2 Corintios 11 - Biblia Guarani Tumpa Iñee

Pablo jare temimondo añetetembae vae reta

¹ Aipota pepɨaguasu vaerä cheve, chemiari ramboeve iyarakuaambae vae rami. ¡Pepɨaguasu cheve!

² Cherägüɨro peré, Tumpa jägüɨro rami. Echa pomee ma Cristo pe imenda ïrurä, poñono vaerä jóvai metei kuñatai ndeiño etei oasa kuimbae ndive vae rami.

³ Ërei aipoɨu, güɨramoi jókuae mboi ipoki oporombotavɨ vaerä vae ombotavɨ Eva rami, peyembotavɨuka jare pepia Cristo güi.

⁴ Echa pemboresive yave ambuae Jesús re omoërakua vae, ore romoërakua vae güi; jaeramiño vi pemboresive ambuae espíritu, tenonde yave pemboresive ma vae güi; jökoraiño vi pemboresive ambuae ñee ikavi vae, tenonde ma pemboresive vae güi.

⁵ Ërei che jókuae temimondo añetembae tuichagüe reta güi, mbaetɨ ko ayandu chemichi yae.

⁶ Yepe tëi mbaetɨ chepoki chemiari vaerä, ërei aikuaa katu chemiari peve jese vae. Jare opaete royapogüe rupi roikuaauka peve jókuae.

⁷ ¿Cheyoa ra pekotɨ amoërakua peve yave ñee ikavi vae jepɨmbae añemomichi reve, pe peyembotuicha vaerä?

⁸ Ïru oporogüɨrovia vae reta ko omboepɨ cheve ayeokuai vaerä peve.

⁹ Jare aiko pépɨri ramboeve mbae oata cheve yave, mbaetɨ kia ave amoambeko mbae re. Echa yanderɨvɨ Macedonia güi yogüeru vae reta güeru cheve mbae oata cheve vae. Jare jökoraita aiko, agüɨye vaerä pomoambeko.

¹⁰ Echa Cristo regua aikuaa añete vae jekuae chemiarita opaete Acaya rupi. Mbaetɨta kia ipuere chemokïrii.

¹¹ ¿Maera pa körai jae? ¿Mbaetɨ ra poaɨu? ¡Tumpa oikuaa poaɨu ko!

¹² Ërei jekuaeñota ayapo, jókuae ayapo vae. Amokïrii vaerä jókuae oeka oyembotuicha vaerä vae reta.

¹³ Jae reta temimondo jaanga retaño ko. Oporombotavɨ vae reta ko. Oyemonde reta Cristo jemimondo reta rami.

¹⁴ Ërei agüɨye ñanepɨakañɨ kuae re, echa Satanás etei ipuere oyemonde Tumpa iaraɨgua rami.

¹⁵ Jáeramo, mɨakañɨä ko Satanás jembiokuai reta oyemonde yave jupi vae iyapoa reta rami. Ërei jaɨkue rupi oiporara retata jembiapo reta oï rupi.

Temimondo Pablo oiporaragüe vae regua

¹⁶ Jae ye vi peve: Agüɨye kia ave toyemongeta imbokere vae ko che. Ërei jökorai peyemongeta cheré yave, pemaeño tachemiari peve, che vi ayemboete vaerä michi pegua.

¹⁷ Kuae jae vae, mbaetɨ ko jae yandeYa jei vae, jaeño ayembotuicha imbokere vae rami.

¹⁸ ¡Echa oime jeta oyemboete jae aeño vae, che vi tayembotuicha!

¹⁹ Pearakuaa katu tëi reve, peropɨa imbokere vae reta.

²⁰ Echa peropɨa guasu peokuaiasɨ katu vae reta, omaepɨ̈ro pegüi vae reta, pembotavɨ vae reta, pereröɨro vae reta jare perovapete vae reta.

²¹ Yepe tëi chemara jae vaerä, ¡ore reta mbaetɨ orepuere jökorai roiko! Ërei ïru vae reta oipoɨuä oyemboete yave, che vi ayemboete aipoɨumbae reve yepe tëi mbokere.

²² Jae reta hebreo, che jaeramiño vi. Jae Israel pegua reta, che jae vi ko. Jae reta Abraham iñemuña reta pegua, che jae vi ko.

²³ Jae reta Cristo jembiokuai (imbokere vae rami tae), che ayapɨraa reta. Mbaravɨkɨ pe, jeta yae ayapo chugüi reta. Ñenupa pe, jeta yae. Tembipɨɨrɨru pe, jeta yae vi. Jeta yae amano seri.

²⁴ Judío reta pandepo ye chenupa chikote pe; chenupa reta metei oata cuarenta oiporu reta vaerä cheré.

²⁵ Mboapɨ ye chenupa reta ɨvɨra pe. Metei vese cheapi reta ita pe. Mboapɨ ye aiporara barco ɨguasu pe okañɨ vae; metei pɨare jare metei ara oiko ɨguasu pe.

²⁶ Jeta yae aguata opaete kerupi; mbovɨ ye ɨ chereraja seri. Imonda vae reta chepïaro. Cherëtaɨgua reta chepïaro jare vi judiombae vae reta. Amano seri tëta guasu reta pe, ñuu rupi, ɨguasu rupi jare oporogüɨrovia raanga vae reta.

²⁷ Täta aparavɨkɨ aiporara reve. Jeta aiporara topeɨ, yɨmbɨaɨ ɨuve, iroɨ jare nandi.

²⁸ Jare jeta ïru mbaembae, oime chemboyemongeta yae vae ko jae opaete oporogüɨrovia vae reta.

²⁹ Kia imbaerasɨ yave, che vi aiporara. Kia oporombogüɨapiuka vae yave, che vi chearasɨ ikotɨ.

³⁰ Oime yave mbae re ayemboete vaerä, tayemboete jókuae chepɨ̈ratambae re.

³¹ Tumpa, yandeYa Jesucristo Tu, imboetea avei vae oikuaa mbae jae vae añete ko.

³² Damasco pe aï yave, mburuvicha guasu Aretas jee vae jembiokuai oipota tëi chepɨɨ. Jáeramo oyókuai sundaro reta oäro vaerä opaete tëta guasu jöke reta;

³³ ërei chembogüeyɨ reta metei kanata pe tëta guasu Damasco ikësea iventana rupi. Jare jökorai aasayepe chugüi reta.