1 Timoteo 2 - Biblia Guarani Tumpa Iñee

Yemboe yerure regua

¹ Tenonde ete poyókuai peyerure vaerä pemoñera reve, peiporu jare pemee reve yasoropai Tumpa pe opaete vae reta re;

² mburuvicha guasu reta re, jare opaete mbaepuere güɨnoi vae reta re, yaiko pɨagüive vaerä, yamboete reve Tumpa jare oyoupi.

³ Echa jókuae ko ikavi jare omboyerovia Tumpa Yandemboasa vae,

⁴ jae oipota opaete vae oyemboasauka jare oikuaa kavi añete vae.

⁵ Echa oime meteiño Tumpa. Jaeramiño vi oime meteiño ipuere oporomoñoövaiti Tumpa ndive vae. Jae ko kuimbae Cristo Jesús jee vae.

⁶ Jae oñemee omano vaerä, oepɨ vaerä opaete vae. Jare Tumpa oikuaauka kuae, iara pe kavi.

⁷ Jare yandeYa cheparavo amombeu vaerä kuae regua. Jae cheapo jemimondorä, amboe vaerä judiombae vae reta mborogüɨrovia re jare añete vae re. Kuae che jae peve vae añete vae ko. Cristo jee re mbaetɨ ko cheapu.

⁸ Jáeramo aipota kuimbae reta oyerure vaerä Tumpa pe opaete kerupi rupi omopüa reve ipo, iyarasɨmbae reve jare ñerarombae reve.

⁹ Jaeramiño vi kuña reta toyemonde temimonde ikavi vae pe, ërei agüɨye ïru vae reta oecha vaeräño. Agüɨye oasa ete toyemoambeko ia re, mbaembae oro pegua re, ita ipöra yae vae re ani temimonde jepɨ yae vae re.

¹⁰ Ërei toyapo mbaembae ikavi vae. Kuña reta oñemee Tumpa pe vae oyapo rami.

¹¹ Kuña oporomboete reve tikïrii toyemboe.

¹² Jare mbaetɨ amaeño kuña reta oporomboe vaerä jare güɨnoi vaerä mbaepuere kuimbae reta re, jaeño tikïrii.

¹³ Echa Tumpa oyapo Adán räri, jaɨkue rupi oyapo Eva;

¹⁴ Adán mbaetɨ ko oyembotavɨuka, kuña ko oyembotavɨuka. Jare oyembotavɨuka ramo oa mbaeyoa pe.

¹⁵ Kuña reta oyemboasa imembɨ yave. Ërei jekuaeño toporogüɨrovia jare toporoaɨu, toñeñono tee Tumpa peguarä. Jekuaeño toiko kavi.