2 CRÓNICAS 9 - Biblia Guarani Tumpa Iñee

Mburuvicha kuña Sabá pegua opou Salomón pɨri

¹ Mburuvicha kuña Sabá pegua oendu Salomón jërakua yae vae yave, ou Jerusalén pe jeta iyɨvɨrigua reta ndive, güeru mbae ikäti kavi yae vae camello reta re, jare jeta oro jare ita ipöra vae, ou ojäa vaerä Salomón mbarandu yavai vae pe. Ou oväe Salomón jóvai yave oparandu chupe opaete ipɨa pe güɨnoi oparandu vaerä vae re.

² Ërei Salomón omboyevɨ chupe opaete iparandu reta, jare Salomón pe yavaiä etei omboyevɨ vaerä.

³ Jare mburuvicha kuña oecha Salomón iyarakuaa katu, jare o oyapo mburuvicha iporookuaía peguarä vae,

⁴ jare tembíu reta imesa pegua, isundaro ruvicha reta jo, jembiokuai reta kërai yogüɨreko vae jare jemimonde, jökoraiño vi oporoëɨ vae itenondegua reta, jare yeupika yandeYa itupao guasu kotɨ ojo vae yave, ipɨakañɨ yae opɨta.

⁵ Jare jei mburuvicha guasu pe: “Añetete yepe aendu cheɨvɨ pe mbaembae reyapo vae jare ndearakuaa katu re vae;

⁶ mbaetɨ arovia imiari reta cheve vae reta, ërei añave ayu che etei aecha jare mbaetɨ yepe mbɨte ave ndearakuaa katu yae vae re imiari reta cheve, echa nde oasa ete yepe ndearakuaa katu.

⁷ ¡Toyerovia katu kuimbae reta ñogüɨnoi nde ndive vae, jare nderembiokuai reta ndeɨ́vɨri ñogüɨnoi vae, jare oendu ndearakuaa katu vae!

⁸ ¡Toyemboete ndeYa Tumpa ipɨakatu ndekotɨ vae, jare neñono mburuvicha guasurä vae! ¡Echa neTumpa oaɨu Israel ramo omopɨ̈rata jekuae avei pegua, jáeramo neñono mburuvicha guasurä jese reta, reporookuai vaerä jupi rupi jare sɨmbi rupi!”

⁹ Jare omee mburuvicha guasu pe tres mil noveciento sesenta kilo oro, jare jeta yae mbae ikäti kavi yae vae reta, ita reta ipöra yae vae. Mbaetɨi oyekuaa jeta mbae ikäti kavi vae Israel pe, mburuvicha kuña Sabá pegua ombopota mburuvicha guasu Salomón pe vae rami.

¹⁰ Jaeramiño vi Hiram jembiokuai reta jare Salomón jembiokuai reta güeru oro Ofir güi vae, güeru reta vi ɨvɨra sándalo jee vae, jare ita reta ipöra yae vae.

¹¹ Jare jókuae ɨvɨra sándalo jee vae güi mburuvicha guasu oyapouka yeupika yandeYa jo pe, jare o mburuvicha reta iporookuaía pe, jare arpa, jare ngitara oyapouka otairari vae reta peguarä. Mbaetɨi kuae nunga ɨvɨra oyekuaa Judá pe.

¹² Jare mburuvicha guasu Salomón ombopota mburuvicha kuña Sabá pegua opaete jae oipota vae jare jae oiporu vae, oasa jeta güɨraja jae güeru vae güi. Kuae jaɨkue rupi ojo ye jëta kotɨ iyɨvɨrigua reta ndive.

Salomón imbaeyekou jare jërakua yae vae regua

¹³ Año ñavo Salomón omboresive oro vae oupitɨ veintidó mil kilo,

¹⁴ oyepapambae reve omaemee vae reta güerugüe. Jaeramiño vi mburuvicha guasu reta Arabia pegua jare tëta ruvicha reta jókuae ɨvɨ pegua güeru vi oro jare korepoti Salomón pe.

