1 Timoteo 1 - Biblia Guarani Tumpa Iñee

Tamaraeme

¹ Che Pablo, Jesucristo jemimondo, Tumpa yandemboasa vae jare yandeYa Jesucristo ñaäro vae iporookuai rupi.

² Aikuatía kuae tupapire ndeve Timoteo, cheraɨ añetete vae mborogüɨrovia rupi. YandeRu Tumpa jare yandeYa Jesucristo ipɨakavi jare iporoparareko jare ipɨakatu toï nde ndive.

Yeandu mboromboe añetembae vae güi

³ Repɨta Efeso pe, Macedonia kotɨ aja yave che jae ndeve rami, reyopia vaerä amogüe vae agüɨye vaerä oporomboe ambuae mboromboe re,

⁴ jare agüɨye toyeapɨsaka reta arakae ndaye reta re, jare iñemuñagüe reta regua re omoërakua vae reta re. Echa jókuae mboromboe jaeño güeru yoaka reta, oporombokuakuaa vaerägüe mborogüɨrovia Tumpa re. Jökorai royókuai.

⁵ Kuae mborookuai jae ko, mboroaɨu oime vaerä yandepɨa ikɨambae güi etei vae, jare yandeyemongeta ikavigüe, jare mborogüɨrovia añetete vae.

⁶ Ërei amogüe vae jopa kuae mbaembae güi, jare opia reta yoaka reteiño kotɨ.

⁷ Jae reta oipota tëi oporomboe mborookuai re, oikuaambae reve jei vae, ani añete rami oporomboe jese vae.

⁸ Yaikuaa mborookuai ikavi ko, oyeporu yave oyeporuta rami.

⁹ Echa yaikuaa mborookuai oyeapoä ko mbaepuere güɨnoi vaerä jupi vae reta re, jaeño oyeapo mborookuai oyavɨ vae reta re, jare iñeereendumbae reta peguarä, jupimbae reta jare iyoa vae reta peguarä, Tumpa omboetembae reta peguarä, tu oyuka jare ichɨ oyuka vae reta peguarä jare oporoyuka vae reta peguarä,

¹⁰ aguasa oyapo vae reta peguarä, jare kuimbae reta oyoupii oyogüɨreko vae peguarä, oñomi japicha vae reta peguarä, iyapu vae reta peguarä, oñeapo iyapu reve vae reta peguarä, jare oipotagüe mboromboe añete vae ndive oyovaicho vae reta peguarä.

¹¹ Kuae mboromboe ñee ikavi vae Tumpa iyemboetea yae vae regua, cheve oñemee vae ko.

Pablo iparavɨkɨ

¹² Amee yasoropai yandeYa Cristo Jesús chemomɨ̈rata vae pe, omae cheré jupi ramo cheñono iparavɨkɨ pe,

¹³ yepe tëi tenonde yave che jae mbae ikavimbae vae yandeYa kotɨ, ayapo ikavimbae vae yandeYa re güɨrovia vae reta pe, jare chereko pochɨ ikotɨ. Ërei yandeYa cheparareko, echa ayapo mbaetɨ aikuaa ramo jare mbaetɨ aporogüɨrovia ramo.

¹⁴ Ërei yandeYa tuicha yae ipɨakavi cheve, mborogüɨrovia jare mboroaɨu rupi Cristo Jesús re yarovia yave.

¹⁵ Kuae ko jae ñee añete vae jare jupi ko opaete vae güɨrovia vaerä: Kërai Cristo Jesús ou kuae ɨvɨ pe omboasa vaerä iyoa vae reta, jare che ko jae iyoa vae reta güi iyoa yae ye vae.

¹⁶ Ërei kuae jeko pegua yandeYa cheparareko, oechauka vaerä cherupi opaete ipɨakavi, jökorai che ayu apɨta güɨroviata jese vae reta pe, tekove opambae vae güɨnoi vaerä vae reta pe.

¹⁷ Jáeramo, yamboete yae jekuaekuae avei rupi Mburuvicha guasu opambae vae, omanombae vae, oyeechambae vae, jaeño ko Tumpa yarakuaa yae vae. ¡Amén!

¹⁸ Cheraɨ Timoteo, royókuai tenonde yave oyemombeu nderegua rami, reñoraro kavi vaerä ikavimbae vae ndive,

¹⁹ reñemomɨ̈rata reve ndeporogüɨrovia re, ndeyemongeta kavi reve. Echa amogüe vae oyapo agüɨyeta tëi oyapo vae. Jáeramo, ogüɨapi iporogüɨrovia pe,

²⁰ körai oasa Himeneo jare Alejandro. Jáeramo amboeterenga Satanás ipo pe, oikuaa vaerä agüɨye mo jei ikavimbae vae Tumpa kotɨ.