2 Corintios 3 - Biblia Guarani Tumpa Iñee

Morogüɨrökuavee päve ipɨau vae

¹ ¿Jekuae pa romboɨpɨ yeta roñemoërakua ore aeño?, ani ¿jekuae pa rogüɨraja pɨau yeta peve tupapire oreregua ani pe pemee vaerä oreve, amogüe vae reta oyapo vae rami?

² Echa pe reta etei ko jae oretupapire oyekuatía oï orepɨa pe vae rami. Opaete pereecha vae oikuaa jare omongeta vae rami ko.

³ Echa opaete vae ipuere oikuaa kërai pe reta ko jae metei tupapire Cristo güi ore rogüeru vae rami. Pe reta ko metei tupapire Tumpa oikove vae iEspíritu pe oyekuatía vae rami, mbaetɨ ko metei tupapire tinta pe oyekuatía vae rami. Mbaetɨ ko ita ipe vae re rami, oikuatía ko pepɨa re etei.

⁴ Jare körai roe peve, rogüɨrovia Tumpa re Cristo rupi ramo.

⁵ Opaete mbaembae royapo vae oreyeugüi aeñoä ko. Tumpa güiño ko ou opaete mbaembae royapo vaerä.

⁶ Jae ko omee oreve orepoki vaerä royeokuai chupe morogüɨrökuavee päve ipɨau pe. Mbaetɨ ko oyekuatiagüe, Espíritu pegua ko; echa mborookuai oyekuatiagüe oporoyuka, ërei Espíritu oporomoingove.

⁷ Jókuae mborookuai oporoyuka vae oyekuatía oï ita reta re vae oñemee Moisés pe yave, Moisés jova jembipe yae, jáeramo Israel iñemuña reta ipuereä omae Moisés jova re. Ërei jókuae jembipe vae mbaetɨ ɨma oiko.

⁸ Vɨtei pa Espíritu pegua morogüɨrökuavee päve ipɨau vae ou yave iyemboetea.

⁹ Echa jókuae mborookuai oporoyuka vae iyemboetea reve ou yave, vɨtei pa Espíritu pegua iyemboetea yandembojupi vae.

¹⁰ Echa tenonde yave mborookuai oyemboete yae vae, mbaeä etei ko jókuae mborookuai añave ou vae güi.

¹¹ Echa jókuae mborookuai opa vae iyemboetea yae, vɨtei pa jókuae mborookuai opambae vae.

¹² Jáeramo kuae re rogüɨrovia ramo, romombeu kavi peve roipoɨumbae reve.

¹³ Mbaetɨ royapo Moisés rami. Echa jae omboyasoi jova metei tarapo pe, agüɨye vaerä Israel iñemuña reta oecha kërai ogüe jókuae jova jembipe vae.

¹⁴ Ërei Israel iñemuña reta oikuaa kaviä. Echa jekuaeño iyarakuaa oyeasoi oï, Moisés jova oyasoi äka-soia pe rami omongeta reta yave morogüɨrökuavee päve indechi vae. Ërei Cristo rupiño ipuere oyepea.

¹⁵ Ërei añave rupi Moisés oikuatiagüe omongeta reta yave, jekuaeño oime äka-soia oyasoi rami ipɨa reta.

¹⁶ Ërei oyerova reta yandeYa kotɨ yave, jókuae äka-soia oyeekɨ chugüi reta.

¹⁷ Jare yandeYa jae ko Espíritu. Jókuae yandeYa iEspíritu oïa pe, oime yeyora.

¹⁸ Jáeramo, opaete yande ñamae ramboeve yandeYa iyemboetea re epeo rupi rami, yayepoepɨ yaja yaiko yandeYa iEspíritu rupi.