2 Corintios 8 - Biblia Guarani Tumpa Iñee

Korepoti omboatɨta oporomborɨ vaerä vae

¹ Añave cherɨvɨ reta, roikuaauka peve kërai oporogüɨrovia vae Macedonia pegua reta omboresive Tumpa ipɨakavi vae.

² Kërai oiporara yae reta reve, oyerovia yae reta; jare yepe tëi iparavete yae reta reve, omee reta jeta ipɨakavi yae reve.

³ Chepuere amombeu peve kërai jae reta omee güɨnoi rupi vae, jare oasa ye omee reta güɨnoi vae güi,

⁴ oremoñera yeyé reta romboresive vaerä jókuae oipota omee vae, jökorai ipuere vaerä omborɨ ïru oporogüɨrovia vae reta.

⁵ Jare oyapo reta jeta yeyé ore roäro vae güi. Echa tenonde oñemee reta yandeYa pe, javoi joko güi oreve vi, Tumpa jemimbota rupi.

⁶ Jáeramo romoñera Tito opa vaerä omboatɨ pepɨte güi jókuae mbɨakavi reve oñemee vae. Echa jae etei omboɨpɨ omboatɨ.

⁷ Pe reta ko tenonde opaete mbaembae pe, mborogüɨrovia pe, ñee pe, arakuaa pe, kɨ̈reɨ ngatu pe jare oreraɨu yae vae pe. Jáeramo peikuaauka vi pepɨa kavi, kuae pemeeta vae rupi.

⁸ Kuae che jae peve vae mbaetɨ ko metei mborookuai. Ërei chemiari ko peve ïru vae reta ikɨ̈reɨ ngatu re, jökorai peechauka vaerä vi peporoaɨu añetete ko vae.

⁹ Peikuaa kavi ko kërai yandeYa Jesucristo ipɨa kavi, kërai jae yepe tëi oikokatu, ërei oyemombaravete peraɨu ramo, peikokatu vaerä.

¹⁰ Che pomboarakuaa kuae re körai: Ikavi ko peyapo vaerä kuae. Echa pemboɨpɨ metei año ma pekɨ̈reɨ reve peporomborɨ vaerä.

¹¹ Jáeramo añave peyapo, jókuae pekɨ̈reɨ peyapo vae, pemee penoi rupi.

¹² Echa ñanekɨ̈reɨ ngatu reve ñamee yave, Tumpa omboyerovia jókuae ñanoi rupi ñamee vae. Tumpa mbaetɨ oeka yandeve mbaetɨ ñanoi vae.

¹³ Echa mbaetɨ ko kuae jae peve ïru vae reta yogüɨreko kavi vaerä, javoi pe reta peporiau vaerä pepɨta, peporomborɨ ramo;

¹⁴ jaeño aipota opaete vae oyovake vaerä. Echa añave pe reta jeta penoi vae güi pepuere pemborɨ iporiau vae reta. Jaeramiño vi jae reta jeta güɨnoi yave ipuereta pemborɨ mbae oata peve yave. Jökorai opaete vae oyovake vaerä.

¹⁵ Oyekuatía oï rami: “Mbaetɨ jembɨre jeta omonoo vae pe, jare mbaetɨ vi oata mbovɨño omonoo vae pe.”

Tito jare iñeïru reta

¹⁶ Amee yasoropai Tumpa pe, kërai jae oñono Tito ipɨa pe kɨ̈reɨ pekotɨ, che anoi rami.

¹⁷ Echa Tito oyapo che ayókuai vae. Ërei ikɨ̈reɨ yae ramo, ojo pekotɨ ipɨa jemimbota rupi aeño.

¹⁸ Jare romondo jupíe orerɨvɨ, opaete rupi oporogüɨrovia vae reta imiari kavi jese vae. Echa jae omoërakua kavi ñee ikavi vae.

¹⁹ Jare jokuaeñoä, echa oporogüɨrovia vae reta ko oiparavo oreïrurä, oremborɨ vaerä güɨraja kuae mbota reta. Kuae mbaravɨkɨ royapo romboeteuka vaerä yandeYa jare roechauka vaerä peporomborɨ.

²⁰ Körai royapo, agüɨye vaerä kia oremboeko kuae jeta korepoti oyemboatɨgüe re royangareko vae re;

²¹ orekɨ̈reɨ royapo jupi rupi yandeYa jóvai, mbaetɨ ïru vae reta jovaiño.

²² Jare romondo vi jae reta jupíe ïru orerɨvɨ. Ore jeta ma roecha jae jäta ngatu opaete mbaembae pe vae. Jare añave jae jei ete jäta ngatu pererovia katu ramo.

²³ Tito jae ko cheïru jae oparavɨkɨ che ndive pomborɨ vaerä. Jókuae ïru orerɨvɨ reta, jae ko oporogüɨrovia vae reta omondo vae, jae reta ko omboete Cristo vae.

²⁴ Jáeramo oporogüɨrovia vae reta oikuaa vaerä, peechauka jókuae mboupa reta pe añetete ko peaɨu vae, jökorai oikuaa reta vaerä añete ko roe chupe reta peregua vae.