2 Corintios 5 - Biblia Guarani Tumpa Iñee

¹ Echa yaikuaa yanderete opata ko, o yaiko pɨpe vae opa rami. Ërei opa yave Tumpa omeeta yandeve o ipɨau vae opambae vae, ara pe.

² Jáeramo yaiporara yae ñaï, yaipotaecha ma yayemonde jókuae o ara pegua pe.

³ Echa jökorai yayemonde ma yave ara pegua temimonde pe, ngaraa etei ma yanenandi.

⁴ Echa kuae yanderete pe yaiko ramboeve, yaiporara yae ko, echa yaipotaäecha yanenandi yapɨta, jaeño yayemonde ipɨau pe, yanderete mano pegua vae oyepoepɨ vaerä tekove pegua pe, omanombae reve.

⁵ Jare kuaerä Tumpa jökorai yandeapo, omee yandeve Espíritu Santo jae ko oikuaauka jae imbae ete ko yande vae.

⁶ Jáeramo jekuaeño yayerovia, echa yaikuaa kuae ɨvɨ pe yaiko ramboeve, ndeiño ñaï yandeYa ndive.

⁷ Echa yaiko mborogüɨrovia re. Mbaetɨ yaiko yaechagüe reño.

⁸ Ërei jekuaeño yayerovia. Jare yaipotaecha yaeya yanderete, ñaï vaerä yandeYa ndive.

⁹ Jáeramo, yaeka yambopɨakatu vaerä yandeYa kuae ɨvɨ pe yaiko ramboeve, ani jae ndive ma ñaï yave.

¹⁰ Echa opaete vae ñaï ñotai Cristo jóvai, jae ñanejäa vaerä. Metei vae ñavo omboresive vaerä oikove oiko ramboeve oyapo rupi. Ikavi vae jare ikavimbae vae oyapo rupi.

Yembopɨakatu Tumpa ndive

¹¹ Jáeramo, yaikuaa yandeYa ñanejäata ramo ore romokɨ̈reɨ ïru vae reta güɨrovia vaerä yandeYa re. Tumpa orekuaa kërai ko ore vae. Mbae mona pe reta orekuaa vi.

¹² Mbaetɨ ko kuae roe ye peve royemboete vaerä. Jaeño roipota pepɨa katu orekotɨ, pepuere vaerä pemiari jókuae oyemboete yaecha vae reño vae reta pe, mbaetɨ oyemboete ipɨa pe güɨnoi vae re.

¹³ Echa orembokere ko yave, Tumpa peguarä ko. Mbaetɨ orembokere yave, peveguarä ko.

¹⁴ Echa Cristo iporoaɨu oremokɨ̈reɨ yae, echa roikuaa kavi Cristo omano opaete re. Jáeramo opaete yande ñamano vi yandereko güi.

¹⁵ Omano opaete vae re, oikoveño vae reta agüɨye vaerä ma yogüɨreko iyeupeguarä aeño, jaeño yogüɨreko vaerä jókuae omano jare oikove ye jese reta vae peguarä.

¹⁶ Jáeramo añave güive ngaraa yandepɨa pe yayemongeta ïru vae re jae ko ɨvɨ peguaño. Yepe tëi Cristo re ñamae yepi kuae ɨvɨ peguaño ko vae, ërei añave mbaetɨ ma yayemongeta jese jökorai.

¹⁷ Jáeramo, kia güɨrovia Cristo re vae, oa pɨau ye rami ko. Opaete teko tenondegua oasa ma. Ipɨau ma ko.

¹⁸ Tumpa ko oyapo opaete kuae. Jae yandembopɨakatu jae ndive Cristo rupi, jare omee yandeve ñamoërakua vaerä ïru vae reta pe yembopɨakatu regua;

¹⁹ kërai Tumpa ombopɨakatu jae ndive opaete ɨvɨ pegua reta Cristo rupi, agüɨye vaerä ma omboeko reta imbaeyoa reta re. Jare Tumpa yandeokuai ñamoërakua vaerä yembopɨakatu regua.

²⁰ Jáeramo Cristo yandemondo jae jee re jekovia pe, Tumpa etei imiari oï yande rupi rami. Jáeramo pomoñera Cristo jee re, peñeñono kavi ye Tumpa ndive.

²¹ Cristo mbaetɨ etei ko iyoa. Ërei Tumpa omae jese mbaeyoa etei rami yandereko pegua. Jökorai Cristo rupi yayembojupi vaerä.