2 Corintios 13 - Biblia Guarani Tumpa Iñee

¹ Kuae jae mboapɨa ma ajata pépɨri vae. Oime yave kia teko oyapo vae, timiari mókoi ani mboapɨ oikuaa kavi jeko regua vae, yaikuaa vaerä añete ra vae.

² Jae ma peve aja pépɨri yave, ërei amombeu ye aï peve mbaetɨ tëi aï pépɨri reve. Aikuatía opaete mbaeyoa oyapo vae reta pe jare opaete ïru reta pe: Che aja ye yave pépɨri, ngaraa etei aiparareko.

³ Echa pe reta peeka Cristo imiari ra peve che rupi vae. Jae mbaetɨ ko ipuerembae rami peré, imbaepuere yae ko peré.

⁴ Echa yepe tëi Cristo imbaepuerembae rami oyekutu kurusu re, ërei oikove ye Tumpa imbaepuere rupi. Jaeramiño vi ore etei mbaetɨ mbaepuere rogüɨnoi, ërei roikove yeta Cristo rupi Tumpa imbaepuere rupi, royeokuai vaerä peve.

⁵ Jekuaeño pemae kavi peyé peikuaa vaerä añetete ra oporogüɨrovia vae. ¿Mbaetɨ pa peikuaa Jesucristo oiko pepɨa pe vae?, ani ¿mbaetɨ ra?

⁶ Ërei aipota peikuaa ore ko jae oporogüɨrovia vae añetete vae reta.

⁷ Jare royerure Tumpa pe agüɨye vaerä peyapo mbae ikavimbae vae. Mbaetɨ roipota ïru vae reta oyemongeta kavi oreré vaeräño, jaeño roipota pe reta peyapo vaerä ikavi vae, yepe tëi güɨramoi ïru vae reta oyemongeta ore añeteteä vae.

⁸ Echa mbaetɨ rogüɨnoi mbaepuere royovaicho vaerä añete vae ndive. Jaeño orepuere roñemoïru añete vae ndive.

⁹ Jáeramo royerovia orepɨ̈ratambae re jare pe reta pepɨ̈rata yae vae re; jare royerure avei Tumpa pembojupi vaerä.

¹⁰ Jáeramo aikuatía peve körai pépɨri aïä reve, agüɨye vaerä täta amboeta aja pépɨri yave, mbaepuere yandeYa omee cheve pombokuakuaa vaerä vae rupi, mbaetɨ ko omee cheve pomboai vaerä.

Tamaraeme reta

¹¹ Yamboapɨ vaerä, cherɨvɨ reta, peyerovia, peyembojupi, peyombopɨakatu, peiko kavi metei rami, jare peiko päve mbɨakatu rupi; jare Tumpa ipɨakatu vae jare iporoaɨu vae oikota pe ndive.

¹² Peyapo maraetei oyoupe peyovapɨte jare peyomboete reve kavi.

¹³ Opaete oporogüɨrovia vae reta omondo peve tamaraeme.

¹⁴ YandeYa Jesucristo ipɨakavi, Tumpa iporoaɨu jare Espíritu Santo iñemoïru toï opaete pe ndive. ¡Amén!