2 Pedro 2 - Biblia Guarani Tumpa Iñee

Añetembae re oporomboe vae reta

¹ Ërei Israel pegua reta ipɨte pe oime arakae ñemombeúa jaanga reta, jökorai oimeta pepɨte pe añetembae oporomboe vae reta, jae reta güɨroiketa mboromboe añetembae ikavimbae yae vae, oikuakuta yandeYa jae reta imboasaa; jae reta aeño güeruta iyeupe reta jarembae Tumpa iyarasɨ.

² Jare jeta vae omomoeta jae reta iporomboe kavimbae, jae jeko pegua ïru vae reta jeita ñee ikavimbae mboromboe añete vae kotɨ.

³ Jare jae reta ikorepoti potarai güi pembotavɨta iporomboe rupi pekorepoti re. Ërei ɨma ma Tumpa ojäa reta. Jáeramo okañɨteita ma.

⁴ Echa Tumpa mbaetɨ iñɨ̈ro araɨgua iyoa vae reta pe. Jae omombo ara güi tata guasu pe. Joko pe oñeapɨti ñogüɨnoi pɨtumimbi pe jare oäro ñogüɨnoi Tumpa ojäa reta vaerä.

⁵ Jaeramiño vi arakae Tumpa mbaetɨ iñɨ̈ro oporogüɨroviambae vae reta pe. Jaeño güɨroasayepe ɨporu guasu güi Noé jare ïru chiu vae reta ndive. Echa Noé omombeu tëi ïru vae reta pe oyapo vaerä jupi vae. Jáeramo Tumpa ombou ɨporu guasu iyoa vae reta re.

⁶ Jaeramiño vi Tumpa ombou tata tëta guasu reta Sodoma jare Gomorra re opa vaerä omboai. Jaeño opɨta itanimbugüe. Jökorai opɨta opaete jeko kavimbae vae reta oikuaa vaerä.

⁷ Ërei Tumpa güɨroasayepe Lot. Echa jae jupi jare oyembopɨaä mbaembae pɨ̈chɨi vae jókuae jekopochɨ vae reta oyapogüe re.

⁸ (Echa jókuae jupi vae oiko jae reta ipɨte pe vae, oecha jare oendu ikavimbae vae oyapo reta vae. Jáeramo oyembopɨaä ara ñavo.)

⁹ Jaeramiño vi yandeYa oikuaa kërai oepɨ vaerä mbaemboavai güi jae jeia re yogüɨreko vae reta, jare oñovatu jupimbae reta oiporara vaerä Tumpa iporojäa iara pe.

¹⁰ Jae ko omomoe soo jemimbota pɨ̈chɨi vae oyapo vae reta jare güɨröɨro reta yandeYa imbaepuere. Ipɨayemboete reta jare ñäteɨ oyapo mburuvicha reta jei vae, mbaetɨ oipoɨu reta jei vaerä ikavimbae vae Tumpa iaraɨgua reta kotɨ;

¹¹ ërei araɨgua reta imbaepuere tuicha yae tëi reve mbaetɨ ipuere oyepopeyu jókuae reta kotɨ yandeYa jóvai.

¹² Ërei jókuae jupimbae vae oyapo vae reta jei ikavimbae vae oikuaambae vae kotɨ. Jae reta ko mɨmba reta iyarakuaambae reta rami jókuae oyepɨɨ jare oyeyuka vaerä rami. Jökorai okañɨtei retata.

¹³ Jare kuae jekoviata chupe reta jupimbae vae oyapo vae re, echa ara ñavo ikaviecha chupe reta oyapo vaerä, jókuae reta ko pɨ̈chɨi yae vae, pembotavɨ jare opuka peré okaru ramboeve pe ndive.

¹⁴ Jae reta jekuaeño oipota oyuvanga menda re, mbaetɨ iyangapɨɨ reta iyoa, oyapouka mbaeyoa iporogüɨrovia re mbaetɨ ipɨ̈rata vae reta pe, jae reta oyepokuaa imbaepotarai, Tumpa oyepopeyu ma jese reta.

¹⁵ Echa oeya reta tape isɨmbi vae, jare opa jopa reta, omomoe reta Balaam, Beor taɨ jeko, echa Balaam oaɨu yae korepoti jupimbae vae oyapo vae rupi omongana vae;

¹⁶ Tumpa omboeta chupe iyoa re; echa metei mburika imiari chupe vae rupi oyopia ñeemombeúa yarakuaambae reve oyapota tëi vae.

¹⁷ Jókuae jupimbae vae oyapo vae reta ɨkua ɨmbae rami ko, amapɨtu ɨvɨtu tätagüe opa güɨraja vae rami ko; jókuae reta oäro güɨnoi pɨtumimbi yae vae jekuae avei pegua.

¹⁸ Imiari reta oyemboete reve ñee añetembae, ombotavɨ ye soo jemimbota rupi oyembosɨrɨ tëi ma ikavimbae vae iyapoa reta güi vae.

¹⁹ Jókuae reta güɨrökuavee chupe reta yeyora, ërei jae reta etei ikavimbae vae jembiokuai reta ko. Echa mbaepuere güɨnoi yanderé vae ñanerenoi ipo igüɨ pe.

²⁰ Echa kia oyembosɨrɨ mbae ikavimbae vae ɨvɨ pegua güi yandeYa Jesucristo yandemboasa vae oikuaa vae rupi, ërei taɨkue rupi oyapo ye yave ñamɨri ma ko, jare ou opɨta ikavimbae yae tenonde oiko vae güi.

²¹ Echa ikavi ko agüɨye etei oikuaa viña jupi vae regua, jare oyerova ye mborookuai oñemee chupe vae güi.

²² Echa oyembopo ko jese reta ñee arakuaa pegua jei yave: “Yaɨmba jou ye igüëegüe, jare kuchi oyeyoegüe oyapayere ye tuyuapo pe.”