2 REYES 20 - Biblia Guarani Tumpa Iñee

Ezequías imbaerasɨ jare iñepoano

¹ Jókuae ara rupi Ezequías imbaerasɨ yae ete, oyuka vaerä güɨnoi. Jare ñeemombeúa Isaías, Amoz taɨ ou ípɨri, jare jei chupe: —YandeYa jei: “Emboarakuaa kavi neñemuña reta, echa remanota, mbaetɨta ma rekuera.”

² Jayave Ezequías oyerova ovapetea kotɨ jare oyerure yandeYa pe, jei körai:

³ “Romoñera cheYa, romoñera nemaendúa vaerä cheré, kërai che aguata nderóvai jupi rupi kavi jare opaete chepɨa ndive ayeokuai ndeve, ayapo ndeve mbaembae reta ndepɨa potaa rupi kavi.” Jare oyaeo ipɨatɨtɨ yae reve.

⁴ Jare Isaías ndei jókuae mburuvicha joka mbɨte pe oväe ojo mbove, yandeYa jei Isaías pe körai:

⁵ “Eyerova ye jare ere Ezequías pe, chembae vae reta juvicha pe: ‘Körai jei yandeYa, neñemuñagüe David iTumpa: Che aendu ndeyerure jare aecha nderesaɨ. Rombogüerata jare mboapɨ araa pe reota chetupao pe.

⁶ Ameeta reikove ye quince año, nde jare kuae tëta guasu aepɨta Asiria pegua mburuvicha guasu ipo güi. Che ayangarekota kuae tëta guasu re, cherembiokuai David aaɨu jeko pegua jare che ayeaɨu jeko pegua.’ ”

⁷ Javoi Isaías oyapasouka ɨva, jare jökorai oyapo reta chupe jare oñono reta mburuvicha guasu re, jete imbaerasɨa re, jare okuera.

⁸ Ezequías oparandu yepe Isaías pe körai: —¿Këraita pa aikuaa yandeYa chembogüerata ko vae, jare kuae güire mboapɨ araa pe ajata ko yandeYa jo pe vae?

⁹ Isaías jei chupe: —Kuae mɨakañɨ jae ko yandeYa oechaukata ndeve vae; yandeYa oyapota ko jei vae: ¿Reipota pa kuaraɨ iküaraɨa oñejäa vae osɨrɨ jenonde kotɨ payandepo ani reipota pa osɨrɨ ye payandepo jaɨkue kotɨ?

¹⁰ Ezequías jei chupe: —Kuaraɨ iküaraɨa ojo jenonde kotɨ vae yavaimbae ko, yavai vae, jae ko jaɨkue kotɨ ojo ye vaerä.

¹¹ Jayave ñeemombeúa Isaías oyerure yandeYa pe, jare yandeYa ombouka ye küaraɨa jaɨkue kotɨ payandepo ma osɨrɨ tëi Acaz iora ojäa pɨpe vae pe.

Ezequías omboresive Babilonia güi yogüerugüe

¹² Jókuae año rupi Merodac-baladán, Baladán taɨ, mburuvicha guasu Babilonia pegua ombou ñee jerajaa reta tupapire reta ndive jare mbota Ezequías peguarä, echa oikuaa Ezequías imbaerasɨ oï vae.

¹³ Ezequías oyeapɨsaka jese reta oechauka opaete jo pegua mbaembae jepɨ vae oñeñovatu vae: Korepoti, oro, mbae ipiche kavi vae, ikäti kavi yae vae, jare tembiporu reta ñeraro pegua, opaete imbaembae jepɨ vae oñeñovatúa pegua; mbaetɨ metei ave Ezequías oechaukambae vae jo pegua jare opaete güɨnoigüe.

¹⁴ Jayave ñeemombeúa Isaías ou mburuvicha guasu Ezequías pɨri, jare jei chupe: —¿Ketɨ güi pa yogüeru jókuae kuimbae reta jare mbae pa jei reta ndeve? Ezequías jei: —Yogüeru mombɨrɨ güi; Babilonia güi yogüeru.

¹⁵ Isaías jekuae oparandu ye chupe: —¿Mbae pa oecha reta ndero pe? Ezequías jei: —Oecha reta opaete oï chero pe vae, mbaetɨ etei mbae, che aechaukambae chupe reta vae.

¹⁶ Jayave Isaías jei Ezequías pe: —Eyeapɨsaka kuae yandeYa iñee re:

¹⁷ “Oväeta ara opaete mbaembae ndero pegua reta jare opaete neñemuñagüe reta omboatɨgüe opa vaerä oyereraja Babilonia pe, mbaetɨ eteita mbae opɨta kuae pe, jei yandeYa.

¹⁸ Ndegüi oñemuña vae reta ave oyererajaukata Babilonia pe, jare oapiao retata oyapo vaerä tembiokuairä mburuvicha guasu jo peguarä.”

¹⁹ Jayave Ezequías jei Isaías pe: “YandeYa iñee remombeu vae jaekavi ko.” Echa jei yepe iyeupe: “Aikove aiko ramboeve oimeñota mbɨakatu jare mbae jupi vae.”

Ezequías imano

²⁰ Ïru mbaembae Ezequías regua, opaete imbaepuere regua, ɨrɨru oyapo vae, ɨrape, güɨraja vaerä ɨ tëta guasu pe vae, oyekuatía oï tembikuatía pe, Judá pegua mburuvicha guasu reta regua oyekuatía oïa pe.

²¹ Jare Ezequías omano yave oñotɨ reta iñemuñagüe reta oñeotɨa pe; taɨ Manasés oguapɨ jekovia pe mburuvicha guasurä.