2 CRÓNICAS 2 - Biblia Guarani Tumpa Iñee

Salomón oyapo morogüɨrökuavee päve Hiram ndive

¹ Salomón oyemongeta omboɨpɨ vaerä omopüa tupao guasu Tumpa pe, jare mburuvicha guasu jorä.

² Jare Salomón ombojee setenta mil kuimbae ombaevoɨ vaerä, jare ochenta mil kuimbae oyasɨa vaerä ɨvɨra ɨvɨtɨ reta re, jare tres mil seisciento mbaravɨkɨ re omae vaerä.

³ Jare Salomón omondo jei Hiram mburuvicha guasu Tiro pegua pe: “Eyapo vi che ndive cheru David ndive reyapo rami, nde rembou chupe ɨ̈vɨrare omopüa vaerä jorä.

⁴ Mase, che amopüata tupao guasu cheYa Tumpa peguarä, añono teeta chupe, joko pe oyeapɨ vaerä chupe ikäti kavi vae incienso, jare mbɨyape reta mbaemboete pegua oñemee avei vaerä, jare mɨmba oyeyukagüe opaetei oyeapɨ vae peguarä ndeimbove yave jare kaaru yave, ara mbutuu reta pe, yasɨ pɨau pe, jare cheTumpa iarete guasu yave, kuaekuae oyeapo aveita Israel pe.

⁵ Jókuae tupao guasu amopüata vae tuicha yaeta ko, echa oreTumpa imbaepuere yae vae ko opaete tumpa-raanga reta güi.

⁶ Ërei ¿kia pa ipuere omopüa tupao guasu chupe, echa ara reta ave mbaetɨ ipuere iyave? ¿Kia pa che amopüa vaerä tupao guasu chupe, jaeño oyeapɨ vaerä ikäti kavi vae incienso jae jóvai?

⁷ Embou añave cheve metei kuimbae ipoki jare oikatu oparavɨkɨ oro pe, korepoti pe, jiero iyu vae pe, jiero pe, vecharaagüe pɨ̈taü, pɨ̈ta jare jovɨ vae pe vae. Jare oikatu oyapo mbae iä vae, cheru oiparavogüe reta ñogüɨnoi Judá pe jare Jerusalén pe vae rami vae.

⁸ Embou vi cheve Líbano güi ɨ̈vɨrare, ciprés jare sándalo jee vae, echa aikuaa nderembiokuai reta oikatu oyasɨa ɨvɨra Líbano pe. Cherembiokuai reta yogüɨrajata omborɨ nderembiokuai reta

⁹ oyapo kavi vaerä jeta ɨvɨra cheve, echa tupao guasu amopüata vae tuicha yaeta jare ipöra yaeta ko.

¹⁰ Mase, ameeta jókuae nderembiokuai ɨvɨra oyasɨa vae reta pe veinte mil arova trigo, jare cebada jökoraiño vi ameeta, jare vino ameeta cuatrociento cuarenta mil litro, jare asaite cuatrociento cuarenta mil litro.”

¹¹ Jayave Hiram mburuvicha guasu Tiro pegua omboyevɨ tupapire rupi Salomón pe: “NdeYa Tumpa oaɨu imbae vae Israel iñemuña reta ramo neñono juvicha guasurä.”

¹² Jei ye vi Hiram: “¡Toyemboete Israel iYa Tumpa, ara jare ɨvɨ oyapo vae, echa jae omee mburuvicha guasu David pe metei taɨ yarakuaa katu vae, oikuaa oyapo mbae jupi rupi vae, omopüa vaerä tupao guasu yandeYa pe, jare mburuvicha guasu jorä!

¹³ Amondo ndeve Hiram-abi jae ko metei kuimbae ipoki jare iyarakuaa katu vae,

¹⁴ jae ko metei kuña Dan iñemuña pegua imembɨ, ërei tu jae ko Tiro pegua, jae oikatu oparavɨkɨ oro pe, korepoti pe, jiero iyu vae pe, ita pe, ɨvɨra pe, vecharaagüe pɨ̈taü vae pe, jovɨ vae pe, temimonderä lino pɨ̈ta vae pe, oikatu vi mbae iä oyapo jare opaño mbae iä yaiporu chupe vae, jae oïta nderembiokuai reta ndive jare nderugüe David jembiokuai oikatu oparavɨkɨ vae reta ndive.

¹⁵ Jáeramo cheruvicha, embou ore nderembiokuai reta pe añave: Trigo, cebada, asaite jare vino, jókuae rerökuavee vae.

¹⁶ Jare toroyasɨa Líbano pe ɨvɨra nde reipota vae, jare rogüɨrajata ndeve barco pe ɨguasu rupi Jope pe. Jare joko güi nde erajauka Jerusalén pe.”

¹⁷ Javoi Salomón oipapa opaete ketɨgua kuimbae reta yogüɨreko ɨvɨ Israel pe vae, tu David oipapa güire, jare oväe ciento cincuenta y tres mil seisciento.

¹⁸ Chugüi reta oipapa setenta mil kuimbae ombaevoɨ vaerä, ochenta mil oñopa vaerä ɨvɨra ɨvɨtɨ reta re, jare tres mil seisciento mbaravɨkɨ re omae vae reta, omombaravɨkɨ vaerä jeta vae reta.