2 REYES 15 - Biblia Guarani Tumpa Iñee

Azarías oiko mburuvicha guasurä Judá pe

¹ Jeroboam, veintisiete año ma oiko mburuvicha guasurä ɨvɨ Israel re yave, Azarías, Amasías taɨ omboɨpɨ oï mburuvicha guasurä Judá pe.

² Azarías güɨnoi diecisei año omboɨpɨ oï mburuvicha guasurä yave, jare oiko mburuvicha guasurä cincuenta y dos año Jerusalén pe. Ichɨ jee Jecolías, jae ko Jerusalén pegua.

³ Oyapo jupi vae yandeYa jesa róvai, opaete mbaembae tu Amasías oyapo rami kavi.

⁴ Ërei ngatu jeseve mbaetɨ opa oyemboai mbaemboete renda ɨvɨtɨ rupigua, echa opaete vae reta jekuaeñoi omee mɨmba oyeyukagüe jare oapɨ reta ikäti kavi vae incienso jokoropi.

⁵ Ërei yandeYa oiporarauka mburuvicha guasu pe mbaerasɨ pire ókui vae rupi ojo omano regua, jökorai mburuvicha guasu oiko tee ïru o pe; Jotam, opɨta oyangareko vaerä tu iporookuaía re, oï mburuvicharä opaete vae re.

⁶ Ïru mbaembae Azarías regua, opaete oyapogüe, oyekuatía oï tembikuatía pe, Judá pegua mburuvicha guasu reta regua oyekuatía oïa pe.

⁷ Azarías omano yave, oñotɨ reta iñemuñagüe reta oñeotɨa pe, David Jëta guasu pe; taɨ Jotam oguapɨ jekovia pe mburuvicha guasurä.

Zacarías oiko mburuvicha guasurä Israel pe

⁸ Azarías, treinta y ocho año ma oiko mburuvicha guasurä Judá pe yave, Zacarías, Jeroboam taɨ omboɨpɨ oiko mburuvicha guasurä ɨvɨ Israel re; oiko mburuvicha guasurä Samaria pe ova yasɨ.

⁹ Ërei oyapo ikavimbae yandeYa jesa róvai, iñemuñagüe reta oyapo rami; mbaetɨ oyembosɨrɨ Jeroboam, Nabat taɨ iyoa reta güi, Israel iñemuña reta pe mbaeyoa oyapouka vae güi.

¹⁰ Javoi Salum, Jabes taɨ oñemopüa Zacarías kotɨ, jare oyuka opaete vae reta jóvai; jae oguapɨ jekovia pe mburuvicha guasurä.

¹¹ Ïru mbaembae Zacarías regua oyekuatía oï tembikuatía pe, Israel pegua mburuvicha guasu reta regua oyekuatía oïa pe.

¹² Körai oyeapo yandeYa jei Jehú pe vae, jei yave chupe: “Nderaɨ reta yogüɨrekota mburuvicha guasurä Israel pe irundɨ ñemuña regua.”

Salum oiko mburuvicha guasurä Israel pe

¹³ Uzías treinta y nueve año ma oiko mburuvicha guasurä Judá pe yave, Salum, Jabes taɨ omboɨpɨ oï mburuvicha guasurä Israel re; oiko metei yasɨ mburuvicha guasurä Samaria pe;

¹⁴ echa Manahem, Gadi taɨ ou Tirsa kotɨ güi Samaria pe, jare oyuka Salum, Jabes taɨ; javoi oguapɨ jekovia pe mburuvicha guasurä.

¹⁵ Ïru mbaembae Salum regua, jare Zacarías kotɨ oñemopüa vae regua, oyekuatía oï tembikuatía pe, Israel pegua mburuvicha guasu reta regua oyekuatía oïa pe.

¹⁶ Jayave Manahem omboai tëta Tifsa, jare opaete joko pe yogüɨreko vae, jare vi opaete iyɨvɨrigua reta Tirsa güive opa omboai, echa mbaetɨ oipea reta chupe tëta guasu reta jöke reta. Jare oipeka opaete kuña reta ipurúa vae jɨe.

Manahem oiko mburuvicha guasurä Israel pe

¹⁷ Azarías treinta y nueve año ma oiko mburuvicha guasurä Judá pe yave, Manahem, Gadi taɨ omboɨpɨ oï mburuvicha guasurä ɨvɨ Israel re; oiko payandepo año mburuvicha guasurä Samaria pe.

¹⁸ Oyapo ikavimbae yandeYa jesa róvai; opaete ara jae mburuvicha guasurä oiko ramboeve mbaetɨ oyembosɨrɨ Jeroboam, Nabat taɨ iyoa reta güi, Israel iñemuña reta pe mbaeyoa oyapouka vae güi,

¹⁹ jae oiko mburuvicha guasurä yave, ou Pul, mburuvicha guasu Asiria pegua oporepeña jókuae ɨvɨ re, jare Manahem omee treinta y tres mil kilo korepoti, omborɨ vaerä oñemomɨ̈rata mburuvicha guasurä,

²⁰ omboepɨ vaerä jókuae oñererökuavee mburuvicha guasu Siria pegua pe vae, Manahem omee mborookuai ombaemboepɨ vaerä oikokatu vae reta medio kilo oasa rupi korepoti. Jökorai mburuvicha guasu Asiria pegua ojo ye iɨvɨ kotɨ jare mbaetɨ ye opɨta jókuae ɨvɨ pe.

