2 REYES 12 - Biblia Guarani Tumpa Iñee

Joás oiko mburuvicha guasurä Judá pe

¹ Jehú, chiúa año ma oiko mburuvicha guasurä yave, Joás omboɨpɨ oï mburuvicha guasurä; oiko mburuvicha guasurä cuarenta año Jerusalén pe. Ichɨ jee Sibia, jae ko Beerseba pegua.

² Jare Joás oyapo jaekavi vae yandeYa jesa róvai, opaete ara sacerdote Joiada omboarakuaa ramboeve.

³ Ërei ngatu jeseve mbaetɨ omboai mbaemboete renda ɨvɨtɨ rupigua, echa opaete vae jekuaeñoi omee mɨmba oyeyukagüe jare oapɨ reta ikäti kavi vae incienso jokoropi.

⁴ Metei ara Joás jei sacerdote reta pe: —Opaete korepoti mbotarä oyereru yandeYa jo pe vae, jare metei ñavo kuimbae ombaemboepɨ vaerä güeru vae, jare opaete korepoti reta metei ñavo ipɨakatu rupi güeru yandeYa jo peguarä vae,

⁵ metei ñavo pe sacerdote reta peipɨɨ perëtara Israel iñemuña reta güi, oyeapo kavi vaerä tupao jöke reta jare opaete ovapetea oyeka yekagüe.

⁶ Ërei veintitré añoa re ma Joás oiko mburuvicha guasurä yave, sacerdote reta mbaetɨño oñono kavi tupao jovapetea oyeka yekagüe.

⁷ Jayave mburuvicha guasu Joás oenɨi sacerdote tenondegua Joiada jare ïru sacerdote reta, jare jei chupe reta: —¿Maera pa mbaetɨño peñono kavi tupao jovapetea oyeka yekagüe? Añave, agüɨye ye mo peipɨɨ peyeupe korepoti perëtara reta güi; pemee tupao jovapetea oyeka yekagüe oyeapo kavi vaerä.

⁸ Sacerdote reta ikɨ̈reɨ agüɨye vaerä ma omboresive tëta pegua reta güi ikorepoti, jare mbaetɨta ma vi jae reta ñogüɨnoi oyapo kavi vaerä tupao jovapetea oyeka yekagüe.

⁹ Jayave sacerdote tenondegua Joiada oipɨɨ metei käjou jare itapa omombu, jare oñono mɨmba oyeyuka oyeapɨ jese vae iyɨke pe, iyakatu kotɨ, jökorai yandeYa itupao pe oike vae, jare sacerdote reta öke järoa oñono joko pe opaete korepoti oñemee yandeYa jo pe vae.

¹⁰ Jare oikuaa reta tɨnɨe ma käjou pe korepoti yave, ou mburuvicha guasu pe ombaekuatía vae jare sacerdote tenondegua jare oipapa reta korepoti tupao pe oï vae, jare oñovatu reta.

¹¹ Jare omee reta korepoti oupitɨ kavi vaerä jókuae mbaravɨkɨ iyapoa reta pe, yandeYa jo re oyangareko vae reta pe; jare jae reta omboepɨ, ɨvɨra iñopaa reta pe, jare yandeYa jo iñono kavía reta pe,

¹² o iyapoa reta pe, ita iñopaa reta pe, ogua reta vaerä ɨvɨra, ita oñeopagüe; oyapo kavi reta vaerä yandeYa jo jovapetea oyeka yekagüe jare opaete joko pe oyeporu vae jepɨrä, o oñeñono kavi vaerä.

¹³ Ërei jókuae korepoti oyereru yandeYa jo pe vae güi mbaetɨ oyeapo tasa reta korepoti pegua, mechero imecha oyeasɨa pɨpe vae tenasa reta, tasa guasu reta, mimbɨguasu reta, mbaetɨ metei ave ïru tembiporu reta oro ani korepoti pegua oyeapo yandeYa itupao peguarä,

¹⁴ echa omee reta mbaravɨkɨ iyapoa reta pe, jókuae korepoti pe omboepɨ reta oyeapo kavi vaerä yandeYa jo.

¹⁵ Jare mbaetɨ oyeparandu jókuae kuimbae reta pe oñemee korepoti vae pe, oparavɨkɨ vae reta pe ombaemboepɨ vae reta pe, echa oyapo reta jupi rupi kavi.

¹⁶ Korepoti oñemee mbaeyoa re vae, jare teko re vae, mbaetɨ oyereraja yandeYa jo pe; echa sacerdote reta imbaerä ko.

¹⁷ Jókuae ara rupi Hazael mburuvicha guasu Siria pegua ou oñeraro tëta Gat pegua reta ndive, jare omoamɨri, jaɨkue rupi oasa Jerusalén kotɨ.

¹⁸ Jáeramo Joás, mburuvicha guasu Judá pegua oipɨɨ opaete mbota reta; iñemuñagüe Josafat, Joram jare Ocozías, Judá pegua mburuvicha guasugüe reta oñono tee Tumpa pe vae, jare jae oñono teegüe, jare opaete oro yandeYa jo pe jare mburuvicha guasu jo pe mbaembae jepɨ vae oñeñovatúa pegua, jare omondo Hazael, mburuvicha guasu Siria pegua pe; javoi Hazael ojo ye Jerusalén güi.

¹⁹ Ïru mbaembae Joás regua, opaete oyapogüe oyekuatía oï tembikuatía pe, Judá pegua mburuvicha guasu reta regua oyekuatía oïa pe.

²⁰ Jare iyɨvɨrigua reta oñemopüa ikotɨ jare oyuka reta Milo pe, jae ojo Sila kotɨ oiko yave.

²¹ Iyɨvɨrigua reta Josacar, Simeat taɨ jare Jozabad, Somer taɨ ko ombopere, jökorai omano. Oñotɨ reta iñemuñagüe reta oñeotɨa pe, David Jëta guasu pe; jare taɨ Amasías oguapɨ jekovia pe mburuvicha guasurä.