¹⁵ Mburuvicha guasu Salomón oyapouka vi dosciento yeopiaka tuicha vae oro oyemboipegüe pegua, metei ñavo re oyeporu ova kilo oro.

¹⁶ Jaeramiño vi tresciento yeopiaka michi vae oro oyemboipegüe pegua, metei ñavo re oyeporu mboapɨ kilo oasa mii oro, jare oñono mburuvicha guasu o iporookuaía ombojee “Kaa Líbano” pe vae pe.

¹⁷ Oyapouka vi mburuvicha guasu iguapɨka elefante jäimbukugüe pegua, jare oñovauka oro oyeambae pe.

¹⁸ Mburuvicha guasu iguapɨka güɨnoi ova pɨ̈roka, jare jókuae guapɨka igüɨ pe metei pɨ̈roka oro pegua, jare iyɨke yɨke re jendɨvanga jenda, jare jókuae iyɨpɨ ñavo pe metei yaguapope iä oyemboɨ oï vae,

¹⁹ oï vi joko pe doce yaguapope reta iä jókuae yeupika oñepɨ̈ro jese vae ñavo iyɨke yɨke re, ¡mbaetɨi jókuae nunga guapɨka oyeapo ïru mborookuaía reta rupi!

²⁰ Opaete mburuvicha guasu Salomón ikopa oro pegua, jare opaete kopa o iporookuaía ombojee “Kaa Líbano” pe vae pegua oro oyeambae vae pegua. Salomón iara pe mbaetɨ jepɨ korepoti.

²¹ Echa mburuvicha guasu ibarco ojo Tarsis pe oväe Hiram jembiokuai reta ndive, jare mboapɨ añoa pe metei vese ou barco Tarsis güi, güeru oro, korepoti, elefante jäimbukugüe, machi, jare pavo júguai puku ipara vae.

²² Jare mburuvicha guasu Salomón oyapɨraa opaete mburuvicha reta ɨvɨ pegua, mbaeyekou pe jare arakuaa katu pe.

²³ Jare opaete mburuvicha guasu reta oipota yae oecha etei Salomón, oendu vaerä arakuaa katu Tumpa omee chupe vae.

²⁴ Kuae reta año ñavo güeru mbota mbae ipöra vae korepoti pegua jare oro pegua, temimonde, tembiporu ñeraro pegua, mbae ikäti kavi vae, kavayu reta jare mburika guasu reta.

Salomón omee käretou jare kavayu jeta rupi

²⁵ Salomón güɨnoi vi cuatro mil kavayu jókai ikavayu reta peguarä jare käretou reta jenda, jare doce mil kavayu regua, kuae reta omondo tëta guasu reta käretou ñeraro pegua ñogüɨnoia rupi jare mburuvicha guasu ndive Jerusalén pe.

²⁶ Jare güɨnoi mbaepuere opaete mburuvicha guasu reta re Éufrates güive filisteo reta iɨvɨ kotɨ jare ɨvɨ Egipto jembeɨ pe.

²⁷ Jare mburuvicha guasu omboatɨ korepoti Jerusalén pe ita reta yatɨ rami, jare ɨ̈vɨrare jeta ɨvaviyu jeta ɨvɨpe kavi rupi rami.

²⁸ Güeru reta vi kavayu reta Salomón pe Egipto güi jare opaete ïru tëtaguasu reta güi.

Salomón imano

²⁹ Opaete ïru mbaembae reta Salomón oyapogüe iyɨpɨ güive iyapɨ pe, oyekuatía oï ñeemombeúa Natán jembikuatía pe, jare Ahías Silo pegua jembikuatía mbae oasata vae regua pe jare mbae re oecha voi vae Iddo jembikuatía pe, Jeroboam, Nabat taɨ kotɨ vae regua pe.

³⁰ Salomón oiko mburuvicha guasurä Jerusalén pe opaete Israel re cuarenta año.

³¹ Omano jare oñotɨ reta tu amɨri David Jëta guasu pe. Jare taɨ Roboam oguapɨ jekovia pe mburuvicha guasurä.