2 REYES 10 - Biblia Guarani Tumpa Iñee

Jehú opa omokañɨtei Acab iñemuña reta

¹ Acab güɨnoi setenta taɨ reta Samaria pe, jayave Jehú oikuatía tupapire omondo joko pegua mburuvicha reta pe, tenondegua reta pe jare Acab iñemuña reta iyangarekoa reta pe, jei körai:

² “Kuae tupapire ojo oväe peve rupive, peruvicha taɨ reta re peyangareko peï vae, kavayu regua reta, käretou pegua ñeraro regua, tëta guasu oñekëse kavi vae reta, jare tembiporu ñeraro pegua reta re peyangareko vae,

³ peiparavo peyeupe peruvicharä taɨ reta güi ipoki jare jupi vae, jare pemboguapɨ tu jekovia pe; peepɨ peruvicha.”

⁴ Ërei kuae reta okɨɨye yae, jei reta: “Jókuae mókoi mburuvicha guasu viña pa mbaeä etei chupe, ¿vɨtei pa yande?”

⁵ Jare omaangareko vae, mburuvicha tëta guasu pegua, tenondegua reta, jare michia reta iyangarekoa reta omondo jei Jehú pe: “Nderembiokuai ko ore, royapota opaete nde oreokuai vae; ërei mbaetɨta roiparavo mburuvicha guasurä metei ave, eyapo oreve nde reipota vae.”

⁶ Jayave Jehú omondo ye mokoía ma tupapire jei körai: “Cherembiokuai ko pe yave, jare peipota ko peyapo cheporookuai reta yave, pɨareve peru cheve peruvicha taɨ reta iñäkagüe Jezreel pe.” Jare jókuae setenta mburuvicha guasu taɨ reta vae, ñogüɨnoi tenondegua reta ndive, iyangarekoa reta ndive.

⁷ Jayave kuae tupapire omboresive reta yave, oipɨɨ reta jókuae setenta vae mburuvicha guasu taɨ reta, jare oñaseokɨ̈ti reta; javoi iñäkagüe reta oñono reta kanata pe jare omondo reta tëta guasu Jezreel pe,

⁸ jare ou metei ñee jerajaa imiari Jehú pe, jei körai: —Güeru reta mburuvicha guasu taɨ reta iñäkagüe. Jehú jei chupe reta: —Toñono reta mókoi atɨ tëta guasu jöke pe pɨareve regua.

⁹ Pɨareve pe Jehú oë omae jare oyemboɨ reveño jei opaete vae pe: —Pe reta ko jupi, che ko añemopüa cheruvicha re jare ayukauka; ërei, ¿kia pa oyuka opaete kuae reta?

¹⁰ Peikuaa kavi peï, mbaetɨ eteita yandeYa imiari Acab iñemuña reta kotɨ vae opɨta oyeapombae. YandeYa etei oyapo jembiokuai Elías rupi omombeu vae.

¹¹ Jökorai Jehú oyukauka opaete Acab iñemuña reta Jezreel pe opɨtagüe, opaete juvicha reta, opaete jëtara reta, jare isacerdote reta, mbaetɨ etei metei ave jembɨre.

¹² Javoi opüa joko güi ojo Samaria kotɨ; jare tape rupi ma oiko yave, ojo oväe vecha iyangarekoa reta omaeapía pe,

¹³ joko pe oväe chupe Ocozías, mburuvicha guasu Judá pegua jëtaragüe reta. Jehú oparandu chupe reta: —¿Kia pa pe reta? Jae reta jei: —Ocozías jëtaragüe reta ko ore, royu ko romae mburuvicha guasu taɨ reta re jare jembireko imembɨ reta re.

¹⁴ Jayave Jehú jei jupiegua reta pe: —Peipɨɨ kuae reta jekove reve. Jare oipɨɨ reta güire, oñaseokɨ̈ti reta vecha iyangarekoa reta omaeapía pe iɨkua iyɨpɨ pe cuarenta y dos kuimbae, oeyambae reve metei ave.

¹⁵ Jehú ojo joko güi yave, oñoväe Jonadab, Recab taɨ ndive, jese ojo omae vae, Jehú oyapo chupe maraetei, jare jei chupe: —¿Ikavi pa ndeyemongeta chekotɨ, che cheyemongeta ndekotɨ rami? —¡Jökorai ko! —jei Jonadab. —Jökorai ko yave, emee cheve ndepo —jei Jehú. Jonadab omee chupe ipo, jare Jehú omboyeupi ikäretou pe,

¹⁶ jei reve chupe: —Chemoïru jare reechata cherägüɨro yandeYa re vae. Jökorai omboyeupi ikäretou pe.

¹⁷ Jare Samaria pe ojo oväe yave, oyuka opaete Acab iñemuña reta Samaria pe opɨta vae, opaetei omokañɨtei regua, yandeYa jei Elías rupi rami.

