1 Timoteo 6 - Biblia Guarani Tumpa Iñee

¹ Opaete oime iya vae reta tomboete, agüɨye vaerä ïru vae reta jei ikavimbae vae Tumpa kotɨ jare yandeporomboe kotɨ.

² Jare iya reta oporogüɨrovia vae ko yave, agüɨye togüɨröɨro reta Tumpa güɨrovia jeko pegua. Ërei toyeokuai kavi chupe, echa iparavɨkɨagüe re oyekou vae reta oporogüɨrovia vae reta ko jare yandeYa oaɨu ko. Kuae eporomboe jare eporomboarakuaa.

Tumpa imboete jare yandepɨakatu vae

³ Kia oporomboe ambuae mboromboe re, jare mbaetɨ güɨrovia mboromboe añete vae yandeYa Jesucristo regua jare mboromboe añete vae kërai yamboete vaerä Tumpa vae,

⁴ jókuae nunga oyembotuicha ko, jare mbaetɨ etei ko oikuaa mbae ave, oyoaka apoño. Joko güi oë pɨakatúä, ñeapose, ñee ikavimbae Tumpa kotɨ, jare mborogüɨrovia katúä.

⁵ Jókuae reta oyoakaiño yarakuaambae reta ndive, mbaetɨ oikuaa añete vae. Oyemongeta Tumpa iparavɨkɨ rupi omongana yae vaerä. Agüɨye eñemoïru jókuae nunga reta ndive.

⁶ Ërei yamboete Tumpa jare yandepɨakatu vae ko, ngana tuichagüe;

⁷ echa yaa yandesɨ güi yave, mbaetɨ etei mbae yaru, jare ñamano yave, ngaraa etei vi mbae yaraja.

⁸ Jáeramo, ñanoi yave añave yanderembiurä jare yanderemimonderä, yaiko yandepɨakatu reve.

⁹ Ërei oipota oikokatu vae reta mbaetɨ ipɨaguasu, oa mbaeyoa pe, jare jeta mbaepotarai ikavimbae vae pe. Jare oñeäka pɨpɨ mbaesusere jare kañɨtei pe.

¹⁰ Echa korepoti yaipota yae vae ko güeru opaete mbaembae ikavimbae vae. Jare amogüe vae oipota yae oikokatu ramo, opia iporogüɨrovia güi, jare täta oiporara.

Ñoraro mborogüɨrovia re

¹¹ Ërei nde kuimbae Tumpa jembiokuai, etekuarai kuaekuae güi jare omomoe jupi vae, Tumpa imboete, mborogüɨrovia, mboroaɨu, mbɨaguasu jare ñemomichi.

¹² Eñeraro kavi ndeporogüɨrovia re, egüɨ̈rakua tekove opambae vae re, echa kuaerä Tumpa ndeparavo. Jáeramo remombeu ndeporogüɨrovia jeta vae jóvai.

¹³ Royókuai Tumpa omee tekove opaete mbaembae pe vae jóvai, jare Jesucristo omombeu kavi añete vae regua Poncio Pilato jóvai vae jee re,

¹⁴ eyapo che royókuai jese vae reipoepɨmbae reve, agüɨye vaerä kia ipuere ndemboeko mbae re, yandeYa Jesucristo ou ye regua.

¹⁵ Echa jókuae ara oväe yave, Tumpa oechaukata ko yandeYa Jesucristo. Jaeño ko mbaepuere iYa, mburuvicha guasu reta Juvicha guasu, Imbaepuere yae ete mbaepuere güɨnoi vae reta güi vae,

¹⁶ jaeño ete ko omanombae vae, oiko tembipe yaya rapembae jese vae pe, mbaetɨ kia ave oecha vae, jare ngaraai oecha vae. Chupe toñemee mbaemboete jare mbaepuere. ¡Amén!

¹⁷ Añave rupi oikokatu vae reta eyókuai, agüɨye toyembotuicha, agüɨye toyeko imbaeyekou reta re, jókuae ɨmambae opata vae re. Ërei toyeko Tumpa oikove vae re, jae omee yandeve opaete mbaembae yayerovia vaerä vae.

¹⁸ Jare eyókuai vi toyapo ikavi vae, toikokatu mbaembae ikavi oyapo vae pe, tikɨ̈reɨ ngatu omee vaerä güɨnoigüe jare tipɨakavi reta,

¹⁹ güɨnoi vaerä mbae ikavi vae opambae vae ara outa vae reta peguarä, jare güɨnoita tekove opambae vae.

Pablo oyókuai Timoteo vae

²⁰ Timoteo, eyangareko kavi jókuae oñemee ndeve reyangareko vaerä jese vae re. Agüɨye eyeapɨsaka ndaye reta re, echa mbaeä ko, jare arakuaa katu raanga re.

²¹ Echa amogüe reta güɨrovia jókuae re vae oyemombia mborogüɨrovia güi. Tumpa ipɨakavi toï nde ndive. ¡Amén!