2 CRÓNICAS 3 - Biblia Guarani Tumpa Iñee

Salomón omopüa tupao guasu

¹ Salomón omboɨpɨ omopüa tupao guasu yandeYa pe Jerusalén pe, ɨvɨtɨ Moriah re yandeYa oyekuaa tu David pea pe, joko pe David oñono kavi tupao jendarä, jae ko jebuseo Ornán trigo ombopiriría pe.

² Omboɨpɨ mbaravɨkɨ mókoi ara mókoi yasɨa re, irundɨ añoa re ma oiko mburuvicha guasurä yave.

³ Jae kuae reta Salomón omee tupao guasu iguapɨkarä oñejäa vaerä: Veintisiete metro ipukugüe jare chau metro ipɨgüe.

⁴ Korero oï tupao guasu jenonde vae ipɨgüe güɨnoi chau metro, oyovake tupao guasu ipɨgüe ndive, ɨvategüe güɨnoi chau metro jare japɨpe kotɨ oñova oro oyeambae pe,

⁵ jare tupao guasu japɨpe rupi oñono ɨvɨra ciprés jee vae, oñova oro oyeambae pe, jare oikuatía jese karandaɨ jare karena reta iä,

⁶ jare omopöra ita ipöra yae vae reta pe. Jare oro Parvaim pegua oiporu reta.

⁷ Jare oñova oro pe opaete o japɨpe: Ɨvɨra oyepɨasa japɨpe rupi vae reta, ɨvɨra öke igüɨ rupi oyepɨasa oï vae reta, oguambɨ reta jare öke reta, jare oikuatía araɨgua iä ovapetea reta re.

⁸ Jaeramiño vi oyapo tupao guasu japɨpe oñeñono tee kavi yae vae. Pukugüe güɨnoi chau metro oyovake tupao guasu ipɨgüe ndive, jare ipɨgüe güɨnoi chau metro. Jare oñova oro oyeambae pe, oiporu oro vae oupitɨ veinte mil kilo.

⁹ Clavo reta ipoɨ oupitɨ güɨnoi quiniento cincuenta gramo. Jaeramiño vi oñova oro pe oɨvate reta.

¹⁰ Jare jókuae tupao guasu japɨpe oñeñono tee kavi yae vae pe oyapo mókoi araɨgua iä ɨvɨra pegua, kuae reta oñeova vi oro pe.

¹¹ Jókuae araɨgua iä reta ipepo oupitɨ chau metro ipukugüe; echa metei vae ipepo güɨnoi mókoi metro jare veinticinco centímetro, jókuae ojo oupitɨ ovapetea, jare ïru ipepo jaeramiño vi, kuae omondo oupitɨ ïru araɨgua ipepo.

¹² Jökoraiño vi ïru araɨgua iä oyovake ipepo ipukugüe, metei ipepo omondo oupitɨ ovapetea jare ïru ipepo omondo vi oupitɨ ïru araɨgua iä ipepo.

¹³ Kuae araɨgua iä ipepo reta omoata vae oupitɨ chau metro ipukugüe, oyemboɨ ñogüɨnoi jare omae reta o mbɨte re.

¹⁴ Oyapo vi asoya o imboyaoa vecharaagüe jovɨ vae, pɨ̈taü vae, pɨ̈taasɨ vae jare lino pegua; jókuae asoya re omopöra oikuatía araɨgua iä reta.

Mókoi okɨta reta

¹⁵ Jare tupao guasu jenonde kotɨ oyapo mókoi okɨta, metei ñavo diecisei metro seri ɨvategüe, jare okɨta iyapɨte omopöra vae oupitɨ mókoi metro veinticinco centímetro.

¹⁶ Jaeramiño vi oyapo karena jare oñono okɨta reta iyapɨte omopöra vae re; oyapo vi cien temitɨ granada jee vae ia iä, kuae reta oñono karena reta re.

¹⁷ Jare oñono jókuae okɨta reta tupao guasu jenonde, metei iyakatu kotɨ jare ïru iyasu kotɨ. Iyakatu kotɨ oï vae ombojee Jaquín jare iyasu kotɨ oï vae Boaz.