2 Corintios 4 - Biblia Guarani Tumpa Iñee

¹ Jáeramo mbaetɨ orepɨtu. Echa Tumpa iporoparareko rupi omee oreve royeokuai vaerä chupe.

² Mbaetɨ etei royapo vɨari mbae ñemomarai pegua. Mbaetɨ royapo mbae orepoki rupi roporombotavɨ vaerä. Mbaetɨ vi rogüɨrova Tumpa iñee. Jaeño romombeu añete vae, jare royekuaauka opaete vae reta pe Tumpa jóvai.

³ Amogüe vae reta pe yavai yae ñee ikavi vae romombeu vae, ërei okañɨtei ñogüɨnoi vae reta pe ko jökorai.

⁴ Echa kuae ɨvɨ pegua tumpa ombopɨtumimbi oporogüɨroviambae reta iyarakuaa, agüɨye vaerä oikuaa kavi ñee ikavi vae Cristo iyemboetea regua. Jae ko Tumpa etei.

⁵ Ore roñemoñee yave, romombeu ko Jesucristo jae ko yandeYa vae; ore ko romae oreyé perembiokuai retaño, Jesús roaɨu ramo.

⁶ Echa Tumpa ko jei oime vaerä pɨtumimbi pe tembipe. Jae etei ko omoembipe orepɨa pe, roikuaa vaerä Tumpa iyemboetea oyekuaa Jesucristo rupi.

Mborogüɨrovia rupi yaiko

⁷ Jare oime rogüɨnoi mbae ikavi yae vae orerete pe, yepe tëi orerete ñaeu ramiño, oyekuaa vaerä kuae mbaepuere tuicha yae vae oime rogüɨnoi vae Tumpa imbaepuere ko, orembaeä ko.

⁸ Roiporara yae ko opaño mbaembae, ërei mbaetɨ orembopɨtu yae. Jeta yemoambeko, ërei mbaetɨ orembopɨa kërai;

⁹ ïru vae reta oyapo ikavimbae vae oreve, ërei Tumpa mbaetɨ orereeya. Orereitɨ reta tëi, ërei mbaetɨ oremokañɨtei.

¹⁰ Opaete kerupi rojoa rupi rogüɨraja orerete re Jesús imano, oyekuaa vaerä vi oreré Jesús jekove.

¹¹ Echa ore reta oimeño roikove vae, roñemoëgua avei mano pe Jesús roaɨu ramo, oyekuaa vaerä orerete mano pegua re Jesús jekove.

¹² Jáeramo ore reta romano vaerä roiko, pe reta penoi vaerä tekove.

¹³ Oreporogüɨrovia oyovake ko jókuae oyekuatía oï rami, echa jei: “Che arovia ko. Jáeramo jae.” Jaeramiño vi ore rogüɨrovia. Jáeramo oremiari jese.

¹⁴ Echa roikuaa Tumpa omoingove ye yandeYa Jesús. Jaeramiño vi roikuaa Tumpa oremoingove yeta ko Jesús ndive, jare orererajata pe reta ndive jae jóvai.

¹⁵ Opaete kuaekuae roiporara, ore poaɨu vae jeko pegua, Tumpa ipɨakavi oï vaerä jeta vae ndive. Jökorai jeta vae omeeta yasoropai Tumpa pe, jare oyemboeteukata.

¹⁶ Jáeramo mbaetɨ orepɨtu, yepe tëi orerete opa ojo oiko, ërei oreɨvɨte pe oyembopɨau avei.

¹⁷ Echa kuae roiporara michi peguaño vae, güeru oreve yemboetea ikavi yae vae jare opambae vae.

¹⁸ Jáeramo mbaetɨ romae mbaembae oyeecha vae re, romae ko mbaembae oyeechambae vae re; echa mbaembae oyeecha vae opa vae ko, ërei mbaembae oyeechambae vae ko opambae.