2 Corintios 6 - Biblia Guarani Tumpa Iñee

¹ Ore roparavɨkɨ Tumpa peguarä. Jáeramo pomoñera agüɨye vaerä peyuvangaiño Tumpa ipɨakavi re.

² Echa jae jei tembikuatía pe körai: “Ou ma oväe aechauka vaerä cheporoaɨu, jáeramo ayeapɨsaka nderé, ou ma oväe yereroasayepe iara, jáeramo romborɨ.” Mase, añave Tumpa ipɨakavi. Añave ko ara yemboasa pegua.

³ Jekuaeño roiko kavi, agüɨye vaerä kia romboavai. Agüɨye vaerä oreparavɨkɨ kotɨ kia jei mbae ikavimbae.

⁴ Jekuaeño roechauka ïru vae reta pe Tumpa jembiokuai ko ore vae. Mbɨaguasu rupi, tembiporara reta, mbaravete, mbɨatɨtɨ,

⁵ ñenupa reta, tembipɨɨrɨru pe, tekorai pe, mbaravɨkɨ tätagüe, topeɨ reta, yɨmbɨaɨ reta;

⁶ jare vi teko ikɨambae rupi, arakuaa reta, rogüɨropɨa vae rupi, mbɨakavi rupi, Espíritu Santo rupi, añetete vae mboroaɨu rupi,

⁷ ñee añete vae rupi, Tumpa imbaepuere pe, royapo avei jupi vae,

⁸ oremboete vae, orereröɨro vae, oremoërakua pɨ̈chɨi vae, oremoërakua kavi vae, iyapu vae rami oreapo, yepe tëi oremiari añete vae,

⁹ orekuaambae rami, yepe tëi orekuaa kavi, romano potaecha, ërei roikoveño roï, orenupa reta, ërei mbaetɨ romano.

¹⁰ Orepɨatɨtɨ, ërei jekuaeño royerovia; oreparavete, ërei jeta ïru vae reta romboyekou; mbaetɨ etei mbae rogüɨnoi, ërei rogüɨnoi opaete mbae.

¹¹ Corintoɨgua reta, roe kavi yae ko peve, orepɨa roipea reve peve.

¹² Mbaetɨ ko oreporoaɨu re oreräkateɨ peve. Pe reta jökorai orekotɨ.

¹³ Tachemiari peve metei kuimbae imiari imichia reta pe rami. Pe reta oreraɨu vi ore poaɨu rami.

Tumpa oikove vae jo ko yande

¹⁴ Agüɨye peñemoïru oporogüɨroviambae vae reta ndive. Echa ¿këraita pa mbaejupi oñemoïru mbaejupimbae ndive?, ani ¿këraita pa tembipe oñemoïru pɨtumimbi ndive?

¹⁵ ¿Cristo oñemoïruta pa aña ndive?, ani ¿oñemoïruta pa oporogüɨrovia vae oporogüɨroviambae ndive?

¹⁶ ¿Tumpa jo oñemoïruta pa tumpa-raanga reta ndive? Echa pe reta ko jae Tumpa oikove vae jo. Tumpa jei rami: “Aikota jare aguatata ipɨte reta rupi. Aikota jae reta iTumparä jare jae reta yogüɨrekota chembaerä.”

¹⁷ Jáeramo jae jei vi peve körai: “Peë jae reta ipɨte güi, pesɨrɨ, jei yandeYa. Agüɨye peyavɨkɨ mbae ikɨa Tumpa jóvai vae. Jare che pomboresiveta.

¹⁸ Jare che aikota peRurä, jare pe reta peikota cheraɨrä jare cherayɨrä. Jökorai jei yandeYa Imbaepuere yae vae.”