²¹ Ïru mbaembae Manahem regua, opaete oyapogüe oyekuatía oï tembikuatía pe, Israel pegua mburuvicha guasu reta regua oyekuatía oïa pe.

²² Manahem omano yave, taɨ Pekaía oguapɨ jekovia pe mburuvicha guasurä.

Pekaía oiko mburuvicha guasurä Israel pe

²³ Azarías cincuenta año ma oiko mburuvicha guasurä Judá pe yave, Pekaía, Manahem taɨ omboɨpɨ oï mburuvicha guasurä Israel re; mókoi año oiko mburuvicha guasurä Samaria pe.

²⁴ Oyapo ikavimbae yandeYa jesa róvai, mbaetɨ oyembosɨrɨ Jeroboam, Nabat taɨ iyoa reta güi, Israel iñemuña reta pe mbaeyoa oyapouka vae güi.

²⁵ Ërei Peka, Pekaía isundaro ruvicha Remalías taɨ oñemopüa ikotɨ, oyemborɨuka Argob, Arié jare cincuenta kuimbae Galaad pegua pe, ombopere jare oyuka Samaria pe, mburuvicha guasu jo pe; javoi Peka oguapɨ jekovia pe mburuvicha guasurä.

²⁶ Ïru mbaembae Pekaía regua, opaete oyapogüe oyekuatía oï tembikuatía pe, Israel pegua mburuvicha guasu reta regua oyekuatía oïa pe.

Peka oiko mburuvicha guasurä Israel pe

²⁷ Azarías cincuenta y dos año ma oiko mburuvicha guasurä Judá pe yave, Peka, Remalías taɨ omboɨpɨ oï mburuvicha guasurä ɨvɨ Israel re; veinte año oiko mburuvicha guasurä Samaria pe.

²⁸ Oyapo ikavimbae yandeYa jesa róvai, mbaetɨ oyembosɨrɨ Jeroboam, Nabat taɨ iyoa reta güi, Israel iñemuña reta pe mbaeyoa oyapouka vae güi.

²⁹ Peka oiko mburuvicha guasurä Israel pe yave ou Tiglat-pileser Asiriaɨgua reta juvicha guasu, jare opɨ̈ro Ijón, Abel-bet-maaca, Janoa, Cedes, Hazor, Galaad, Galilea jare opaete ɨvɨ Neftalí; jare joko pegua reta opa güɨraja tembipɨɨrä Asiria pe.

³⁰ Jayave Oseas, Ela taɨ oñemopüa Peka, Remalías taɨ kotɨ jare oyuka, jare jae oguapɨ jekovia pe mburuvicha guasurä, Jotam, Uzías taɨ veinte año ma oiko mburuvicha guasurä yave.

³¹ Ïru mbaembae Peka regua, opaete oyapogüe, oyekuatía oï tembikuatía pe, Israel pegua mburuvicha guasu reta regua oyekuatía oïa pe.

Jotam oiko mburuvicha guasurä Judá pe

³² Peka, mokoía año ma oiko mburuvicha guasurä Israel pe yave, Jotam, Uzías taɨ omboɨpɨ oï mburuvicha guasurä Judá pe.

³³ Güɨnoi veinticinco año omboɨpɨ oï mburuvicha guasurä yave; diecisei año oiko mburuvicha guasurä Jerusalén pe. Ichɨ jee Jerusa, jae ko Sadoc tayɨ.

³⁴ Jare oyapo jupi vae yandeYa jesa róvai, oyapo opaete tu Uzías oyapo rami kavi,

³⁵ echa jae oyapo öke ɨvate vae yandeYa jo kotɨ yaikea peguarä. Ërei ngatu jeseve mbaetɨ opa oyemboai mbaemboete renda ɨvɨtɨ rupigua, echa opaete vae jekuaeñoi omee mɨmba oyeyukagüe jare oapɨ reta ikäti kavi vae incienso jokoropi.

³⁶ Ïru mbaembae Jotam regua, opaete oyapogüe oyekuatía oï tembikuatía pe, Judá pegua mburuvicha guasu reta regua oyekuatía oïa pe.

³⁷ Jókuae ara rupi yandeYa omboɨpɨ omondo oporepeña Judá re Rezín mburuvicha guasu Siria pegua jare Peka, Remalías taɨ.

³⁸ Jotam omano yave oñotɨ reta iñemuñagüe reta oñeotɨa pe, iñemuñagüe David Jëta guasu pe; taɨ Acaz oguapɨ jekovia pe mburuvicha guasurä