2 REYES 22 - Biblia Guarani Tumpa Iñee

Josías oiko mburuvicha guasurä Judá pe

¹ Josías güɨnoi ocho año omboɨpɨ oï mburuvicha guasurä yave; treinta y un año oiko mburuvicha guasurä Jerusalén pe. Ichɨ jee Jedida, Adaía tayɨ, jae ko Boscat pegua.

² Oyapo ikavi vae yandeYa jesa róvai, oiko iñemuñagüe David oiko rami kavi, opiambae reve ketɨ ave.

Tembikuatía mborookuai regua oñeväe

³ Dieciocho año ma Josías oiko mburuvicha guasurä yave, omondo yandeYa jo kotɨ ombaekuatía vae Safán, Azalía taɨ, Mesulam jɨmɨmino, jei chupe körai:

⁴ —Ekua sacerdote tenondegua Hilcías pɨri, ere chupe tomboatɨ opaete korepoti yandeYa jo pe oyererugüe, öke iyangarekoa reta omboatɨ opaete tëta pegua reta güi vae,

⁵ jare tomee mbaravɨkɨ oyapouka vae reta ipo pe, yandeYa jo oyapo kaviuka vae reta pe, jare jae reta tomee yandeYa jo oyapo kavi vae reta pe, jëgua jëguagüe oyapo kavi reta vaerä vae pe;

⁶ ipoki oparavɨkɨ ɨvɨra pe vae reta pe, oparavɨkɨ vae reta itenondegua pe, o iyapoa reta pe, oyegua vaerä ɨvɨra jare ita oñeopagüe, o oñeñono kavi vaerä.

⁷ Agüɨye vi korepoti mbovɨ ra oyeporu vae re toyeparandu chupe reta, echa mboromboete rupi kavi ko oyapo reta mbae.

⁸ Jayave sacerdote tenondegua Hilcías jei ombaekuatía vae Safán pe: “Aväe chupe tembikuatía mborookuai regua Moisés jembikuatía yandeYa jo pe.” Hilcías omee tembikuatía Safán pe jare omongeta.

⁹ Jaɨkue rupi Safán ojo imiari mburuvicha guasu pe jókuae tembikuatía omongeta vae re, jei chupe: —Nderembiokuai reta güɨnoe korepoti yandeYa jo pe oime vae, jare omee mbaravɨkɨ oyapouka vae reta pe, yandeYa jo oyapo kaviuka vae reta pe.

¹⁰ Jaeramiño vi ombaekuatía vae Safán omombeu mburuvicha guasu pe, jei körai: “Sacerdote Hilcías omee cheve metei tembikuatía.” Jare Safán omongeta mburuvicha guasu jóvai.

¹¹ Javoi mburuvicha guasu oendu yave jókuae tembikuatía pe mborookuai oï vae, omondoro jemimonde ipɨatɨtɨ güi,

¹² mburuvicha guasu oyókuai sacerdote Hilcías, jare Ahicam, Safán taɨ, Acbor, Micaías taɨ, ombaekuatía vae Safán jare Asaías mburuvicha guasu iyɨvɨrigua, jei chupe reta:

¹³ “Pekua peparandu yandeYa pe cheré, jare opaete vae re, jare opaete Judá pegua reta re, kuae tembikuatía pe ñee reta oñeväe vae regua; echa yandeYa iyarasɨ yae ko yandekotɨ, ñaneñemuñagüe reta mbaetɨ kuae tembikuatía pegua ñee reta jei vae oendu jeko pegua, mbaetɨ vi oyapo reta opaete oyekuatía oï pɨpe vae.”

¹⁴ Jayave sacerdote Hilcías, Ahicam, Acbor, Safán jare Asaías yogüɨraja ñeemombeúa kuña Hulda pɨri, Salum jembireko; Salum jae ko Ticva taɨ, Harhas jɨmɨmino, temimonde reta iñovatúa. Hulda oiko tëta guasu Jerusalén jembeɨ kotɨ, jare omomiari reta yave,

¹⁵ jae jei chupe reta: —Körai jei yandeYa Israel iTumpa: “Pere jókuae kuimbae pembou peparandu vaerä cheve vae pe:

¹⁶ Körai jei yandeYa: ‘Che aruta kuae tëta re, jare pɨpegua reta re opaete susere kuae tembikuatía pe oyekuatía oï vae, mburuvicha guasu Judá pegua omongeta vae;

¹⁷ echa chereeya reta jare oapɨ reta ikäti kavi vae incienso tumpa ambuae reta pe, chemboarasɨuka reta opaete oyapogüe reta rupi; jáeramo chearasɨ opüa kuae tëta kotɨ, jare mbaetɨta chearasɨ poi.’

¹⁸ Ërei, jókuae mburuvicha guasu Judá pegua pembou peparandu vaerä yandeYa pe vae pe pere: Körai jei yandeYa Israel iTumpa: ‘Tembikuatía pegua ñee reta reendu ramo,

¹⁹ jare reyembopɨatɨtɨ jare reñemomichi cheróvai reendu ramboeve kuae tëta regua jare pɨpegua reta kotɨ jae vae, echa opata oñemokañɨtei, jare yogüɨrekota susere rupi vae yave, nde remondoro nderemimonde ndepɨatɨtɨ güi jare reyaeo cheróvai, jare che aendu vi ndeve. Jáeramo che amee,

²⁰ remano vaerä mbɨakatu rupi, rogüɨrajaukata neñemuñagüe reta ñogüɨnoia pe, mbaetɨta reecha opaete susere, che aruta kuae tëta re vae.’ ” Javoi mburuvicha guasu omondo vae reta oyerova ye imiari reta chupe.