1 Timoteo 4 - Biblia Guarani Tumpa Iñee

Yembopɨapochɨ Tumpa kotɨ oimeta vae regua

¹ Ërei Espíritu Santo omombeu kavi yandeve kërai ara reta taɨkuegua pe amogüe vae oyerovata iporogüɨrovia güi, ojo vaerä espíritu oporombotavɨ vae reta ndive jare aña reta iporomboe rupi,

² jókuae reta oenduta jova mókoi vae jare iyapu vae reta iporomboe, jókuae mbaetɨ etei ipɨatɨtɨ vae reta.

³ Oyopia retata omenda, jare oyopia retata tembíu Tumpa oyapo vae, jókuae oporogüɨrovia vae reta jare añete vae oikuaa vae reta ipuere vaerä jou omee reve yasoropai jese vae.

⁴ Echa opaete mbaembae Tumpa oyapogüe ikavi ko. Mbaetɨ ikavi ñaröɨro vaerä, ikavi ko yau ñamee reve yasoropai Tumpa pe.

⁵ Echa oñeñono tee ko yau vaerä Tumpa iñee rupi jare yerure rupi.

Jesucristo jembiokuai ikavigüe

⁶ Remboe yave yanderɨvɨ reta kuae re, Jesucristo jembiokuai ikavigüe ko nde, jekuae eñemomɨ̈rata ñee mborogüɨrovia pegua re jare mboromboe añete vae rupi reiko vae re.

⁷ Agüɨye erovia arakae ndaye reta. Ërei eñemoäta ngatu reyapo vaerä Tumpa oipota vae;

⁸ echa yanderete yamongúe vae michi peguaño ikavi yandeve, ërei Tumpa oipota vae, opaete pegua ikavi, echa ikavita yandeve añave yaikove yaiko ramboeve, jare ñamano ma yave.

⁹ Kuae ko jae ñee añete vae jare jupi ko opaete vae güɨrovia vaerä.

¹⁰ Echa kuaerä etei yaparavɨkɨ ñaï yaiporara reve, Tumpa oikove vae re yarovia ramo, opaete vae jese güɨrovia vae imboasaa.

¹¹ Kuae mbaembae re eporookuai jare eporomboe.

¹² Agüɨye kia tanereröɨro ndetaɨrusu ramo, ërei eechauka oporogüɨrovia vae reta pe neñee rupi, reiko vae rupi, mboroaɨu rupi, espíritu rupi, mborogüɨrovia rupi jare teko kavi rupi.

¹³ Jekuaeño emongeta Tumpa Iñee, aja aväe ndeve regua, eporomboarakuaa jare eporomboe.

¹⁴ Agüɨye enoiiño mbaepuere Tumpa omee ndeve vae. Jókuae oñemee ndeve vae omombeu nderegua yave, oporogüɨrovia vae reta itenondegua reta oñono ipo nderé yave vae.

¹⁵ Eyemoambeko avei kuae mbaembae reta re, agüɨye eeya, oyekuaa vaerä opaete vae pe ikavi yae ko jókuae reyemboe vae.

¹⁶ Eyangareko ndeyé jare ndeporomboe re; nepɨ̈rata jese, echa jökorai reyapo yave, reasayepeta ikavimbae güi, jare oyeapɨsaka nderé vae reta.