Jehú omokañɨ Baal pe mbaemboete oyeapo vae

¹⁸ Jaɨkue rupi Jehú omboatɨ opaete vae, jare jei chupe reta: —Acab mbaetɨ nunga omboete Baal, ërei che amboete yaeta.

¹⁹ Jayave peenɨi cheve opaete Baal regua omoërakua vae reta, opaete jembiokuai reta, jare opaete isacerdote reta; agüɨye metei ave toata, echa ayapota ikavi yae vae mɨmba oyeyukagüe, Baal pe. Oumbae vae omanota. Ërei Jehú yepe oyapo kuae yembotavɨ, oyuka vaerä opaete Baal omboete vae;

²⁰ jáeramo oporookuai oñemoërakua vaerä metei arete tuicha vae oyeapota Baal pe vae; jökorai oyeapo.

²¹ Jaɨkue rupi Jehú omondo ñee jerajaa opaete ɨvɨ Israel rupi jare yogüeru opaete Baal omboete vae reta, jökorai mbaetɨ metei ave oumbae vae. Jare oike reta Baal itupao pe jare Baal itupao opaetei tɨnɨeasɨ yeyé.

²² Jayave Jehú jei jókuae temimonde reta iyangarekoa pe, güeru vaerä temimonde reta mbaemboete pegua, opaete oyeokuai Baal pe vae reta peguarä, jare jókuae temimonde reta iyangarekoa oyapo jökorai.

²³ Jaɨkue rupi Jehú jare Jonadab, Recab taɨ ndive oike tupao pe, jare jei Baal omboete vae reta pe. —Agüɨye pemaeño toike metei ave pepɨte pe yandeYa jembiokuai reta, Baal omboete vae reta katuaiño peï.

²⁴ Jare Baal omboete vae reta oike tupao pe omee reta vaerä mɨmba oyeyukagüe jare mɨmba oyeyukagüe opaetei oyeapɨ vae. Jökorai yave Jehú oñono ikatu pe ochenta kuimbae, jare jei chupe reta: —¡Kia nunga vae omaeño otekuarai oipotagüe kuimbae che añono ipo pe vae yave, omboepɨta jekove pe!

²⁵ Opa ma omee reta mɨmba oyeyukagüe opaetei oyeapɨ vae, Jehú jei jókuae ikatu pe ñogüɨnoi vae reta pe jare mburuvicha reta pe: —¡Peike jare opa peyuka! ¡Agüɨye totekuarai metei ave! Jare oyuka reta kɨsepuku pe jare oipɨso oeya reta öke rupi. Jaɨkue rupi oike reta o mbaemboetea pe, Baal itupao pe,

²⁶ jare güɨnoe reta mbae iägüe Baal itupao güi, jare opa oapɨ reta.

²⁷ Oyoka reta vi Baal iä, omboai reta Baal itupao, jare opɨta mañakarä; jökorai opɨta añave rupi.

²⁸ Jökorai Jehú omboai Israel güi Baal.

²⁹ Ërei ngatu Jehú mbaetɨ oyembosɨrɨ amogüe Jeroboam Nabat taɨ iyoa reta güi, Israel iñemuña reta pe oyapouka mbaeyoa vae güi, echa jekuaeñoi omboete toro taɨrusu vae iägüe oro pegua, Bet-el pe jare Dan pe oï reta vae.

³⁰ YandeYa jei Jehú pe: “Reyapo jupi vae cheresa jóvai jeko pegua, reyapo Acab iñemuña reta pe opaete chepɨa rupi ayemongeta rami kavi, nderaɨ reta oguapɨta mburuvicha guasurä Israel pe irundɨ ñemuña reta regua.”

³¹ Ërei ngatu Jehú mbaetɨ oñemokɨ̈reɨ oguata vaerä Israel iYa Tumpa iporookuai rupi opaete ipɨa ndive, mbaetɨ oyembosɨrɨ Jeroboam iyoa reta güi, Israel iñemuña reta pe oyapouka mbaeyoa vae güi.

³² Jókuae ara rupi yandeYa omboɨpɨ omomichi ɨvɨ Israel. Hazael omoamɨri Israel iñemuña reta opaete ɨvɨ jembeɨ rupi:

³³ Jordán güive kuaraɨ oëa kotɨ, opaete ɨvɨ Galaad, Gad, Rubén jare Manasés iñemuña reta iɨvɨ, Aroer oï ɨ̈aka raɨ Arnón iyɨpɨ pe vae güive, Galaad jare Basán kotɨ oväe regua.

³⁴ Ïru mbaembae Jehú regua, opaete oyapogüe, opaete mbae tuichagüe oyapo vae oyekuatía oï tembikuatía pe, Israel pegua mburuvicha guasu reta regua oyekuatía oïa pe.

³⁵ Jehú omano yave oñotɨ reta iñemuñagüe reta oñeotɨa pe, Samaria pe; jare taɨ Joacaz oguapɨ jekovia pe mburuvicha guasurä.

³⁶ Jehú oiko mburuvicha guasurä ɨvɨ Israel pe, tëta guasu Samaria pe vae, jae ko veintiocho año.