2 Pedro 1 - Biblia Guarani Tumpa Iñee

Tamaraeme

¹ Che Simón Pedro, Jesucristo jembiokuai jare jemimondo, aikuatía peve pe peupitɨ mborogüɨrovia ikavigüe vae ñaneTumpa jare yandeYa Jesucristo jupi vae rupi, ore rami.

² Tumpa ipɨakavi jare ipɨakatu toï jeta pe reta ndive, peikuaa kavi vaerä Tumpa jare yandeYa Jesús.

Oporogüɨrovia vae reta kërai yogüɨreko vaerä

³ Tumpa omee yandeve imbaepuere rupi yaiko vaerä jare yamboete vaerä; jare opaete kuae ñanoi yaikuaa ramo jókuae yandeparavo iyemboetea jare tuichagüe yae rupi vae.

⁴ Jókuae mbaembae rupi Tumpa oyapo yandeve morogüɨrökuavee ikavigüe yae jare tuichagüe, jókuae rupi ñanoi ma jae omee yandeve vae, peeya ramo opaete ikavimbae ɨvɨ pegua soo jemimbota rupi oime vae.

⁵ Jáeramo, peñemoäta ngatu, pemomɨ̈rata peporogüɨrovia pereko kavi pe; pereko kavi pemomɨ̈rata arakuaa katu pe;

⁶ arakuaa katu pemomɨ̈rata yeopia soo jemimbota pe; yeopia soo jemimbota pemomɨ̈rata mbɨaguasu pe; mbɨaguasu pemomɨ̈rata Tumpa imboete pe;

⁷ Tumpa imboete pemomɨ̈rata mbɨakavi oyoupi vae pe; mbɨakavi oyoupe vae pemomɨ̈rata mboroaɨu pe.

⁸ Opaete kuaekuae penoi yave jare okuakuaa peré yave, ngaraa peikoiño peparavɨkɨ oyekuaambae, jare peikuaa tëiiño yandeYa Jesucristo regua.

⁹ Ërei opaete kuaekuae re oata vae omae kaviä ko; jesaä ko, ñakañɨ ko Tumpa omboai chugüi iyoa oasagüe reta vae güi.

¹⁰ Jáeramo cherɨvɨ reta, jeieteño peñemomɨ̈rata Tumpa pereenɨi jare peparavo vae re, echa jökorai peyapo yave, ngaraa etei pegüɨapi.

¹¹ Jare jökorai yave, oyepeata opaete peve yandeYa Yandemboasa vae Jesucristo iporookuaía opambae.

¹² Jáeramo che jekuaeño pomomaenduata kuaekuae re, yepe tëi peikuaa ma ko jare pepɨ̈rata ma ko añete vae peyemboe jese vae re.

¹³ Jaekavi cheve aiko vae aï ramboeve pomomae vaerä kuae yemboarakuaa reta rupi.

¹⁴ Echa aikuaa jarembaeño amanota ma, yandeYa Jesucristo oikuaauka cheve rami.

¹⁵ Jekuaeño aipota ayemoambeko avei, amano güire pemaendúa avei vaerä opaete kuaekuae reta re.

Cristo iyemboetea oecha vae reta

¹⁶ Roikuaauka peve yandeYa Jesucristo imbaepuere jare kërai jae ou yeta ko vae, mbaetɨ ko roikuaauka peve arakae ndaye oyeapo katugüe. Echa roecha etei ko yandeYa imbaepuere.

¹⁷ Echa omboresive yave yandeRu Tumpa güi mbaemboete, oyeendu ara güi Tumpa imboetea yae vae iñee jei: “Kuae ko jae cheRaɨ aaɨu yae vae. Chemboyerovia vae.”

¹⁸ Jare ore roendu jókuae ñee ou ara güi vae, roï jae ndive ɨvɨtɨ oñeñono tee vae pe yave.

¹⁹ Ñanoi vi ñeemombeúa reta omoërakua vae, jókuae re perovia vae ikavi yae ko. Jókuae ñee ko metei mechero omoembipe pɨtumimbía pe rami köe regua, yasɨtata köembiya omoembipe pepɨa pe regua;

²⁰ ërei peikuaa kavi, kërai Tumpa Iñee pe oñemoërakua vae ikuatiaa iyeugüi aeñoä ko oikuatía;

²¹ echa ñeemombeúa reta mbaetɨ imiari ipɨa jemimbota rupi aeño. Espíritu Santo etei omombeu chupe reta jei reta vaerä Tumpa iñee.