2 REYES 21 - Biblia Guarani Tumpa Iñee

Manasés oiko mburuvicha guasurä Judá pe

¹ Manasés güɨnoi doce año omboɨpɨ oï mburuvicha guasurä yave; cincuenta y cinco año oiko mburuvicha guasurä Jerusalén pe. Ichɨ jee Hepsiba.

² Ërei oyapo ikavimbae yandeYa jesa róvai, yandeYa opa omoë omombo Israel iñemuña reta jenonde güi vae tëtaguasu reta jeko pɨ̈chɨi rami.

³ Echa omopüa pɨau ye mbaemboete renda ɨvɨtɨ rupigua reta tu Ezequías opa omboaigüe, jare omopüa mɨmba oyeyuka oyeapɨ jese vae reta Baal pe jare oyapo metei Asera iä, Acab, mburuvicha guasu Israel pegua oyapo rami, jare omboete opaete ara ipo reta,

⁴ omopüa vi mɨmba oyeyuka oyeapɨ jese vae yandeYa jo pe, kuae re yandeYa jei: “Che añonota cheree Jerusalén pe.”

⁵ Omopüa ye ïru mɨmba oyeyuka oyeapɨ jese vae reta opaete ara ipo reta peguarä, yandeYa jo joka mókoi oï vae ñavo pe.

⁶ Oapɨuka vi taɨ reta tumpa-raanga pe, oyemoambeko mbae oecha vaerä mbaekuaa rupi jare oikuaa vaerä mbae maratuta vae re, oñono imbaekuaa vae reta jare maratuta vae imombeúa reta, jökorai ombojeiete ikavimbae yandeYa jesa róvai vae rupi omboarasɨuka.

⁷ Jare oñono metei Asera iä jae oyapogüe yandeYa jo pe; kuae o re yepe yandeYa jei David pe jare taɨ Salomón pe: “Che añonota cheree jekuae avei pegua kuae o pe, Jerusalén pe, kuae aiparavo Israel iñemuña reta güi vae.

⁸ Mbaetɨta amoë amombo Israel iñemuña reta kuae ɨvɨ güi, iñemuñagüe reta pe amee vae güi, oñovatu reta jare oyapo reta yave opaete mbaembae che ayókuai reta vae, jare opaete cherembiokuai Moisés oyókuai vae.”

⁹ Ërei jae reta mbaetɨ oendu. Manasés oasa ete oyapouka ikavimbae chupe reta tëtaguasu pegua reta jeko kavimbae, yandeYa opa omokañɨtei Israel iñemuña reta güi vae güi.

¹⁰ Jáeramo yandeYa imiari jembiokuai ñeemombeúa reta rupi, jei reve:

¹¹ “Manasés mburuvicha guasu Judá pegua oyapo kuae teko pɨ̈chɨi jeko pegua, jare oasa ete oyapo ikavimbae opaete amorreo reta oyapo vae güi, ndei jae oiko mbove yogüɨreko vae reta güi, jare oyapouka vi mbaeyoa Judá pe, itumpa-raanga reta rupi.

¹² Jáeramo, che peYa Israel iTumpa jae körai: ‘Mase che aruta ikavimbae Jerusalén re jare Judá re, jare kia nunga vae oendu yave ombopɨakɨɨye yaeta.

¹³ Ajäata Jerusalén, Samaria ajäa rami etei, jare Acab iñemuña reta ajäa rami; aeyata ikɨambae, metei ñae oyeyoe yave oyembovapɨ oñeñono rami.

¹⁴ Jare opaete chembae vae reta jembɨregüe aeyata iyangarekoambae, ameeta jovaicho reta ipo pe, opa vaerä oyemombouka opaete jovaicho reta pe.

¹⁵ Ikavimbae oyapo reta cheresa róvai jeko pegua chemboarasɨuka reta, iñemuñagüe reta ñogüɨnoe Egipto güi yave güive añave regua.’ ”

¹⁶ Manasés jeta yae vi oyuka jekombae Jerusalén pe, jókuae iyoa rupi oyapouka mbaeyoa Judá pe vae güi, jökorai oyapo ikavimbae yandeYa jesa róvai.

¹⁷ Ïru mbaembae Manasés regua, opaete oyapogüe, jare mbaeyoa oyapo vae, oyekuatía oï tembikuatía pe, Judá pegua mburuvicha guasu reta regua oyekuatía oïa pe.

¹⁸ Jare Manasés omano yave oñotɨ reta jo iyɨpɨ pegua ko raɨ pe, ko raɨ Uza imbae pe; taɨ Amón oguapɨ jekovia pe mburuvicha guasurä.

Amón oiko mburuvicha guasurä Judá pe

¹⁹ Amón güɨnoi veintidó año omboɨpɨ oï mburuvicha guasurä yave, jare mókoi año oiko mburuvicha guasurä Jerusalén pe. Ichɨ jee Mesulemet, Haruz tayɨ, jae ko Jotba pegua.

²⁰ Ërei oyapo ikavimbae yandeYa jesa róvai, tu Manasés oyapo rami,

²¹ omomoe opaete tu jeko eteiño, omboete tumpa-raanga reta tu omboete vae reta.

²² Oeya yandeYa iñemuñagüe reta iTumpa, mbaetɨ oiko yandeYa jemimbota rupi.

²³ Jare Amón imborɨa reta oñemopüa ikotɨ, jare oyuka reta jo pe.

²⁴ Ërei jókuae tëta pegua reta oyuka opaete jókuae mburuvicha guasu Amón kotɨ oñemopüa vae reta; taɨ Josías omboguapɨ reta jekovia pe mburuvicha guasurä.

²⁵ Ïru mbaembae Amón regua oyekuatía oï tembikuatía pe, Judá pegua mburuvicha guasu reta regua oyekuatía oïa pe.

²⁶ Oñotɨ reta jɨvɨa pe, ko raɨ Uza imbae pe; taɨ Josías omboguapɨ reta jekovia pe mburuvicha guasurä.