2 Juan 1 - Biblia Guarani Tumpa Iñee

Tamaraeme

¹ Che oporogüɨrovia vae reta itenondegua aikuatía kuae tupapire pe Tumpa peparavo vae, joko pe peyemboatɨ vae reta pe, che poaɨu añete vae re. Mbaetɨ cheño poaɨu, opaete añete vae oikuaa vae reta vi.

² Añete vae oï yanderé vae jeko pegua, oï aveita yande ndive jekuae avei pegua.

³ YandeRu Tumpa jare Taɨ yandeYa Jesucristo ipɨakavi, iporoparareko jare ipɨakatu toï pe ndive añetete rupi jare mboroaɨu rupi.

Peï avei Cristo iporomboe re

⁴ Aikuaa yave joko pegua oporogüɨrovia reta yogüɨreko añete vae rupi, yandeRu yandeokuai vae rami.

⁵ Jare añave pomoñera cherɨvɨ reta, mbaetɨ aikuatía peve mborookuai ipɨau vae rami, jaeño iyɨpɨ güive yaikuaa vae, jae ko yayoaɨu päve vaerä.

⁶ Jare mborookuai jae ko, yaiko vaerä Tumpa iporookuai jei rami. Mborookuai jae ko, yaiko vaerä mboroaɨu rupi, iyɨpɨ güive peendu rami.

⁷ Echa kuae ɨvɨ pe jeta oë oporombotavɨ vae reta, jae reta mbaetɨ omombeu Jesucristo ko jae oyeapo kuimbaerä vae. Kuae jei vae, jae ko oporombotavɨ vae jare Cristo re oyemboyovaicho vae.

⁸ Peyeandu, agüɨye vaerä pemokañɨ peparavɨkɨ reta jekovia, jaeño pemboresive vaerä opaete pembaerä vae.

⁹ Kia ñavo opia jare mbaetɨ oiko Cristo iporomboe re yave, mbaetɨ ko güɨnoi Tumpa. Ërei kia ñavo oiko avei Cristo iporomboe re vae, güɨnoi yandeRu Tumpa jare Taɨ.

¹⁰ Ou yave pépɨri kia, ërei mbaetɨ yave güeru peve kuae nunga mboromboe, agüɨye pemboresive pero pe, agüɨye vi pere chupe: “Ikavi yae ko reyu.”

¹¹ Echa pere yave chupe: “Ikavi yae ko reyu.” Peñemoïru ko jae ndive jembiapo ikavimbae pe.

Aipota aja pépɨri

¹² Oime tëi anoi jeta aikuatía vaerä peve, ërei mbaetɨ aipota aikuatía peve tupapire rupi, echa aipota aja pépɨri ñanemiari vaerä oyoova pe etei, yayerovia yae vaerä.

¹³ Ïru oporogüɨrovia vae Tumpa oiparavo vae reta omondo vi tamaraeme peve. ¡Amén!