2 Pedro 3 - Biblia Guarani Tumpa Iñee

YandeYa ou yeta vae regua

¹ Cherɨvɨ aaɨu vae reta, mokoía ma ko aikuatía peve, mókoi reve pe pomboarakuaa peyemongeta kavi vaerä jese.

² Aipota peyemongeta ñeemombeúa oñeñono tee Tumpa peguarä vae reta jei vae re, jare vi mborookuai yandeYa Yandemboasa vae mborookuai omee jemimondo reta rupi vae;

³ Aipota peikuaa kuae räri: Ara taɨkuegua reta pe oimeta oporoyóyai yóyai vae reta, isoo jemimbota ikavimbae reño yogüɨreko vae reta,

⁴ jei retata: “¿Kërai pa Cristo ou yeta vae regua? Echa ñaneñemuñagüe reta omano güive opaete mbaembae oyovakeño oï ɨvɨ Tumpa oyapo güive.”

⁵ Jae reta mbaetɨ oipota imaendúa kërai arakae ete Tumpa iñee rupi oyapo ara jare ɨvɨ, jare ɨguasu reta re oï ɨvɨ,

⁶ jáeramo ɨ rupi opa omboai opaete ɨvɨ jayave rupi.

⁷ Ërei ara jare ɨvɨ oime añave vae oñeñovatu ko oï Tumpa iñee rupi tata peguarä iporojäa iara peguarä jare iyoa vae reta okañɨtei yave peguarä.

⁸ Cherɨvɨ aaɨu vae reta, ikavi ko peikuaa vaerä kuae: YandeYa pe metei ara mil año ramiño ko jare mil año metei ara ramiño ko.

⁹ YandeYa oipotaíä ko ndeiño ombopo iñee, echa yandeYa ipɨaguasu ko yandeve, mbaetɨ ramo oipota metei ave okañɨtei, jae oipota opaete oyerova ikotɨ vae.

¹⁰ Ërei yandeYa ou ye yave, outa ko imonda vae pɨ̈tu yave ou rami; jayave ara reta täta jɨaputa jare opaete mbaembae reta jendɨta opa oyemboai, ɨvɨ jare opaete mbaembae pɨpegua okaita.

¹¹ Jare peikuaa ma opaete mbaembae añave yaecha vae opata oyemboai, jáeramo ¡ikavi ko peiko vaerä peyoambae reve, Tumpa pemboete reve!

¹² Peäro peipota yae reve Tumpa iporojäa iara. Echa jayave ara reta jendɨ reve opata oyemboai. Jare opaete mbaembae jendɨ reve tɨkuita.

¹³ Ërei yande reta ñaäro ñaï jae güɨrökuavee vae, ara ipɨau vae jare ɨvɨ ipɨau vae, joko pe oimeta jupi vaeño.

¹⁴ Jáeramo, cherɨvɨ aaɨu vae reta, peäro ramboeve peï kuae mbaembae reta, peyeandu agüɨye vaerä peñeväeuka pekɨa reve ani teko pe, jaeño mbɨakatu pe.

¹⁵ Peikuaa kërai yandeYa ipɨaguasu ko yandeve yayemboasauka vaerä. Jare kuae re yanderɨvɨ Pablo yaaɨu vae oikuatía ma peve arakuaa Tumpa omee chupe vae rupi.

¹⁶ Jare opaete jembikuatía pe omombeu jókuae re. Amo pe yavai yaikuaa vaerä, jare amogüe vae oikuaambae vae jare ipɨ̈ratambae iporogüɨrovia pe vae güɨrova, jaeramiño vi güɨrova ïru Tumpa Iñee jae reta aeño oñemokañɨtei vaerä.

¹⁷ Jáeramo cherɨvɨ aaɨu vae reta, peikuaa voi ma kuae mbaembae reta ramo peyeandu, agüɨye peyererajauka ikavimbae vae oyapo vae reta pe, jare pea peporogüɨrovia pe täta ma peï vae güi.

¹⁸ Ërei pekuakuaa Tumpa ipɨakavi pe, jare yandeYa Jesucristo yandemboasa vae peikuaa kavi vae pe. ¡Jae toyemboeteuka añave jare jekuaekuae avei rupi! ¡Amén!