurä.

⁷ Jókuae güire mbaetɨ ye ma mburuvicha guasu Egipto pegua oë iɨvɨ güi, echa mburuvicha guasu Babilonia pegua opa opɨ̈ro chugüi opaete güɨnoigüe, ɨ̈aka raɨ Egipto pegua güive ojoi oväe ɨ̈aka Éufrates kotɨ.

Joaquín jare imborɨa reta opa oyererajauka iɨvɨ güi Babilonia pe

⁸ Joaquín güɨnoi dieciocho año omboɨpɨ oï mburuvicha guasurä yave; mboapɨ yasɨ oiko mburuvicha guasurä Jerusalén pe. Ichɨ jee Nehusta, Elnatán tayɨ, jae ko Jerusalén pegua.

⁹ Oyapo ikavimbae yandeYa jesa róvai, opaete mbaembae tu oyapo rami.

¹⁰ Jayave rupi oporepeña tëta guasu Jerusalén re Nabucodonosor mburuvicha guasu Babilonia pegua isundaro reta, jare opa oñova reta tëta guasu.

¹¹ Javoi ou vi Nabucodonosor tëta guasu Jerusalén kotɨ, iyɨvɨrigua mburuvicha reta oñova ma güɨnoi yave.

¹² Jayave Joaquín mburuvicha guasu Judá pegua oë oövaiti mburuvicha guasu Babilonia pegua; jae jare ichɨ, jare iyɨvɨrigua reta, itenondegua juvicha reta, jare isundaro ruvicha reta; mburuvicha guasu Babilonia pegua oipɨɨ, juri año ma oiko mburuvicha guasurä yave.

¹³ Jaɨkue rupi Nabucodonosor güɨnoe joko güi opaete yandeYa jo pe mbaembae jepɨ vae oñeñovatu vae, jare opaete mbaembae jepɨ vae mburuvicha guasu jo pe oñeñovatu vae, jare opaetei oyoka mbaembae oro pegua, Salomón mburuvicha guasu Israel pegua oyapo yandeYa jo peguarä vae reta, yandeYa omoërakua rami.

¹⁴ Güɨraja tembipɨɨrä opaete Jerusalén pegua reta, opaete mburuvicha reta, opaete kuimbae jëia ñeraro pe vae reta, opaete ipoki ombaapo vae reta, jiero pe oparavɨkɨ vae reta; opaete reve oupitɨ diez mil tembipɨɨ. Mbaetɨ etei metei ave opɨta vae, jaeño iparavete vae reta.

¹⁵ Nabucodonosor güɨraja vi tembipɨɨrä Babilonia kotɨ Joaquín jare ichɨ, jare jembireko reta, mburuvicha iyɨvɨrigua reta jare opaete jókuae ɨvɨ pe imbaepuere yae vae reta. Opa güɨraja tembɨpɨɨrä Jerusalén güi Babilonia kotɨ.

¹⁶ Opaete kuimbae ñeraro regua reta, jae ko siete mil; jare ipoki mbae oyapo vae reta, jare jiero pegua mbaravɨkɨ oyapo vae reta, jae ko mil; jare opaete ñeraro pe jëia vae reta güɨraja tembipɨɨrä mburuvicha guasu Babilonia pegua.

¹⁷ Jare mburuvicha guasu Babilonia pegua omboguapɨ Matanías mburuvicharä Joaquín jekovia pe, jae ko Joaquín itutɨ; oipoepɨ jee chugüi Sedequías pe.

Sedequías oiko mburuvicha guasurä Judá pe

¹⁸ Sedequías güɨnoi veintiuno año omboɨpɨ oï mburuvicha guasurä yave; once año oiko mburuvicha guasurä Jerusalén pe, ichɨ jee Hamutal, Jeremías tayɨ, tëta Libna pegua.

¹⁹ Jare oyapo ikavimbae yandeYa jesa róvai, opaete Joacim oyapo rami.

²⁰ Jáeramo yandeYa iyarasɨ Jerusalén jare Judá kotɨ, opa omoë omombo iyeugüi regua. Sedequías oñemopüa mburuvicha guasu Babilonia pegua re.