2 Corintios 9 - Biblia Guarani Tumpa Iñee

¹ Korepoti pemboatɨgüe oporogüɨrovia vae reta peguarä vae re, jupiä ma aikuatía jese peve vaerä,

² echa kuae re chemiari pomboete reve Macedonia pegua reta pe. Jae chupe reta kërai año oasagüe güire ma pekɨ̈reɨ peporomborɨ, pe Acaya pe peiko vae reta. Jare ïru vae reta oikuaa pekɨ̈reɨ peporomborɨ vae yave, jae reta vi ikɨ̈reɨ.

³ Jáeramo amondo yanderɨvɨ reta pépɨri, agüɨye vaerä oremiariiño pomboete reve kuae re, pemokätɨro voi vaerä penoi che jae rami;

⁴ agüɨye vaerä güɨramoi amogüe Macedoniaɨgua reta yogüɨrajata cherupíe yave, peresapɨa jare oremara ropɨta. Jökoraiño vi pe reta pemarata.

⁵ Jáeramo ayemongeta ikavi ko orerɨvɨ reta räri yogüɨraja vaerä pépɨri, jökorai jae reta ipuereta pemborɨ opa vaerä pemboatɨ korepoti tenonde ma peñererökuavee pemee vaerä vae. Jökorai, che aja pépɨri yave, oyekuaata pemee pepɨa kavi reve vae, mbaetɨ ore poyókuai ramoño.

⁶ Pemaendúa kuae re: Mbovɨ yae omaetɨ vae, mbovɨ yae oarɨvota. Jeta omaetɨ vae jeta vi oarɨvota.

⁷ Metei ñavo tomee, ipɨa pe oñono omee vaerä vae. Agüɨye tomee ipɨatɨtɨ reve ani che jae chupe güiño, echa Tumpa oaɨu oyerovia reve omee vae.

⁸ Imbaepuere yae ko Tumpa omee vaerä peve jeta mbaembae ipɨa kavi jeko pegua, agüɨye vaerä mbae oata peve, jökorai pepuere vaerä peporomborɨ kavi opaete mbaembae pe.

⁹ Oyekuatía oï rami: “Omboyao mbae, paravete vae reta pe; ipɨakavi avei.”

¹⁰ Tumpa ko omee temitɨ, omaetɨ vae pe; jare omee tembíu okaru vae pe. Jae ko omeeta peve jare omoñemuñata peve peremitɨ reta, jeta peporomborɨ vaerä.

¹¹ Jökorai pe reta penoi vaerä jeta mbaembae, pepuere vaerä pemee pekɨ̈reɨ ngatu reve. Jare ore rogüɨraja yave ïru vae reta pe pemeeta vae, jae reta omeeta yasoropai Tumpa pe.

¹² Echa rogüɨraja kuae yemborɨ vae, mbaetɨ ko rogüɨraja mbae oata chupe vaeño, jókuae rupi oñemee vi jeta yasoropai Tumpa pe.

¹³ Echa jókuae omboresive vae rupi omboete retata Tumpa, oecha retata kërai peyapo ko ñee ikavi vae Cristo regua vae. Omboete retata Tumpa pekɨ̈reɨ ngatu reve pemee chupe jare opaete peguarä vae re.

¹⁴ Jökorai vi jae reta oyerureta peré peraɨu reve, Tumpa ipɨakavi oyekuaa peré vae re.

¹⁵ ¡Yasoropai Tumpa pe mbota tuichagüe yae yaupitɨ rapembae kërai ñanemiari jese vae omee yandeve vae re!