1 Timoteo 5 - Biblia Guarani Tumpa Iñee

Kërai yaiko vaerä ïru reta ndive

¹ Agüɨye eñeengata indechi vae pe, ërei emboarakuaa nderu rami; jare taɨrusu vae reta, emboarakuaa nderɨvɨ rami;

² tɨ̈aro reta, emboarakuaa ndesɨ rami; kuñatai reta, emboarakuaa ndereindɨ rami, remboete reve.

³ Emborɨ imemano vae reta, mbaetɨ kia chupe vae reta.

⁴ Ërei imemano vae oime yave güɨnoi imembɨ reta ani jamariro reta, jae reta räri tomborɨ jo pegua reta jare tu reta, echa jókuae ko ikavi jare omboyerovia Tumpa.

⁵ Ërei añetete imemano vae, mbaetɨ etei kia chupe vae, oäro Tumpa reño, oyerure avei ara rupi jare pɨ̈tu rupi.

⁶ Ërei imemano vae oeka jete omboyerovia vaeräño vae, omano rami ko oiko.

⁷ Jáeramo kuae mbaembae re eyókuai, agüɨye vaerä kia omboeko reta mbae re.

⁸ Ërei kia oyangarekoä jo pegua reta re ani jëtara reta re vae, oikuaku rami ko iporogüɨrovia, oasa ete ye ko oporogüɨroviambae vae güi.

⁹ Imemano vae reta jee ipɨte pe jaeño toï sesenta año güɨnoi vae güi kutɨ, meteiño ime vae,

¹⁰ jare jërakua kavi jembiapo reta rupi vae, oyangareko kavi imembɨ reta re, omboresive kavi mboupa, oyoe oporogüɨrovia vae reta ipɨ, omborɨ oiporara vae reta jare oyapo opaete mbae ikavi vae yave.

¹¹ Ërei imemano vae taɨrusu vae reta, agüɨye emoapɨta jee. Echa imendase ye yave oipotaä ma yeokuai Cristo pe.

¹² Jáeramo güɨnoi ko teko, opia iporogüɨrovia güi ramo.

¹³ Jaeramiño vi omboɨpɨ iyakɨ, opou reteiño; jare mbaetɨ jokuaeño, oporoangao jare oyemoinge opaño mbae pe, imiari agüɨyeta tëi imiari jese vae.

¹⁴ Jáeramo, aipota imemano vae taɨrusu vae reta omenda ye, timembɨ reta, togüɨroata kavi jo pegua reta, agüɨye vaerä oñemoëgua oyeangaouka vaerä tovaicho pe.

¹⁵ Echa amogüe vae oyerova ma ojo Satanás jupíe.

¹⁶ Oporogüɨrovia vae reta jo pe oime yave imemano vae reta, tomborɨ reta, agüɨye vaerä yavai oporogüɨrovia vae reta pe, jökorai oime vaerä jeta yemborɨ imemano vae mbaetɨ kia chupe vae reta pe.

¹⁷ Jupi ko oporogüɨrovia vae reta itenondegua güɨroata kavi mbaravɨkɨ vae, oyeaɨu yae vaerä, jókuae omoërakua Tumpa iñee jare oporomboe vae.

¹⁸ Echa Tumpa Iñee jei körai: “Güeye ombopiriri trigo oï yave, agüɨye peiyuruokua.” Jare: “Echa jupi ko oparavɨkɨ vae pe oyemboepɨ vaerä.”

¹⁹ Oime yave kia omboeko oporogüɨrovia vae reta itenondegua mbae re, agüɨye eyeapɨsaka jese mbaetɨ yave imiari mókoi ani mboapɨ jese oikuaa kavi jeko regua vae.

²⁰ Mbaetɨ oipota oeya iyoa vae reta pe emboeta opaete vae jóvai, ïru vae reta okɨɨye vaerä vi.

²¹ Royókuai Tumpa jare yandeYa Jesucristo jare iaraɨgua jembiparavo reta jovake, reyapo vaerä kuae mbaembae jupi rupi, reporomboyoavɨmbae re reve.

²² Agüɨye emanorai eyapo mbae kia pe ave, agüɨye eyemoinge teko ambuae pe. Eiko ikɨambae.

²³ Ndepɨa pe ndembaerasɨ yae jeko pegua jeu vino michi mi, agüɨye mo jeu ɨ.

²⁴ Amogüe reta iyoa oyekuaa kavi voi ndei oñejäa mbove, ërei amogüe reta iyoa oyekuaa taɨkue rupi.

²⁵ Jaeramiño vi amogüe reta oyapo ikavi vae oyekuaa kavi voi; ërei ikavi vae añave mbaetɨ oyekuaa vae oyekuaa tai ko.