2 REYES 1 - Biblia Guarani Tumpa Iñee

Ocozías imano

¹ Acab omano güire, Moab pegua reta oñemopüa Israel pegua reta re.

² Ocozías mburuvicha guasu Israel pegua, oa jo iventana güi Samaria pe. Jayave omondo ñee jerajaa reta, jei chupe reta: Pekua peparandu Baal-zebub tumpa Ecrón pegua pe, akuerata ra ko kuae chembaerasɨ güi vae.

³ Jayave yandeYa iaraɨgua jei Elías Tisbe pegua pe: “Epüa ekua eövaiti mburuvicha guasu Samaria pegua iñee jerajaa reta, jare ere chupe reta: ¿Mbaetɨ pa Israel pe Tumpa, peo vaerä peparandu Baal-zebub tumpa Ecrón pegua pe?

⁴ Jáeramo körai jei yandeYa: ‘Ngaraa ma repüa jókuae nderupa güi, remanota.’ ” Elías ojo, jare oyapo jókuae araɨgua oyókuai vae.

⁵ Ñee jerajaa reta opa ye oyerova mburuvicha guasu oïa pe yave, mburuvicha guasu oparandu chupe reta: —¿Maera pa peyerova ye?

⁶ Jae reta jei: —Metei kuimbae orerövaiti jare jei oreve: Peyerova ye jókuae mburuvicha guasu pembou vae kotɨ, jare pere chupe: “Körai jei yandeYa: ¿Mbaetɨ pa Israel pe Tumpa, nde remondo vaerä reparandu Baal-zebub tumpa Ecrón pegua pe? Ngaraa ma repüa jókuae nderupa güi, remanota.”

⁷ Jare mburuvicha guasu oparandu chupe reta: —¿Kërai pa jókuae kuimbae oë perövaiti vae, kuae ñee reta jei peve vae?

⁸ Jare jae reta jei chupe: —Metei kuimbae jemimonde camello jaagüe pegua, jare ikuakuaa guasupi pegua vae. Jayave mburuvicha guasu jei: —¡Elías Tisbe pegua ko!

⁹ Jupivei omondo metei sundaro ruvicha, cincuenta sundaro ndive Elías kotɨ. Yogüɨraja oväe yave, Elías oguapɨ oï ɨvɨtɨ iyapɨte re. Jayave jókuae sundaro ruvicha jei chupe: —¡Tumpa iñeemombeúa, mburuvicha guasu jei regüeyɨ vaerä joko güi!

¹⁰ Elías jei: —Tumpa iñeemombeúa ko che, toa ara güi tata, topa tanderapɨ jókuae cincuenta ndesundaro ndive. Jupiveiño oa ara güi tata, jare opa oapɨ jókuae sundaro ruvicha, cincuenta isundaro ndive.

¹¹ Mburuvicha guasu jekuae omondo ye ïru sundaro ruvicha, cincuenta sundaro ndive, jare kuae ojo jei Elías pe: —¡Tumpa iñeemombeúa, mburuvicha guasu jei regüeyɨ vaerä aramoete pegua!

¹² Elías jei chupe: —Tumpa iñeemombeúa ko che, toa ara güi tata, topa tanderapɨ jókuae cincuenta ndesundaro ndive. Jupiveiño oa ara güi tata, jare opa oapɨ jókuae sundaro ruvicha cincuenta isundaro ndive.

¹³ Mburuvicha guasu jekuae omondo ye mboapɨa ma sundaro ruvicha, cincuenta sundaro ndive. Ërei jókuae sundaro ruvicha oyeupi ojo Elías oïa pe, jare oyetavatɨka jóvai, jare omoñera jei reve: —Tumpa iñeemombeúa, romoñera neɨ̈ro vaerä cheve, jare kuae cincuenta chesundaro pe;

¹⁴ echa tenonde yogüeru mókoi ma sundaro ruvicha, cincuenta isundaro reta ndive vae re oa ara güi tata jare opa oapɨ reta. Che romoñera cheparareko vaerä.

¹⁵ Jayave yandeYa iaraɨgua jei Elías pe: —Ekua jae ndive, agüɨye ekɨɨye chugüi. Elías ogüeyɨ jare ojo jókuae sundaro ruvicha ndive mburuvicha guasu jóvai,

¹⁶ jare jei chupe: —Körai jei yandeYa: “Remondo ñee jerajaa reta oparandu vaerä Baal-zebub tumpa Ecrón pegua pe, ¿mbaetɨ pa Israel pe Tumpa, reparandu vaerä chupe? Kuae jeko pegua ngaraa ma repüa jókuae nderupa güi, echa remanota.”

¹⁷ Jare Ocozías omano yandeYa jei Elías rupi rami. Ocozías mbaetɨ taɨ jeko pegua, tɨvɨ Joram oguapɨ jekovia pe mburuvicha guasurä. Kuae oasa mokoía año ma Joram, Josafat taɨ, oiko mburuvicha guasurä Judá pe yave.

¹⁸ Ïru mbaembae Ocozías oyapogüe, oime oyekuatía oï tembikuatía pe, Israel pegua mburuvicha guasu reta regua oyekuatía oïa pe.